ಬಾಂಗ್ಲಾದೇಶದ ಮಾಜಿ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಸೋಮವಾರ ದೇಶದ ಅಂತಾರಾಷ್ಟ್ರೀಯ ಅಪರಾಧಗಳ ನ್ಯಾಯಮಂಡಳಿ (ICT-BD) ಯು ‘ಮಾನವೀಯತೆಯ ವಿರುದ್ಧದ ಅಪರಾಧ’ ಎಸಗಿದ ಆರೋಪದಡಿ ದೋಷಿ ಎಂದು ಘೋಷಿಸಿದೆ. ಕಳೆದ ವರ್ಷ ಅವರ ಆವಾಮಿ ಲೀಗ್ ಸರ್ಕಾರವನ್ನು ಪತನಗೊಳಿಸಿದ ವಿದ್ಯಾರ್ಥಿ-ನೇತೃತ್ವದ ಆಂದೋಲನದ ಸಂದರ್ಭದಲ್ಲಿ ನಡೆದ ಅಪರಾಧಗಳಿಗೆ ಸಂಬಂಧಿಸಿದಂತೆ ಈ ತೀರ್ಪು ಬಂದಿದೆ. ನ್ಯಾಯಮಂಡಳಿಯು ಹಸೀನಾ ಅವರ ಅನುಪಸ್ಥಿತಿಯಲ್ಲಿ ವಿಚಾರಣೆ ನಡೆಸಿದ್ದು, ಅಂತಿಮ ಶಿಕ್ಷೆಯ ತೀರ್ಪನ್ನು ಶೀಘ್ರದಲ್ಲೇ ಪ್ರಕಟಿಸುವ ನಿರೀಕ್ಷೆಯಿದೆ.
ಆಗಸ್ಟ್ 2024 ರಿಂದ ಭಾರತದಲ್ಲಿರುವ 78 ವರ್ಷದ ಶೇಖ್ ಹಸೀನಾ ಅವರು ತಮ್ಮ ವಿರುದ್ಧದ ಎಲ್ಲಾ ಆರೋಪಗಳನ್ನು ತಿರಸ್ಕರಿಸಿದ್ದಾರೆ. ಈ ಎಲ್ಲಾ ಆರೋಪಗಳು ಕಟ್ಟುಕಥೆ ಎಂದು ಬಣ್ಣಿಸಿರುವ ಅವರು, ವಕೀಲರನ್ನು ನೇಮಿಸಿಕೊಳ್ಳಲು ನಿರಾಕರಿಸಿದ್ದಾರೆ. ಈ ನ್ಯಾಯಮಂಡಳಿಯನ್ನು “ಕಂಗಾರೂ ನ್ಯಾಯಾಲಯ” ಎಂದು ಕರೆದಿರುವ ಅವರು, ಯುದ್ಧಾಪರಾಧಗಳ ವಿಚಾರಣೆಗೆ ಸಂಬಂಧಿಸಿದ 1973ರ ಕಾನೂನನ್ನು ನ್ಯಾಯಮಂಡಳಿ ಉಲ್ಲಂಘಿಸಿದೆ ಎಂದು ಆರೋಪಿಸಿದ್ದಾರೆ.
ಹಿಂಸಾಚಾರದ ಹೊಣೆಯನ್ನು ಮಧ್ಯಂತರ ಸರ್ಕಾರದ ಮುಖ್ಯಸ್ಥರಾದ ಡಾ. ಮುಹಮ್ಮದ್ ಯೂನುಸ್ ಅವರ ಮೇಲೆ ಹೊರಿಸಿರುವ ಹಸೀನಾ, “ಯಾವುದೇ ಕೊಲೆಗೆ ಆದೇಶ ನೀಡಿದ್ದು ನಾನಲ್ಲ, ಆ ಆದೇಶಗಳು ಡಾ. ಮುಹಮ್ಮದ್ ಯೂನುಸ್ ಅವರಿಂದ ಬಂದಿವೆ,” ಎಂದು ಹೇಳಿದ್ದಾರೆ.
ಈ ತೀರ್ಪಿಗೆ ತೀವ್ರವಾಗಿ ಪ್ರತಿಕ್ರಿಯಿಸಿದ ಆವಾಮಿ ಲೀಗ್ ಪಕ್ಷವು ಇದನ್ನು ರಾಜಕೀಯ ಪ್ರೇರಿತ ವಿಚಾರಣೆ ಎಂದು ಕರೆದು, ಸೋಮವಾರ ದೇಶಾದ್ಯಂತ ಸಂಪೂರ್ಣ ಬಂದ್ಗೆ ಕರೆ ನೀಡಿದೆ. ಭಾನುವಾರದಂದು ಪಕ್ಷವು ಹಸೀನಾ ಅವರ ಭಾವನಾತ್ಮಕ ಆಡಿಯೊ ಸಂದೇಶವನ್ನು ಬಿಡುಗಡೆ ಮಾಡಿದ್ದು, ತಮ್ಮ ಬೆಂಬಲಿಗರಿಗೆ ಪ್ರತಿಭಟನೆಗಳನ್ನು ಮುಂದುವರಿಸಲು ಅವರು ಕರೆ ನೀಡಿದ್ದಾರೆ.
“ಭಯಪಡಲು ಏನೂ ಇಲ್ಲ. ನಾನು ಜೀವಂತವಾಗಿದ್ದೇನೆ. ನಾನು ಬದುಕುತ್ತೇನೆ. ನಾನು ದೇಶದ ಜನರನ್ನು ಬೆಂಬಲಿಸುತ್ತೇನೆ,” ಎಂದು ಹೇಳಿದ ಅವರು, “ಈ ಆವಾಮಿ ಲೀಗ್ ಜನರ ಮಣ್ಣಿನಿಂದ ನಿರ್ಮಾಣವಾಗಿದೆ, ಅದರ ಬೇರುಗಳು ಬಹಳ ಆಳವಾಗಿವೆ,” ಎಂದು ಪಕ್ಷದ ಬಲವನ್ನು ಪ್ರತಿಪಾದಿಸಿದ್ದಾರೆ.
ತೀರ್ಪಿನ ಪ್ರಕಟಣೆಗೆ ಮುನ್ನ ರಾಜಧಾನಿ ಢಾಕಾ ನಗರದಲ್ಲಿ ಭದ್ರತೆಯನ್ನು ತೀವ್ರಗೊಳಿಸಲಾಗಿದ್ದು, ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ. ಭಾನುವಾರ ರಾತ್ರಿ 9 ಗಂಟೆ ಸುಮಾರಿಗೆ ಮಧ್ಯಂತರ ಸರ್ಕಾರದ ಸಲಹೆಗಾರರಾದ ಸೈಯದಾ ರಿಜ್ವಾನಾ ಹಸನ್ ಅವರ ನಿವಾಸದ ಹೊರಗೆ ಎರಡು ಕಚ್ಚಾ ಬಾಂಬ್ಗಳು ಸ್ಫೋಟಗೊಂಡಿವೆ. ಕಾರ್ವಾನ್ ಬಜಾರ್ ಪ್ರದೇಶದಲ್ಲಿಯೂ ಮತ್ತೊಂದು ಸ್ಫೋಟ ಸಂಭವಿಸಿದರೂ ಯಾವುದೇ ಸಾವು-ನೋವು ವರದಿಯಾಗಿಲ್ಲ. ಪರಿಸ್ಥಿತಿ ಹದಗೆಡದಂತೆ ತಡೆಯಲು, ಢಾಕಾ ಪೊಲೀಸರು ಹಿಂಸಾತ್ಮಕ ಪ್ರತಿಭಟನಾಕಾರರ ವಿರುದ್ಧ ಕಂಡಲ್ಲಿ ಗುಂಡು ಹಾರಿಸುವ ಆದೇಶವನ್ನು ಹೊರಡಿಸಿ, ಉನ್ನತ ಮಟ್ಟದ ಎಚ್ಚರಿಕೆ ವಹಿಸಿದ್ದಾರೆ.
