ಟೆಕ್ ದೈತ್ಯ ಗೂಗಲ್ ತನ್ನ ಜನಪ್ರಿಯ ನ್ಯಾವಿಗೇಷನ್ ಅಪ್ಲಿಕೇಶನ್ ಆಗಿರುವ ‘ಗೂಗಲ್ ಮ್ಯಾಪ್ಸ್’ಗೆ (Google Maps) ಈಗ ತನ್ನದೇ ಆದ ಜೆಮಿನಿ ಎಐ (Gemini AI) ವೈಶಿಷ್ಟ್ಯಗಳನ್ನು ಅಳವಡಿಸಲು ಪ್ರಾರಂಭಿಸಿದೆ. ಈ ತಿಂಗಳ ಆರಂಭದಲ್ಲಿ ಘೋಷಿಸಿದಂತೆ, ಗೂಗಲ್ ಮ್ಯಾಪ್ಸ್ ಇನ್ಮುಂದೆ ಜೆಮಿನಿ ಆಧಾರಿತ ಧ್ವನಿ ಸಂವಹನ ಮತ್ತು ಮಾಹಿತಿ ಸಾಧನಗಳೊಂದಿಗೆ ಕಾರ್ಯನಿರ್ವಹಿಸಲಿದೆ.
ಈ ಹೊಸ ಅಪ್ಡೇಟ್ ಮೂಲಕ ಬಳಕೆದಾರರಿಗೆ ಸಂದರ್ಭೋಚಿತ ಸಹಾಯ (contextual assistance) ಮತ್ತು ಸುಧಾರಿತ ಧ್ವನಿ ವ್ಯವಸ್ಥೆಯನ್ನು ಒದಗಿಸಲಾಗುತ್ತಿದೆ. ಕಾರು, ಬೈಕ್ ಸವಾರಿ, ನಡಿಗೆ ಅಥವಾ ಸಾರ್ವಜನಿಕ ಸಾರಿಗೆ ಹೀಗೆ ಬಹು ಮಾದರಿಯ ನ್ಯಾವಿಗೇಷನ್ಗಳಲ್ಲಿ ಜೆಮಿನಿ ಸಹಾಯಕವಾಗಿ ಕೆಲಸ ಮಾಡಲಿದೆ.
ವಿಶೇಷವೆಂದರೆ, ಗೂಗಲ್ ಮ್ಯಾಪ್ಸ್ ಇನ್ಮುಂದೆ ಬಳಕೆದಾರರು ತಮ್ಮ ಗೂಗಲ್ ಖಾತೆಯಲ್ಲಿ ಈಗಾಗಲೇ ಆಯ್ಕೆ ಮಾಡಿಕೊಂಡಿರುವ ಭಾಷೆ ಮತ್ತು ಧ್ವನಿ ಸೆಟ್ಟಿಂಗ್ಗಳನ್ನೇ ಸ್ವಯಂಚಾಲಿತವಾಗಿ ಬಳಸಿಕೊಳ್ಳಲಿದೆ. ಈ ಬದಲಾವಣೆಯ ಸಂಕೇತವಾಗಿ, ಮ್ಯಾಪ್ಸ್ನಲ್ಲಿನ ಹಳೆಯ ಮೈಕ್ರೊಫೋನ್ ಐಕಾನ್ ಬದಲಿಗೆ ಜೆಮಿನಿ ಚಿಹ್ನೆಯನ್ನು ಅಳವಡಿಸಲಾಗಿದೆ.
ಆದರೂ, ಜೆಮಿನಿ ಸೇವೆ ಪಡೆಯಲು ಬಳಕೆದಾರರು ಎಂದಿನಂತೆ “ಹೇ ಗೂಗಲ್” (Hey Google) ಎಂಬ ಹಾಟ್ವರ್ಡ್ ಅನ್ನೇ ಬಳಸಬೇಕಾಗುತ್ತದೆ. ಒಮ್ಮೆ ಸಕ್ರಿಯಗೊಂಡ ನಂತರ, ಪ್ರಯಾಣದ ಮಾರ್ಗದಲ್ಲಿರುವ ಹೋಟೆಲ್ಗಳು, ಪಾರ್ಕಿಂಗ್ ಸ್ಥಳಗಳು, ಇವಿ ಚಾರ್ಜಿಂಗ್ ಪಾಯಿಂಟ್ಗಳು ಅಥವಾ ಪೆಟ್ರೋಲ್ ಬಂಕ್ಗಳ ಮಾಹಿತಿಯನ್ನು ಇದು ಕ್ಷಣಾರ್ಧದಲ್ಲಿ ನೀಡುತ್ತದೆ.
ಜೆಮಿನಿಯ ಮತ್ತೊಂದು ಪ್ರಮುಖ ವೈಶಿಷ್ಟ್ಯವೆಂದರೆ ಸಂಭಾಷಣೆಯ ಸಂದರ್ಭವನ್ನು ಅರ್ಥಮಾಡಿಕೊಳ್ಳುವುದು. ಉದಾಹರಣೆಗೆ, ಚಾಲಕನೊಬ್ಬ “ದಾರಿಯಲ್ಲಿ ಪೆಟ್ರೋಲ್ ಬಂಕ್ ಇದೆಯೇ?” ಎಂದು ಕೇಳಿದಾಗ, ಅದಕ್ಕೆ ಉತ್ತರ ಸಿಕ್ಕ ನಂತರ “ನನ್ನನ್ನು ಅಲ್ಲಿಗೆ ಕರೆದೊಯ್ಯಿ” (Take me there) ಎಂದು ಸರಳವಾಗಿ ಹೇಳಿದರೆ ಸಾಕು, ಎಐ ಅದನ್ನು ಗ್ರಹಿಸಿ ದಾರಿ ತೋರಿಸುತ್ತದೆ. ಪೂರ್ಣ ಪ್ರಶ್ನೆಯನ್ನು ಮತ್ತೆ ಕೇಳುವ ಅಗತ್ಯವಿರುವುದಿಲ್ಲ.
ಇದಲ್ಲದೆ, ಅಮೆರಿಕದಲ್ಲಿ ಸದ್ಯಕ್ಕೆ ಲ್ಯಾಂಡ್ಮಾರ್ಕ್ ಆಧಾರಿತ ನ್ಯಾವಿಗೇಷನ್ (ಉದಾಹರಣೆಗೆ: ಇಷ್ಟು ಮೀಟರ್ಗಳ ನಂತರ ಎನ್ನುವ ಬದಲು, ನಿರ್ದಿಷ್ಟ ಕಟ್ಟಡದ ಬಳಿ ತಿರುಗಿ ಎನ್ನುವುದು) ಮತ್ತು ಕ್ಯಾಮೆರಾ ಆಧಾರಿತ ‘ಲೆನ್ಸ್ ಇನ್ ಮ್ಯಾಪ್ಸ್’ ವೈಶಿಷ್ಟ್ಯಗಳನ್ನು ಪರಿಚಯಿಸಲಾಗಿದ್ದು, ಮುಂದಿನ ದಿನಗಳಲ್ಲಿ ಇದು ಎಲ್ಲೆಡೆ ಲಭ್ಯವಾಗುವ ನಿರೀಕ್ಷೆಯಿದೆ.
