ಜನಪ್ರಿಯ ಪ್ರಾಡಕ್ಟ್ ಅನಾಲಿಟಿಕ್ಸ್ ಸೇವಾ ಪೂರೈಕೆದಾರ ಸಂಸ್ಥೆಯಾದ ‘ಮಿಕ್ಸ್ಪ್ಯಾನಲ್’ (Mixpanel) ನಲ್ಲಿ ಭಾರಿ ಡೇಟಾ ಉಲ್ಲಂಘನೆ (Data Breach) ಸಂಭವಿಸಿದ್ದು, ಕೃತಕ ಬುದ್ಧಿಮತ್ತೆ ಕ್ಷೇತ್ರದ ದಿಗ್ಗಜ ಸಂಸ್ಥೆ ಓಪನ್ಎಐ (OpenAI) ಗ್ರಾಹಕರ ಖಾಸಗಿ ಮಾಹಿತಿಗಳು ಸೋರಿಕೆಯಾಗಿವೆ.
ಈ ತಿಂಗಳ ಆರಂಭದಲ್ಲಿ ಈ ಘಟನೆ ನಡೆದಿದ್ದರೂ, ಇದೀಗ ವಿವರಗಳು ಆನ್ಲೈನ್ನಲ್ಲಿ ಬಹಿರಂಗಗೊಂಡಿವೆ. ನವೆಂಬರ್ 9 ರಂದು ಅನಧಿಕೃತ ವ್ಯಕ್ತಿಗಳು ಮಿಕ್ಸ್ಪ್ಯಾನಲ್ನ ಪ್ರಮುಖ ಡೇಟಾಸೆಟ್ ಅನ್ನು ಪ್ರವೇಶಿಸಿದ್ದು, ಇದರಿಂದ ಓಪನ್ಎಐ ಸೇರಿದಂತೆ ಹಲವು ಗ್ರಾಹಕರ ಸೂಕ್ಷ್ಮ ಮಾಹಿತಿಗಳು ಹ್ಯಾಕರ್ಗಳ ಪಾಲಾಗಿವೆ.
ಸೋರಿಕೆಯಾದ ದತ್ತಾಂಶದಲ್ಲಿ ಓಪನ್ಎಐ ಗ್ರಾಹಕರ ಹೆಸರು, ಇಮೇಲ್ ಐಡಿಗಳು, ಅಂದಾಜು ಸ್ಥಳ (Location), ಬಳಸಿದ ಸಾಧನದ ಆಪರೇಟಿಂಗ್ ಸಿಸ್ಟಮ್, ಬ್ರೌಸರ್ ವಿವರಗಳು, ಬ್ರೌಸ್ ಮಾಡಿದ ವೆಬ್ಸೈಟ್ಗಳು ಮತ್ತು ಎಪಿಐ (API) ಖಾತೆಗಳಿಗೆ ಸಂಬಂಧಿಸಿದ ಸಂಸ್ಥೆ ಅಥವಾ ಬಳಕೆದಾರರ ಐಡಿಗಳು ಸೇರಿವೆ ಎಂದು ವರದಿಯಾಗಿದೆ.
ಮೈಕ್ರೋಸಾಫ್ಟ್ ಬೆಂಬಲಿತ ಓಪನ್ಎಐ ಸಂಸ್ಥೆಯು ತನ್ನ ಎಪಿಐ ಪ್ಲಾಟ್ಫಾರ್ಮ್ನಲ್ಲಿ ಬಳಕೆದಾರರ ನಡವಳಿಕೆಯನ್ನು ಟ್ರ್ಯಾಕ್ ಮಾಡಲು ಮತ್ತು ಸೇವೆಯನ್ನು ಸುಧಾರಿಸಲು ಮಿಕ್ಸ್ಪ್ಯಾನಲ್ ಅನಾಲಿಟಿಕ್ಸ್ ಅನ್ನು ಬಳಸುತ್ತಿತ್ತು. ಆದರೆ ಈ ಪ್ರಕ್ರಿಯೆಯಲ್ಲಿ ಇದೀಗ ಗ್ರಾಹಕರ ವೈಯಕ್ತಿಕ ವಿವರಗಳು ಸೋರಿಕೆ ಆಗಿವೆ.
ನವೆಂಬರ್ 25 ರಂದು ಮಿಕ್ಸ್ಪ್ಯಾನಲ್ ಈ ವಿಷಯವನ್ನು ಓಪನ್ಎಐ ಗಮನಕ್ಕೆ ತಂದಿದೆ. ತಕ್ಷಣವೇ ಎಚ್ಚೆತ್ತುಕೊಂಡ ಓಪನ್ಎಐ, ಬಾಧಿತ ಗ್ರಾಹಕರಿಗೆ ಇಮೇಲ್ ಮೂಲಕ ಮಾಹಿತಿ ರವಾನಿಸಿದೆ ಮತ್ತು ಮಿಕ್ಸ್ಪ್ಯಾನಲ್ ಜೊತೆಗಿನ ಒಪ್ಪಂದವನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ರದ್ದುಗೊಳಿಸಿದೆ.
“ನಂಬಿಕೆ, ಭದ್ರತೆ ಮತ್ತು ಗೌಪ್ಯತೆ ನಮ್ಮ ಉತ್ಪನ್ನಗಳ ಅಡಿಪಾಯವಾಗಿದೆ. ಈ ಘಟನೆಯನ್ನು ಪರಿಶೀಲಿಸಿದ ನಂತರ ಮಿಕ್ಸ್ಪ್ಯಾನಲ್ ಬಳಕೆಯನ್ನು ನಿಲ್ಲಿಸಲಾಗಿದೆ. ಅಲ್ಲದೆ, ನಮ್ಮ ಎಲ್ಲಾ ಪಾಲುದಾರರು ಮತ್ತು ಮಾರಾಟಗಾರರ (Vendors) ಭದ್ರತಾ ಮಾನದಂಡಗಳ ಬಗ್ಗೆ ಹೆಚ್ಚಿನ ಪರಿಶೀಲನೆ ನಡೆಸಲಾಗುತ್ತಿದೆ,” ಎಂದು ಓಪನ್ಎಐ ಸ್ಪಷ್ಟಪಡಿಸಿದೆ.
