ಲಖನೌ: ಒಂದು ಕಾಲದಲ್ಲಿ ನಿವೃತ್ತ ಆರೋಗ್ಯ ಇಲಾಖೆಯ ಅಧಿಕಾರಿಯೊಬ್ಬರ ಮಗಳಾಗಿ, ವೈದ್ಯೆಯಾಗುವ ಕನಸು ಈಡೇರಿಸಿಕೊಂಡಿದ್ದ ಹಾಗೂ ತನ್ನ ಕೆಲಸದಲ್ಲಿ ‘ಶ್ರದ್ಧಾವಂತ’ಳು ಎಂದು ಹೆಸರು ಪಡೆದಿದ್ದ ಮಹಿಳೆ, ಇದೀಗ ಫರಿದಾಬಾದ್ನಲ್ಲಿ ಭೇದಿಸಲಾದ ಭಯೋತ್ಪಾದಕ ಜಾಲದ ಪ್ರಮುಖ ಆರೋಪಿಯಾಗಿದ್ದಾಳೆ. 43 ವರ್ಷ ವಯಸ್ಸಿನ ಈ ಡಾ. ಶಾಹೀನ್ ಶಾಹಿದ್ನ ಬಂಧನವು ಇಡೀ ಪ್ರಕರಣಕ್ಕೆ ಹೊಸ ತಿರುವು ನೀಡಿದೆ.
ಈ ಜಾಲವು ಸೋಮವಾರ ನವದೆಹಲಿಯ ಕೆಂಪುಕೋಟೆಯ ಬಳಿ ನಡೆದ ಕಾರು ಸ್ಫೋಟದೊಂದಿಗೆ ಸಂಪರ್ಕ ಹೊಂದಿರುವ ಶಂಕೆ ವ್ಯಕ್ತವಾಗಿದೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.
ಉತ್ತರ ಪ್ರದೇಶದ ಕಾನ್ಪುರದಲ್ಲಿ ಈ ಹಿಂದೆ ವೈದ್ಯೆಯಾಗಿ ಕಾರ್ಯನಿರ್ವಹಿಸಿದ್ದ ಶಾಹೀನ್ ಶಾಹಿದ್, ಫರಿದಾಬಾದ್ನಲ್ಲಿ ಅಂತರರಾಜ್ಯ ಉಗ್ರರ ಜಾಲವನ್ನು ಭೇದಿಸಿದಾಗ ಬಂಧಿತರಾದವರಲ್ಲಿ ಒಬ್ಬಳು. ಆಕೆಯ ಹೆಸರಿನಲ್ಲಿ ಎಕೆ ಕ್ರಿಂಕೋವ್ ಅಸಾಲ್ಟ್ ರೈಫಲ್, ಮೂರು ಮ್ಯಾಗಜೀನ್ಗಳು, ಜೀವಂತ ಗುಂಡುಗಳನ್ನು ಹೊಂದಿರುವ ಪಿಸ್ತೂಲ್ ಮತ್ತು ಎರಡು ಖಾಲಿ ಕಾರ್ಟ್ರಿಡ್ಜ್ಗಳು ಪತ್ತೆಯಾಗಿವೆ ಎಂದು ವರದಿಯಾಗಿದೆ. ಈ ಉಗ್ರ ಜಾಲ ಮತ್ತು ನವದೆಹಲಿಯಲ್ಲಿ ಕನಿಷ್ಠ 10 ಜನರ ಸಾವಿಗೆ ಕಾರಣವಾದ ಕಾರು ಸ್ಫೋಟದ ನಡುವೆ ಕೊಂಡಿ ಇರುವುದು ಪತ್ತೆಯಾದ ನಂತರ ಪ್ರಕರಣದ ವ್ಯಾಪ್ತಿ ವಿಸ್ತೃತಗೊಂಡಿದೆ.
ಭಯೋತ್ಪಾದಕ ಜಾಲದ ಮತ್ತೊಬ್ಬ ಪ್ರಮುಖ ಆರೋಪಿ ಡಾ. ಮುಜಮ್ಮಿಲ್ ಅಹ್ಮದ್ ಗನಾಯ್ ಅವರೊಂದಿಗೆ ಶಾಹೀನ್ ಫರಿದಾಬಾದ್ನಲ್ಲಿ ವಾಸವಾಗಿದ್ದರು. ಕಾರ್ ಸ್ಫೋಟ ನಡೆಸಿದ ಹ್ಯುಂಡೈ ಐ20 ಕಾರನ್ನು ಓಡಿಸುತ್ತಿದ್ದ ಉಮರ್ ಉನ್-ನಬಿ, ಅವರ ಆಪ್ತ ಸಹಾಯಕ ಮುಜಮ್ಮಿಲ್ ಆಗಿದ್ದ ಎಂಬುದು ಗಮನಾರ್ಹ. ಉತ್ತರ ಪ್ರದೇಶದ ಭಯೋತ್ಪಾದನಾ ನಿಗ್ರಹ ದಳ (ATS) ಪ್ರಕಾರ, ಶಾಹೀನ್ ಮತ್ತು ಮುಜಮ್ಮಿಲ್ ಸಂಬಂಧ ಹೊಂದಿದ್ದರು ಮತ್ತು ಲಖನೌ ವೈದ್ಯೆಯ ಸಹೋದರ ಪರ್ವೇಜ್ ಕೂಡ ಭಯೋತ್ಪಾದಕ ಜಾಲದ ಸಂಬಂಧ ಬಂಧಿತರಾಗಿದ್ದಾರೆ.
