ಬೆಂಗಳೂರು: ಆಧುನಿಕ ಯುಗದಲ್ಲಿ ತಂತ್ರಜ್ಞಾನ ಎಷ್ಟೇ ಮುಂದುವರೆದಿದ್ದರೂ, ಅದರ ಅಜಾಗರೂಕ ಬಳಕೆಯು ಎಂತಹ ವಿಪತ್ತನ್ನು ತಂದೊಡ್ಡಬಲ್ಲದು ಎನ್ನುವುದಕ್ಕೆ ರಾಜ್ಯದಲ್ಲಿ ನಡೆದಿರುವ ಬೆಚ್ಚಿಬೀಳಿಸುವ ಘಟನೆಯೊಂದು ಸಾಕ್ಷಿಯಾಗಿದೆ. ಕೇವಲ ಸಮಯ ಕಳೆಯಲು ಅಥವಾ ಹೊಸ ಸ್ನೇಹಿತರನ್ನು ಹುಡುಕಲು ಬಳಸುವ ‘ಡೇಟಿಂಗ್ ಆಪ್’ಗಳು (Dating Apps) ಈಗ ಮಾರಕ ಎಚ್ಐವಿ (HIV) ಸೋಂಕು ಹರಡುವ ತಾಣಗಳಾಗಿ ಮಾರ್ಪಡುತ್ತಿವೆಯೇ ಎಂಬ ಆತಂಕ ಶುರುವಾಗಿದೆ.
ರಾಜ್ಯದ ಏಡ್ಸ್ ಪ್ರಿವೆನ್ಷನ್ ಸೊಸೈಟಿಯು (AIDS Prevention Society) ಆಘಾತಕಾರಿ ಸತ್ಯವೊಂದನ್ನು ಬಯಲಿಗೆಳೆದಿದೆ. ರಾಜ್ಯದ ಇಬ್ಬರು ಯುವ ಕಾಲೇಜು ವಿದ್ಯಾರ್ಥಿಗಳಿಗೆ ಎಚ್ಐವಿ ಪಾಸಿಟಿವ್ ದೃಢಪಟ್ಟಿದ್ದು, ಇದಕ್ಕೆ ಪ್ರಮುಖ ಕಾರಣ ‘ಡೇಟಿಂಗ್ ಆಪ್’ ಎನ್ನಲಾಗಿದೆ. 21 ವರ್ಷದ ಈ ಇಬ್ಬರು ವಿದ್ಯಾರ್ಥಿಗಳು ಡೇಟಿಂಗ್ ಆಪ್ ಮೂಲಕ ಪರಿಚಯವಾದ ಮಹಿಳೆಯೊಬ್ಬರ ಸಂಪರ್ಕ ಬೆಳೆಸಿದ್ದರು.
ವರದಿಗಳ ಪ್ರಕಾರ, ಡೇಟಿಂಗ್ ಆಪ್ ಮೂಲಕ ಉಂಟಾದ ಪರಿಚಯವು ಸಲುಗೆಗೆ ತಿರುಗಿ, ಅಂತಿಮವಾಗಿ ಮಹಿಳೆಯೊಂದಿಗೆ ಅಸುರಕ್ಷಿತ ಲೈಂಗಿಕ ಸಂಪರ್ಕಕ್ಕೆ ದಾರಿಯಾಗಿದೆ. ಕ್ಷಣಿಕ ಸುಖದ ಬೆನ್ನೇರಿದ ಈ ವಿದ್ಯಾರ್ಥಿಗಳ ಬದುಕು ಈಗ ಅತಂತ್ರವಾಗಿದ್ದು, ವೈದ್ಯಕೀಯ ಪರೀಕ್ಷೆಯಲ್ಲಿ ಇಬ್ಬರಿಗೂ ಎಚ್ಐವಿ ಸೋಂಕು ತಗುಲಿರುವುದು ದೃಢಪಟ್ಟಿದೆ. ಈ ಘಟನೆಯು ಪೋಷಕರು ಮತ್ತು ಕಾಲೇಜು ವಿದ್ಯಾರ್ಥಿಗಳಲ್ಲಿ ನಡುಕ ಹುಟ್ಟಿಸಿದೆ.
ಈ ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆಯೇ ಎಚ್ಚೆತ್ತುಕೊಂಡಿರುವ ರಾಜ್ಯ ಆರೋಗ್ಯ ಇಲಾಖೆ, ಆನ್ಲೈನ್ ಡೇಟಿಂಗ್ ಆಪ್ಗಳ ಮೇಲೆ ಹದ್ದಿನ ಕಣ್ಣಿಡಲು ನಿರ್ಧರಿಸಿದೆ. ತಂತ್ರಜ್ಞಾನದ ಮರೆಯಲ್ಲಿ ನಡೆಯುತ್ತಿರುವ ಇಂತಹ ಚಟುವಟಿಕೆಗಳು ಯುವಜನತೆಯ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದ್ದು, ಯುವಕರು ಅಪರಿಚಿತರೊಂದಿಗೆ ಸಂಪರ್ಕ ಬೆಳೆಸುವಾಗ ಹಾಗೂ ಆಪ್ಗಳನ್ನು ಬಳಸುವಾಗ ಅತ್ಯಂತ ಎಚ್ಚರಿಕೆಯಿಂದ ಇರಬೇಕೆಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ.
