ಚೆನ್ನೈ: ಜವಾಬ್ದಾರಿಯುತ ಸಾಕುಪ್ರಾಣಿ ಪಾಲನೆಯನ್ನು ಉತ್ತೇಜಿಸಲು ಮತ್ತು ನಗರದ ನೈರ್ಮಲ್ಯವನ್ನು ಕಾಪಾಡಲು, ಗ್ರೇಟರ್ ಚೆನ್ನೈ ಕಾರ್ಪೊರೇಷನ್ (GCC) ನವೆಂಬರ್ 24 ರಿಂದ ಜಾರಿಗೆ ಬರುವಂತೆ ಹೊಸ ಕಠಿಣ ನಿಯಮಗಳನ್ನು ಘೋಷಿಸಿದೆ. ಈ ನಿಯಮಗಳು ದೇಶದಲ್ಲಿಯೇ ಪ್ರಾಣಿ ಪಾಲನೆಗೆ ಹೊಸ ಮಾನದಂಡವನ್ನು ಸ್ಥಾಪಿಸುವ ನಿರೀಕ್ಷೆಯಿದೆ.
ಇನ್ನುಮುಂದೆ ಚೆನ್ನೈನಲ್ಲಿ ಸಾಕುಪ್ರಾಣಿಗಳನ್ನು (ನಾಯಿಗಳು ಮತ್ತು ಬೆಕ್ಕುಗಳು) ಸಾಕಲು ಪರವಾನಗಿ ಪಡೆಯುವುದು ಕಡ್ಡಾಯವಾಗಿದೆ. ನಿಯಮ ಉಲ್ಲಂಘಿಸಿದರೆ ₹5,000ರವರೆಗೆ ದಂಡ ವಿಧಿಸುವುದಾಗಿ ಗ್ರೇಟರ್ ಚೆನ್ನೈ ಕಾರ್ಪೊರೇಷನ್ ಮೂಲಗಳು ತಿಳಿಸಿವೆ.
ಮೂಲಗಳ ಪ್ರಕಾರ, ಎಲ್ಲಾ ಸಾಕುಪ್ರಾಣಿಗಳು ಪರವಾನಗಿ ಪಡೆದಿರಬೇಕು, ಲಸಿಕೆ ಹಾಕಿಸಿರಬೇಕು ಮತ್ತು ಮೈಕ್ರೋಚಿಪ್ ಅಳವಡಿಸಿರಬೇಕು. ಪರವಾನಗಿ ಇಲ್ಲದಿದ್ದರೆ ₹5,000 ದಂಡ ವಿಧಿಸಲಾಗುತ್ತದೆ. ಸಾರ್ವಜನಿಕ ಸ್ಥಳಗಳಲ್ಲಿ ಪ್ರಾಣಿಗಳಿಗೆ ಲೀಶ್ (ಬೆಲ್ಟ್) ಹಾಕುವುದು ಮತ್ತು ಕೆಲವು ತಳಿಗಳಿಗೆ ಮಜಲ್ (ಬಾಯಿ ಮುಚ್ಚಳ) ಹಾಕುವುದು ಕಡ್ಡಾಯವಾಗಿದ್ದು, ಪಬ್ಲಿಕ್ನಲ್ಲಿ ಲೀಶ್/ಮಜಲ್ ಇಲ್ಲದಿದ್ದರೆ ₹500 ದಂಡ ವಿಧಿಸಲಾಗುತ್ತದೆ. ಸಾರ್ವಜನಿಕ ಸ್ಥಳಗಳಲ್ಲಿ ಸಾಕುಪ್ರಾಣಿಗಳ ತ್ಯಾಜ್ಯವನ್ನು (ಮಲ) ಮಾಲೀಕರೇ ಸ್ವಚ್ಛಗೊಳಿಸಬೇಕು. ತ್ಯಾಜ್ಯ ಸ್ವಚ್ಛ ಮಾಡದಿದ್ದರೂ ₹500 ದಂಡ ವಿಧಿಸಲಾಗುತ್ತದೆ.
GCC ಈಗಾಗಲೇ ಈ ನಿಯಮಗಳಿಗೆ ಬೇಕಾದ ಪರವಾನಗಿ ನೋಂದಣಿಯನ್ನು ಆನ್ಲೈನ್ನಲ್ಲಿ ಪ್ರಾರಂಭಿಸಿದೆ. ಅಲ್ಲದೆ, ಪಾಲನೆಯನ್ನು ಉತ್ತೇಜಿಸಲು ಉಚಿತ ಮೈಕ್ರೋಚಿಪ್ಪಿಂಗ್ ಸೇವೆಗಳನ್ನು ಸಹ ಒದಗಿಸುತ್ತಿದೆ.
