ನಟಿ ಸಮಂತಾ ಮತ್ತು ಚಲನಚಿತ್ರ ನಿರ್ಮಾಪಕ ರಾಜ್ ಅವರ ದೇವಸ್ಥಾನದ ಮದುವೆಯ ಸುಂದರ ಫೋಟೋಗಳು ಪ್ರಸ್ತುತ ಅಂತರ್ಜಾಲದಲ್ಲಿ ವೈರಲ್ ಆಗಿವೆ. ನವಜೋಡಿಯ ಸಂಭ್ರಮ ಒಂದೆಡೆಯಾದರೆ, ಅಭಿಮಾನಿಗಳ ಕಣ್ಣು ನೆಟ್ಟಿರುವುದು ಸಮಂತಾ ಧರಿಸಿರುವ ಆ ಬೃಹತ್ ಮದುವೆ ಉಂಗುರದ ಮೇಲೆ. ತಮ್ಮ ವಿಭಿನ್ನ ಹಾಗೂ ಬೋಲ್ಡ್ ಆಯ್ಕೆಗಳಿಗೆ ಹೆಸರಾಗಿರುವ ಸಮಂತಾ, ತಮ್ಮ ಮದುವೆ ಉಂಗುರದ ವಿಚಾರದಲ್ಲೂ ಅದೇ ಹಾದಿ ತುಳಿದಿದ್ದಾರೆ. ಸಾಂಪ್ರದಾಯಿಕ ವೆಡ್ಡಿಂಗ್ ಬ್ಯಾಂಡ್ ಅಥವಾ ದುಬಾರಿ ಸಾಲಿಟೇರ್ ಬದಲಿಗೆ, ಅತ್ಯಂತ ಆಕರ್ಷಕವಾದ ಮತ್ತು ಕಲಾತ್ಮಕವಾದ ವಿನ್ಯಾಸವನ್ನು ಅವರು ಆಯ್ಕೆ ಮಾಡಿಕೊಂಡಿದ್ದಾರೆ.
ಮೊದಲ ನೋಟಕ್ಕೆ ಸಮಂತಾ ಅವರ ಉಂಗುರವು ಜಿಯೋಮೆಟ್ರಿಕ್ (geometric) ವಿನ್ಯಾಸದಂತೆ ಮತ್ತು ಬೋಲ್ಡ್ ಆಗಿ ಕಾಣುತ್ತದೆ. ಆದರೆ ಇದರ ವಿನ್ಯಾಸದ ಹಿಂದೆ ಆಳವಾದ ಕಲಾಶ್ರೀಮಂತಿಕೆ ಇದೆ. ಸಮಂತಾ ಮತ್ತು ರಾಜ್ ಅವರ ಪ್ರೇಮಕಥೆಗೆ ಸಾಕ್ಷಿಯಾಗಿರುವ ಈ ಉಂಗುರ ಏಕೆ ವಿಶೇಷ ಎಂಬುದನ್ನು ಆಭರಣ ವಿನ್ಯಾಸಕರು ವಿಶ್ಲೇಷಿಸಿದ್ದಾರೆ.
ಏನಿದು ‘ಪೋರ್ಟ್ರೇಟ್ ಕಟ್’ ವಜ್ರ?
‘MISSHK Fine Jewellery’ಯ ಸ್ಥಾಪಕಿ ಹಫ್ಸಾ ಖುರೇಷಿ ಅವರ ಪ್ರಕಾರ, “ಇದು ಪೋರ್ಟ್ರೇಟ್-ಕಟ್ ವಜ್ರಗಳಿಂದ ಮಾಡಲ್ಪಟ್ಟಿದೆ. ಮಧ್ಯದಲ್ಲಿ ದೊಡ್ಡ ವಜ್ರವಿದ್ದು, ಅದರ ಸುತ್ತಲೂ ಹೂವಿನ ದಳಗಳಂತೆ ಚಿಕ್ಕ ವಜ್ರಗಳನ್ನು ಜೋಡಿಸಲಾಗಿದೆ. ಇವು ಕಸ್ಟಮ್-ಕಟ್ (ವಿಶೇಷವಾಗಿ ವಿನ್ಯಾಸಗೊಳಿಸಿದ) ವಜ್ರಗಳಾಗಿವೆ. ಕುಶಲಕರ್ಮಿಗಳಿಗೆ ಮೊದಲು ವಿನ್ಯಾಸವನ್ನು ತೋರಿಸಿ, ಅದಕ್ಕೆ ತಕ್ಕಂತೆ ವಜ್ರವನ್ನು ಕತ್ತರಿಸಲಾಗುತ್ತದೆ.” ಪೋರ್ಟ್ರೇಟ್-ಕಟ್ ವಜ್ರವು ಅತ್ಯಂತ ತೆಳುವಾದ, ಸಮತಟ್ಟಾದ ಮತ್ತು ಕನ್ನಡಿಯಂತೆ ಪಾರದರ್ಶಕವಾಗಿರುತ್ತದೆ. ವಜ್ರವನ್ನು ಒಡೆಯದಂತೆ ಅತ್ಯಂತ ತೆಳುವಾಗಿ ಸೀಳುವ ಕೌಶಲ್ಯ ಕೆಲವೇ ಕೆಲವು ಪರಿಣಿತರಿಗೆ ಮಾತ್ರ ಇರುತ್ತದೆ.
ವಿಶ್ವದ ಕೆಲವೇ ತಜ್ಞರಿಂದ ತಯಾರಿಕೆ
ಆಭರಣ ತಜ್ಞ ಪ್ರಿಯಾಂಶು ಗೋಯೆಲ್ ಅವರು ತಮ್ಮ ಇನ್ಸ್ಟಾಗ್ರಾಮ್ ರೀಲ್ನಲ್ಲಿ ಮಾತನಾಡುತ್ತಾ, “ಉಂಗುರದ ಕೇಂದ್ರದಲ್ಲಿ ಸುಮಾರು 2 ಕ್ಯಾರೆಟ್ನ ಲೋಜೆಂಜ್ ಪೋರ್ಟ್ರೇಟ್-ಕಟ್ ವಜ್ರವಿದೆ. ಇದರ ಸುತ್ತಲೂ ಎಂಟು ಕಸ್ಟಮ್ ವಜ್ರಗಳು ದಳಗಳಂತೆ ಕುಳಿತಿವೆ. ಇದು ಕೈಗೆ ಸರಳವಾಗಿ ಕಂಡರೂ, ಇದರ ಹಿಂದಿನ ಇಂಜಿನಿಯರಿಂಗ್ ಅತ್ಯಂತ ಸಂಕೀರ್ಣವಾಗಿದೆ. ವಿಶ್ವದ ಕೆಲವೇ ಕೆಲವು ಕಾರ್ಯಾಗಾರಗಳಲ್ಲಿ ಮಾತ್ರ ಇಂತಹ ಉನ್ನತ ಮಟ್ಟದ ವಿನ್ಯಾಸ ಮಾಡಲು ಸಾಧ್ಯ” ಎಂದು ತಿಳಿಸಿದ್ದಾರೆ. ಸಮಂತಾ ಅವರು ಫೆಬ್ರವರಿಯಲ್ಲಿಯೇ ತಮ್ಮ ಇನ್ಸ್ಟಾಗ್ರಾಮ್ ಪೋಸ್ಟ್ ಮೂಲಕ ಈ ಉಂಗುರದ ಝಲಕ್ ತೋರಿಸಿದ್ದರು.
ಆರ್ಟ್ ಡೆಕೊ ಕಾಲಘಟ್ಟದ ಸ್ಫೂರ್ತಿ
ಈ ಉಂಗುರವು ‘ಆರ್ಟ್ ಡೆಕೊ’ (Art Deco) ಯುಗದಿಂದ ಸ್ಫೂರ್ತಿ ಪಡೆದಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ನೆಗೆಟಿವ್ ಸ್ಪೇಸ್ ಮತ್ತು ಸಿಮೆಟ್ರಿಯನ್ನು ಬಳಸಿ ಇದನ್ನು ತಯಾರಿಸಲಾಗಿದೆ. ಈ ವಜ್ರಗಳನ್ನು ಭದ್ರವಾಗಿ ಹಿಡಿದಿಡಲು ಬಿಳಿ ಚಿನ್ನ ಅಥವಾ ಪ್ಲಾಟಿನಂ ಅನ್ನು ಬಳಸಲಾಗುತ್ತದೆ ಎಂದು ಹಫ್ಸಾ ಹೇಳುತ್ತಾರೆ. ಐತಿಹಾಸಿಕವಾಗಿ, ಮೊಘಲ್ ಮತ್ತು ನಿಜಾಮಿ ಆಭರಣಗಳಲ್ಲಿ ಇಂತಹ ಪ್ಲಾಟಿನಂ-ಕಟ್ ವಜ್ರಗಳ ಬಳಕೆ ಕಂಡುಬರುತ್ತಿತ್ತು.
