ಯುರೋಪಿನ ಪ್ರಮುಖ ವಿಮಾನ ತಯಾರಕ ಸಂಸ್ಥೆ ಏರ್ಬಸ್, ತನ್ನ ಜನಪ್ರಿಯ A320 ಸರಣಿಯ ವಿಮಾನಗಳಲ್ಲಿ ತಾಂತ್ರಿಕ ದೋಷ ಸರಿಪಡಿಸಲು ತುರ್ತು ಆದೇಶ ಹೊರಡಿಸಿದ ಬೆನ್ನಲ್ಲೇ, ವಾರಾಂತ್ಯದಲ್ಲಿ ವಿಶ್ವದಾದ್ಯಂತ ವಿಮಾನ ಸಂಚಾರದಲ್ಲಿ ಭಾರೀ ವ್ಯತ್ಯಯ ಉಂಟಾಗುವ ಸಾಧ್ಯತೆಯಿದೆ. ತೀವ್ರ ಸೌರ ವಿಕಿರಣದಿಂದ (intense solar radiation) ವಿಮಾನದ ಹಾರಾಟ ನಿಯಂತ್ರಣಕ್ಕೆ (flight controls) ಸಂಬಂಧಿಸಿದ ದತ್ತಾಂಶಗಳು ದೋಷಪೂರಿತವಾಗುವ ಅಪಾಯವಿದ್ದು, ಇದನ್ನು ಸರಿಪಡಿಸಲು ಕೂಡಲೇ ಸಾಫ್ಟ್ವೇರ್ ಬದಲಾವಣೆ ಹಾಗೂ ಕೆಲವು ಕಡೆ ಹಾರ್ಡ್ವೇರ್ ತಪಾಸಣೆ ಅಗತ್ಯವಿದೆ ಎಂದು ಏರ್ಬಸ್ ತಿಳಿಸಿದೆ.
ಭಾರತದ ಪ್ರಮುಖ ವಿಮಾನಯಾನ ಸಂಸ್ಥೆಗಳಾದ ಇಂಡಿಗೋ ಮತ್ತು ಏರ್ ಇಂಡಿಯಾ ಈ ಆದೇಶದಿಂದ ಹೆಚ್ಚು ತೊಂದರೆಗೊಳಗಾಗಲಿವೆ. ಆರಂಭಿಕ ಅಂದಾಜಿನ ಪ್ರಕಾರ, ಭಾರತದಲ್ಲಿ ಸುಮಾರು 300ಕ್ಕೂ ಹೆಚ್ಚು ವಿಮಾನಗಳು ಈ ತುರ್ತು ತಪಾಸಣೆಗೆ ಒಳಪಡಲಿವೆ. ಬಾಧಿತ ವಿಮಾನಗಳು ತಮ್ಮ “ಮುಂದಿನ ಹಾರಾಟಕ್ಕೆ ಮುನ್ನವೇ” ಈ ದುರಸ್ತಿಯನ್ನು ಪೂರ್ಣಗೊಳಿಸಬೇಕಿರುವುದರಿಂದ, ಪ್ರತಿ ವಿಮಾನದ ತಪಾಸಣೆಗೆ ಕೆಲವು ಗಂಟೆಗಳ ಸಮಯ ಹಿಡಿಯಲಿದೆ. ಇಂಡಿಗೋ ಬಳಿ 370 ಹಾಗೂ ಏರ್ ಇಂಡಿಯಾ ಬಳಿ 127 A320 ಸರಣಿಯ ವಿಮಾನಗಳಿದ್ದು, ಇವುಗಳಲ್ಲಿ ಬಹುತೇಕ ವಿಮಾನಗಳಿಗೆ ಸಾಫ್ಟ್ವೇರ್ ಅಪ್ಡೇಟ್ ಅಗತ್ಯವಿರುವುದರಿಂದ ವಿಮಾನಗಳ ಹಾರಾಟದಲ್ಲಿ ವಿಳಂಬವಾಗುವ ಸಾಧ್ಯತೆಯಿದೆ.
ಇತ್ತೀಚೆಗೆ A320 ವಿಮಾನವೊಂದರಲ್ಲಿ ಎಲಿವೇಟರ್ ಐಲೆರಾನ್ ಕಂಪ್ಯೂಟರ್ (ELAC) ಅಸಮರ್ಪಕವಾಗಿ ಕಾರ್ಯನಿರ್ವಹಿಸಿದ ಪರಿಣಾಮ, ವಿಮಾನವು ಹಠಾತ್ ಕೆಳಮುಖವಾಗಿ (pitch down) ಹಾರಿದ ಘಟನೆ ವರದಿಯಾಗಿತ್ತು. ಈ ಹಿನ್ನೆಲೆಯಲ್ಲಿ, ಯುರೋಪಿಯನ್ ಯೂನಿಯನ್ ಏವಿಯೇಷನ್ ಸೇಫ್ಟಿ ಏಜೆನ್ಸಿ (EASA) ತುರ್ತು ನಿರ್ದೇಶನ ನೀಡಿದ್ದು, ಪ್ರಯಾಣಿಕರ ಸುರಕ್ಷತೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಈ ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳಲಾಗಿದೆ. ಈ ದೋಷವನ್ನು ಸರಿಪಡಿಸದಿದ್ದರೆ ವಿಮಾನದ ನಿಯಂತ್ರಣ ಕಳೆದುಕೊಳ್ಳುವ ಅಪಾಯವಿದೆ ಎಂದು ಎಚ್ಚರಿಸಲಾಗಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಇಂಡಿಗೋ ಮತ್ತು ಏರ್ ಇಂಡಿಯಾ ಸಂಸ್ಥೆಗಳು, “ನಾವು ಏರ್ಬಸ್ ಜೊತೆ ನಿಕಟವಾಗಿ ಕೆಲಸ ಮಾಡುತ್ತಿದ್ದು, ಅಗತ್ಯ ತಪಾಸಣೆಗಳನ್ನು ನಡೆಸುತ್ತಿದ್ದೇವೆ. ಇದರಿಂದ ಪ್ರಯಾಣಿಕರಿಗೆ ಆಗುವ ಅನಾನುಕೂಲತೆಗಾಗಿ ವಿಷಾದಿಸುತ್ತೇವೆ,” ಎಂದು ಏರ್ಲೈನ್ಸ್ ಪ್ರಕಟಣೆಯಲ್ಲಿ ತಿಳಿಸಿವೆ. ಟಾಟಾ ಸಮೂಹದ ಏರ್ ಇಂಡಿಯಾ ಎಕ್ಸ್ಪ್ರೆಸ್ ಕೂಡ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿದ್ದು, ಪ್ರಯಾಣಿಕರು ಸಹಕರಿಸುವಂತೆ ಕೋರಿದೆ.
