ಕೆನಡಾದ ಶಿಕ್ಷಣ ಸಂಸ್ಥೆಗಳಲ್ಲಿ ಅಧ್ಯಯನ ಮಾಡಲು ಕೋರಿ ಸಲ್ಲಿಸಿದ್ದ ಭಾರತೀಯ ವಿದ್ಯಾರ್ಥಿಗಳ ಅರ್ಜಿಗಳಲ್ಲಿ ಸುಮಾರು ಶೇ 75ರಷ್ಟನ್ನು ಆಗಸ್ಟ್ನಲ್ಲಿ ತಿರಸ್ಕರಿಸಲಾಗಿದೆ. ಒಂದು ಕಾಲದಲ್ಲಿ ಭಾರತೀಯ ವಿದ್ಯಾರ್ಥಿಗಳಿಗೆ ಅತ್ಯಂತ ಮೆಚ್ಚಿನ ತಾಣವಾಗಿದ್ದ ಕೆನಡಾ, ಈಗ ತನ್ನ ಆಕರ್ಷಣೆಯನ್ನು ಕಳೆದುಕೊಳ್ಳುತ್ತಿದೆ. ಸರ್ಕಾರದ ಅಂಕಿ-ಅಂಶಗಳ ಪ್ರಕಾರ, ಕೆನಡಾ ಹೇರಿದ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ನಿರ್ಬಂಧಗಳು ಭಾರತೀಯ ಅರ್ಜಿದಾರರ ಮೇಲೆ ಅತಿ ಹೆಚ್ಚು ಪರಿಣಾಮ ಬೀರಿವೆ ಎನ್ನಲಾಗಿದೆ.
ತಾತ್ಕಾಲಿಕ ವಲಸೆಯನ್ನು ನಿಯಂತ್ರಿಸಲು ಮತ್ತು ವಿದ್ಯಾರ್ಥಿ ವೀಸಾ ವಂಚನೆಯನ್ನು ನಿಭಾಯಿಸಲು ಕೈಗೊಂಡ ಕ್ರಮಗಳ ಭಾಗವಾಗಿ, ಕೆನಡಾವು 2025ರ ಆರಂಭದಲ್ಲಿ ಸತತ ಎರಡನೇ ವರ್ಷಕ್ಕೆ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳಿಗೆ ನೀಡುವ ಪರವಾನಗಿಗಳ ಸಂಖ್ಯೆಯನ್ನು ಕಡಿಮೆಗೊಳಿಸಿದೆ.
ಭಾರತೀಯ ಅರ್ಜಿದಾರರಿಗೆ ದೊಡ್ಡ ಹೊಡೆತ
2023ರ ಆಗಸ್ಟ್ನಲ್ಲಿ ಶೇ 32ರಷ್ಟು ನಿರಾಕರಣೆ ದರವಿತ್ತು. ಆದರೆ ಈ ವರ್ಷ ಆಗಸ್ಟ್ನಲ್ಲಿ ಕೆನಡಾದ ಪೋಸ್ಟ್-ಸೆಕೆಂಡರಿ ಸಂಸ್ಥೆಗಳಲ್ಲಿ ಅಧ್ಯಯನ ಮಾಡಲು ಅರ್ಜಿ ಸಲ್ಲಿಸಿದ್ದ ಶೇ 74ರಷ್ಟು ಭಾರತೀಯ ವಿದ್ಯಾರ್ಥಿಗಳಿಗೆ ಪರವಾನಗಿ ನಿರಾಕರಿಸಲಾಗಿದೆ ಎಂದು ರಾಯಿಟರ್ಸ್ ವರದಿಯನ್ನು ಉಲ್ಲೇಖಿಸಿರುವ ಸರ್ಕಾರದ ದತ್ತಾಂಶಗಳು ತಿಳಿಸಿವೆ. ಇದೇ ಅವಧಿಯಲ್ಲಿ ಒಟ್ಟಾರೆ ಶೇ 40ರಷ್ಟು ಅಧ್ಯಯನ ಪರವಾನಗಿ ಅರ್ಜಿಗಳು ನಿರಾಕರಣೆಯಾಗಿವೆ. ಮತ್ತೊಂದೆಡೆ, 2025ರ ಆಗಸ್ಟ್ನಲ್ಲಿ ಚೀನಾದ ಶೇ 24ರಷ್ಟು ಅಧ್ಯಯನ ಪರವಾನಗಿ ಅರ್ಜಿಗಳನ್ನು ಮಾತ್ರ ತಿರಸ್ಕರಿಸಲಾಗಿದೆ.
ಅಧ್ಯಯನ ಪರವಾನಗಿಗಳಿಗಾಗಿ ಅರ್ಜಿ ಸಲ್ಲಿಸುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿಯೂ ಗಣನೀಯ ಇಳಿಕೆಯಾಗಿದೆ. 2023ರ ಆಗಸ್ಟ್ನಲ್ಲಿ 20,900 ಇದ್ದ ಈ ಸಂಖ್ಯೆ, 2025ರ ಆಗಸ್ಟ್ಗೆ 4,515ಕ್ಕೆ ಕುಸಿದಿದೆ ಎಂದು ಅಂಕಿ-ಅಂಶಗಳು ತೋರಿಸಿವೆ.
ಭಾರತೀಯ ರಾಯಭಾರ ಕಚೇರಿಯ ಹೇಳಿಕೆ
ಹಲವು ವರ್ಷಗಳಿಂದ ಕೆನಡಾಗೆ ಭಾರತವೇ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಪ್ರಮುಖ ಮೂಲವಾಗಿದೆ. ಭಾರತೀಯ ವಿದ್ಯಾರ್ಥಿಗಳ ಅರ್ಜಿಗಳ ಹೆಚ್ಚಿದ ನಿರಾಕರಣೆ ದರದ ಬಗ್ಗೆ ತಿಳಿದಿರುವುದಾಗಿ ಒಟ್ಟಾವಾದಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಹೇಳಿದೆ. ಆದರೆ ಪರವಾನಗಿಗಳ ವಿತರಣೆಯು ಸಂಪೂರ್ಣವಾಗಿ ಕೆನಡಾದ ಅಧಿಕಾರ ವ್ಯಾಪ್ತಿಯಲ್ಲಿದೆ ಎಂದೂ ಸ್ಪಷ್ಟಪಡಿಸಿದೆ.
“ವಿಶ್ವದ ಅತ್ಯುತ್ತಮ ಗುಣಮಟ್ಟದ ವಿದ್ಯಾರ್ಥಿಗಳಲ್ಲಿ ಕೆಲವರು ಭಾರತದವರಾಗಿದ್ದು, ಈ ವಿದ್ಯಾರ್ಥಿಗಳ ಪ್ರತಿಭೆ ಮತ್ತು ಶೈಕ್ಷಣಿಕ ಉತ್ಕೃಷ್ಟತೆಯಿಂದ ಕೆನಡಾದ ಸಂಸ್ಥೆಗಳು ಹಿಂದೆ ಸಾಕಷ್ಟು ಪ್ರಯೋಜನವನ್ನು ಪಡೆದಿವೆ” ಎಂದು ಅದು ರಾಯಿಟರ್ಸ್ಗೆ ನೀಡಿದ ಹೇಳಿಕೆಯಲ್ಲಿ ತಿಳಿಸಿದೆ.
ಮಾಜಿ ಪ್ರಧಾನಮಂತ್ರಿ ಜಸ್ಟಿನ್ ಟ್ರೂಡೊ ನೇತೃತ್ವದ ಆಡಳಿತಾವಧಿಯಲ್ಲಿ ಒಂದು ವರ್ಷಕ್ಕೂ ಹೆಚ್ಚು ಕಾಲದ ರಾಜತಾಂತ್ರಿಕ ಬಿಕ್ಕಟ್ಟಿನ ನಂತರ ನವದೆಹಲಿ ಮತ್ತು ಒಟ್ಟಾವಾ ಸಂಬಂಧಗಳನ್ನು ಸುಧಾರಿಸಲು ಪ್ರಯತ್ನಿಸುತ್ತಿರುವ ಹಿನ್ನೆಲೆಯಲ್ಲಿ ಈ ಹೆಚ್ಚಿನ ನಿರಾಕರಣೆ ದರ ಕಂಡುಬಂದಿದೆ.
ಅರ್ಜಿಗಳ ತಿರಸ್ಕಾರಕ್ಕೆ ಕಾರಣವೇನು?
ಕೆನಡಾ ಏಕೆ ಇಷ್ಟು ಭಾರತೀಯ ಅರ್ಜಿಗಳನ್ನು ತಿರಸ್ಕರಿಸುತ್ತಿದೆ? ವಲಸೆ ವಿಭಾಗವು ಸುದ್ದಿ ಸಂಸ್ಥೆಗೆ ತಿಳಿಸಿದಂತೆ, 2023ರಲ್ಲಿ ಕೆನಡಾದ ಅಧಿಕಾರಿಗಳು ಸುಮಾರು 1,550 ಅಧ್ಯಯನ ಪರವಾನಗಿ ಅರ್ಜಿಗಳಲ್ಲಿ ನಕಲಿ ಸ್ವೀಕಾರ ಪತ್ರಗಳು ಸೇರಿರುವುದನ್ನು ಪತ್ತೆಹಚ್ಚಿದ್ದು, ಅವುಗಳಲ್ಲಿ ಹೆಚ್ಚಿನವು ಭಾರತಕ್ಕೆ ಸಂಬಂಧಿಸಿದ್ದವು. ಕಳೆದ ವರ್ಷ ಸ್ವೀಕರಿಸಿದ ಅರ್ಜಿಗಳಿಂದ 14,000ಕ್ಕೂ ಹೆಚ್ಚು ನಕಲಿ ಸ್ವೀಕಾರ ಪತ್ರಗಳನ್ನು ಹೊಸ, ಸುಧಾರಿತ ಪರಿಶೀಲನಾ ವ್ಯವಸ್ಥೆಯು ಗುರುತಿಸಿದೆ ಎಂದು ಅದು ಹೇಳಿದೆ.
ಈ ಹಿನ್ನೆಲೆಯಲ್ಲಿ, ಕೆನಡಾವು ಈಗ ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳಿಗಾಗಿ ತನ್ನ ಪರಿಶೀಲನಾ ಪ್ರಕ್ರಿಯೆಯನ್ನು ಬಿಗಿಗೊಳಿಸಿದೆ ಮತ್ತು ಅರ್ಜಿದಾರರಿಗೆ ಬೇಕಾದ ಆರ್ಥಿಕ ಅವಶ್ಯಕತೆಗಳನ್ನು ಹೆಚ್ಚಿಸಿದೆ ಎಂದು ಇಲಾಖೆಯ ವಕ್ತಾರರು ಸ್ಪಷ್ಟಪಡಿಸಿದ್ದಾರೆ.
ಕೆನಡಾದ ವಿದೇಶಾಂಗ ವ್ಯವಹಾರಗಳ ಸಚಿವೆ ಅನಿತಾ ಆನಂದ್ ಅವರು ಕಳೆದ ತಿಂಗಳು ಭಾರತಕ್ಕೆ ಭೇಟಿ ನೀಡಿದ್ದಾಗ, ತನ್ನ ವಲಸೆ ವ್ಯವಸ್ಥೆಯ ಸಮಗ್ರತೆಯನ್ನು ರಕ್ಷಿಸುವತ್ತ ಒಟ್ಟಾವಾ ಗಮನಹರಿಸಿದರೂ, ದೇಶದಲ್ಲಿ ಭಾರತೀಯ ವಿದ್ಯಾರ್ಥಿಗಳು ಅಧ್ಯಯನ ಮಾಡುವುದನ್ನು ಮುಂದುವರಿಸುವ ಗುರಿಯನ್ನು ಹೊಂದಿದೆ ಎಂದು ಸುದ್ದಿ ಸಂಸ್ಥೆಗೆ ತಿಳಿಸಿದರು.