ನವದೆಹಲಿ: ಕಳೆದ ನಾಲ್ಕು ದಿನಗಳಿಂದ ದೇಶಾದ್ಯಂತ ಪ್ರಯಾಣಿಕರನ್ನು ಹೈರಾಣಾಗಿಸಿರುವ ಇಂಡಿಗೋ (IndiGo) ವಿಮಾನಯಾನ ಸಂಸ್ಥೆಯ ಅವ್ಯವಸ್ಥೆಯನ್ನು ಸರಿಪಡಿಸಲು ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ಮಹತ್ವದ ಹೆಜ್ಜೆ ಇಟ್ಟಿದೆ. ಕಾರ್ಯಾಚರಣೆಯನ್ನು ಸುಗಮಗೊಳಿಸುವ ನಿಟ್ಟಿನಲ್ಲಿ ಪೈಲಟ್ಗಳು ಮತ್ತು ಕ್ಯಾಬಿನ್ ಸಿಬ್ಬಂದಿಯ ‘ಸಾಪ್ತಾಹಿಕ ವಿಶ್ರಾಂತಿ’ (Weekly Rest) ನಿಯಮದಲ್ಲಿದ್ದ ಕಠಿಣ ಷರತ್ತನ್ನು ಡಿಜಿಸಿಎ ಶುಕ್ರವಾರ ಹಿಂಪಡೆದಿದೆ.
ನಿಯಮ ಬದಲಾವಣೆ ಏಕೆ?
ವಿಮಾನಯಾನ ಸಂಸ್ಥೆಗಳಿಂದ ಬಂದ ಮನವಿ ಮತ್ತು ಪ್ರಸ್ತುತ ಎದುರಾಗಿರುವ ಕಾರ್ಯಾಚರಣೆಯ ಅಸ್ಥಿರತೆಯನ್ನು ಪರಿಗಣಿಸಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಡಿಜಿಸಿಎ ಆದೇಶದಲ್ಲಿ ತಿಳಿಸಿದೆ. “ವಾರದ ರಜೆಯನ್ನು (Weekly Rest) ಇತರ ರಜೆಗಳೊಂದಿಗೆ ಬದಲಾಯಿಸುವಂತಿಲ್ಲ” ಎಂಬ ಹಿಂದಿನ ಸೂಚನೆಯನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಹಿಂಪಡೆಯಲಾಗಿದೆ. ಇದರಿಂದ ಲಭ್ಯವಿರುವ ಪೈಲಟ್ಗಳ ಸಂಖ್ಯೆ ಹೆಚ್ಚಲಿದ್ದು, ರದ್ದಾಗುತ್ತಿರುವ ವಿಮಾನಗಳ ಸಂಖ್ಯೆ ತಗ್ಗಬಹುದು ಎಂಬ ನಿರೀಕ್ಷೆಯಿದೆ. 2026ರ ಫೆಬ್ರವರಿವರೆಗೆ ಕೆಲವು ಎಫ್ಡಿಟಿಎಲ್ (FDTL) ನಿಯಮಗಳಿಂದ ವಿನಾಯಿತಿ ನೀಡುವಂತೆ ಇಂಡಿಗೋ ಮನವಿ ಮಾಡಿಕೊಂಡಿತ್ತು.
ಶುಕ್ರವಾರವೂ ನೂರಾರು ವಿಮಾನಗಳು ರದ್ದು
ನಿಯಮ ಸಡಿಲಿಕೆ ಮಾಡಿದರೂ ಶುಕ್ರವಾರದ ಪರಿಸ್ಥಿತಿ ಭಿನ್ನವಾಗಿರಲಿಲ್ಲ. ದೇಶಾದ್ಯಂತ 400ಕ್ಕೂ ಹೆಚ್ಚು ವಿಮಾನಗಳು ರದ್ದುಗೊಂಡಿವೆ. ದೆಹಲಿ ವಿಮಾನ ನಿಲ್ದಾಣದಿಂದ ಹೊರಡುವ ಎಲ್ಲಾ ಇಂಡಿಗೋ ವಿಮಾನಗಳನ್ನು ರದ್ದುಗೊಳಿಸಲಾಗಿದ್ದು, ಚೆನ್ನೈನಲ್ಲಿ ಸಂಜೆ 6 ಗಂಟೆಯವರೆಗೆ ಹಾರಾಟ ಸ್ಥಗಿತಗೊಳಿಸಲಾಗಿತ್ತು. ಗುರುವಾರವಷ್ಟೇ ದೆಹಲಿಯಲ್ಲಿ 172, ಮುಂಬೈನಲ್ಲಿ 118, ಬೆಂಗಳೂರಿನಲ್ಲಿ 100 ಮತ್ತು ಹೈದರಾಬಾದ್ನಲ್ಲಿ 75 ಸೇರಿದಂತೆ ಒಟ್ಟು 550ಕ್ಕೂ ಹೆಚ್ಚು ವಿಮಾನಗಳು ರದ್ದಾಗಿದ್ದವು.
ಸಹಜ ಸ್ಥಿತಿಗೆ ಮರಳುವುದು ಸುಲಭವಲ್ಲ: ಸಿಇಒ
ದಿನಕ್ಕೆ ಸುಮಾರು 2,300 ವಿಮಾನಗಳನ್ನು ನಿರ್ವಹಿಸುವ ಇಂಡಿಗೋದ ಸಮಯಪಾಲನೆ (On-time performance) ಬುಧವಾರದಂದು ಶೇ. 19.7ಕ್ಕೆ ಕುಸಿದಿದೆ. ಡಿಜಿಸಿಎ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ ನಂತರ ಸಿಬ್ಬಂದಿಯನ್ನುದ್ದೇಶಿಸಿ ಮಾತನಾಡಿದ ಇಂಡಿಗೋ ಸಿಇಒ ಪೀಟರ್ ಎಲ್ಬರ್ಸ್, “ವಿಮಾನಯಾನ ಸೇವೆಯನ್ನು ಸಹಜ ಸ್ಥಿತಿಗೆ ತರುವುದು ಮತ್ತು ಸಮಯಪಾಲನೆಯನ್ನು ಕಾಪಾಡುವುದು ಸದ್ಯಕ್ಕೆ ಸುಲಭದ ಮಾತಲ್ಲ” ಎಂದು ಹೇಳುವ ಮೂಲಕ ಮುಂದಿನ ದಿನಗಳಲ್ಲೂ ವ್ಯತ್ಯಯ ಮುಂದುವರಿಯುವ ಸೂಚನೆ ನೀಡಿದ್ದಾರೆ.
