ನ್ಯೂಯಾರ್ಕ್: ಕುಖ್ಯಾತ ಲೈಂ*ಗಿಕ ಅಪರಾಧಿ, ದಿವಂಗತ ಜೆಫ್ರಿ ಎಪ್ಸ್ಟೀನ್ಗೆ (Jeffrey Epstein) ಸಂಬಂಧಿಸಿದ ಲಕ್ಷಾಂತರ ಕಡತಗಳು ಬೆಚ್ಚಿಬೀಳಿಸುವ ಸತ್ಯಗಳನ್ನು ಹೊರಹಾಕುತ್ತಿವೆ. ಈ ದಾಖಲೆಗಳಲ್ಲಿರುವ ಆರೋಪಗಳು ‘ಮಾನವೀಯತೆ ವಿರುದ್ಧದ ಅಪರಾಧ’ಗಳ (Crimes against humanity) ಕಾನೂನು ವ್ಯಾಪ್ತಿಗೆ ಬರುತ್ತವೆ ಎಂದು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಂಡಳಿಯ (UN Human Rights Council) ಸ್ವತಂತ್ರ ತಜ್ಞರ ಸಮಿತಿ ಗಂಭೀರ ಕಳವಳ ವ್ಯಕ್ತಪಡಿಸಿದೆ.
ಬಯಲಾಯ್ತು ಜಾಗತಿಕ ಕ್ರಿಮಿನಲ್ ಜಾಲ!
ಅಮೆರಿಕದ ನ್ಯಾಯಾಂಗ ಇಲಾಖೆ ಬಿಡುಗಡೆ ಮಾಡಿರುವ ದಾಖಲೆಗಳಲ್ಲಿ ಉಲ್ಲೇಖಿಸಿರುವ ಅಪರಾಧಗಳು, ಇದೊಂದು ವ್ಯವಸ್ಥಿತ “ಜಾಗತಿಕ ಕ್ರಿಮಿನಲ್ ಜಾಲ” (Global criminal enterprise) ಎಂಬುದನ್ನು ಸೂಚಿಸುತ್ತವೆ. ಈ ಭೀಕರ ಅಪರಾಧಗಳು ಜನಾಂಗೀಯ ನಿಂದನೆ, ಭ್ರಷ್ಟಾಚಾರ, ತೀವ್ರ ಸ್ತ್ರೀದ್ವೇಷ ಮತ್ತು ಮೇಲರಿಮೆಯ (Supremacist) ವಿಕೃತ ನಂಬಿಕೆಗಳ ಹಿನ್ನೆಲೆಯಲ್ಲಿ ನಡೆದಿವೆ ಎಂದು ತಜ್ಞರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಮಹಿಳೆಯರ ಕೀಳರಿಮೆ ಮತ್ತು ಶೋಷಣೆ
ಈ ಪ್ರಕರಣವು ಮಹಿಳೆಯರು ಮತ್ತು ಬಾಲಕಿಯರನ್ನು ಕೇವಲ ಒಂದು ವಸ್ತುವಿನಂತೆ ಬಳಸಿ (Commodification), ಅತ್ಯಂತ ಕೀಳಾಗಿ (Dehumanisation) ನಡೆಸಿಕೊಂಡಿರುವುದನ್ನು ಎತ್ತಿ ತೋರಿಸುತ್ತದೆ. “ಮಹಿಳೆಯರು ಮತ್ತು ಬಾಲಕಿಯರ ಮೇಲಿನ ಈ ದೌರ್ಜನ್ಯಗಳ ಪ್ರಮಾಣ, ಸ್ವರೂಪ, ವ್ಯವಸ್ಥಿತ ಜಾಲ ಮತ್ತು ಜಾಗತಿಕ ವ್ಯಾಪ್ತಿಯು ಎಷ್ಟರಮಟ್ಟಿಗೆ ಗಂಭೀರವಾಗಿದೆ ಎಂದರೆ, ಇವುಗಳನ್ನು ‘ಮಾನವೀಯತೆ ವಿರುದ್ಧದ ಅಪರಾಧಗಳು’ ಎಂದು ಪರಿಗಣಿಸುವುದು ಅತ್ಯಂತ ಸಮಂಜಸವಾಗಿದೆ” ಎಂದು ತಜ್ಞರು ತಮ್ಮ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಸ್ವತಂತ್ರ ತನಿಖೆಗೆ ಆಗ್ರಹ
ಈ ಕಡತಗಳಲ್ಲಿರುವ ಆರೋಪಗಳ ಬಗ್ಗೆ ಸ್ವತಂತ್ರ, ಕೂಲಂಕಷ ಮತ್ತು ನಿಷ್ಪಕ್ಷಪಾತ ತನಿಖೆಯಾಗಬೇಕಿದೆ. ಇಷ್ಟೊಂದು ದೀರ್ಘಕಾಲದವರೆಗೆ ಜಗತ್ತಿನ ಕಣ್ಣಿಗೆ ಮಣ್ಣೆರಚಿ ಇಂತಹ ಭೀಕರ ಅಪರಾಧಗಳನ್ನು ಎಸಗಲು ಹೇಗೆ ಸಾಧ್ಯವಾಯಿತು ಎಂಬುದರ ಕುರಿತು ಆಳವಾದ ವಿಚಾರಣೆ ನಡೆಯಲೇಬೇಕು ಎಂದು ವಿಶ್ವಸಂಸ್ಥೆ ತಜ್ಞರು ಕಟ್ಟುನಿಟ್ಟಾಗಿ ಒತ್ತಾಯಿಸಿದ್ದಾರೆ.
