ಅಹಮದಾಬಾದ್: ‘ಲವ್ ಜಿಹಾದ್’ ಮತ್ತು ಸಮಾಜಘಾತುಕ ಶಕ್ತಿಗಳಿಂದ ಹೆಣ್ಣುಮಕ್ಕಳನ್ನು ರಕ್ಷಿಸುವ ನಿಟ್ಟಿನಲ್ಲಿ ಗುಜರಾತ್ ಸರ್ಕಾರ ಕಠಿಣ ಹೆಜ್ಜೆಯಿಟ್ಟಿದೆ. ವಿವಾಹ ನೋಂದಣಿ (Marriage Registration) ಪ್ರಕ್ರಿಯೆಯಲ್ಲಿ ಭಾರಿ ಬದಲಾವಣೆಗಳನ್ನು ತರಲಾಗುತ್ತಿದ್ದು, ಈ ಕುರಿತು ಉಪಮುಖ್ಯಮಂತ್ರಿ ಹರ್ಷ ಸಂಘವಿ ಶುಕ್ರವಾರ ವಿಧಾನಸಭೆಯಲ್ಲಿ ಮಹತ್ವದ ಘೋಷಣೆ ಮಾಡಿದ್ದಾರೆ.
ಹೊಸ ನಿಯಮಗಳೇನು? ಪೋಷಕರ ಒಪ್ಪಿಗೆ ಕಡ್ಡಾಯ!
‘ಗುಜರಾತ್ ವಿವಾಹ ನೋಂದಣಿ ಕಾಯ್ದೆ 2006’ರ ಅಡಿಯಲ್ಲಿ ಈ ಹೊಸ ನಿಯಮಗಳನ್ನು ಜಾರಿಗೆ ತರಲಾಗುತ್ತಿದೆ. ಇನ್ಮುಂದೆ ಪ್ರೇಮಿಗಳು ವಿವಾಹ ನೋಂದಣಿ ಮಾಡಿಸಿಕೊಳ್ಳಬೇಕಾದರೆ, ಮದುವೆಯ ಬಗ್ಗೆ ತಮ್ಮ ಪೋಷಕರಿಗೆ ಮೊದಲೇ ಮಾಹಿತಿ ನೀಡಿದ್ದೇವೆ ಎಂಬ ‘ಘೋಷಣಾ ಪತ್ರ’ (Declaration) ಸಲ್ಲಿಸುವುದು ಕಡ್ಡಾಯ. ಕೇವಲ ಅಷ್ಟೇ ಅಲ್ಲದೆ, ವಧು-ವರರು ತಮ್ಮ ಪೋಷಕರ ಗುರುತಿನ ಚೀಟಿ, ಫೋನ್ ನಂಬರ್ ಮತ್ತು ವಿಳಾಸದ ಪುರಾವೆಗಳನ್ನೂ ಕಡ್ಡಾಯವಾಗಿ ಒದಗಿಸಬೇಕಾಗುತ್ತದೆ.
ರಿಜಿಸ್ಟ್ರಾರ್ ಅವರಿಂದಲೇ ಪೋಷಕರಿಗೆ ನೋಟಿಸ್:
ವಿವಾಹ ನೋಂದಣಿಗೆ ಅರ್ಜಿ ಸಲ್ಲಿಕೆಯಾದ 10 ದಿನಗಳ ಒಳಗೆ ಸಹಾಯಕ ರಿಜಿಸ್ಟ್ರಾರ್ ಅವರು ವಧು-ವರರ ಪೋಷಕರಿಗೆ ಅಧಿಕೃತವಾಗಿ ನೋಟಿಸ್ ನೀಡಲಿದ್ದಾರೆ. ಎಲ್ಲಾ ದಾಖಲೆಗಳ ಪರಿಶೀಲನೆ ಮುಗಿದು, ಅರ್ಜಿ ಸಲ್ಲಿಸಿದ 30 ದಿನಗಳ ನಂತರವಷ್ಟೇ ವಿವಾಹವನ್ನು ಅಧಿಕೃತವಾಗಿ ನೋಂದಾಯಿಸಲಾಗುತ್ತದೆ. ಈ ಸಂಪೂರ್ಣ ಪ್ರಕ್ರಿಯೆಯ ಮಾಹಿತಿಯನ್ನು ನಿರ್ವಹಿಸಲು ಸರ್ಕಾರವು ಶೀಘ್ರದಲ್ಲೇ ಹೊಸ ವೆಬ್ ಪೋರ್ಟಲ್ ಅನ್ನು ಬಿಡುಗಡೆ ಮಾಡಲಿದೆ.
“ಸಲೀಂ, ಸುರೇಶ್ ಆದ್ರೆ ಕಠಿಣ ಕ್ರಮ” – ಹರ್ಷ ಸಂಘವಿ ಗುಡುಗು:
ವಿಧಾನಸಭೆಯಲ್ಲಿ ಕಠಿಣ ಶಬ್ದಗಳಲ್ಲಿ ಎಚ್ಚರಿಕೆ ನೀಡಿದ ಹರ್ಷ ಸಂಘವಿ, “ಸಲೀಂ ಎಂಬಾತ ತನ್ನ ಹೆಸರನ್ನು ಸುರೇಶ್ ಎಂದು ಬದಲಾಯಿಸಿಕೊಂಡು ಗುಜರಾತ್ನ ಹೆಣ್ಣುಮಕ್ಕಳನ್ನು ಮೋಸದ ಬಲೆಗೆ ಬೀಳಿಸಿದರೆ, ಭವಿಷ್ಯದಲ್ಲಿ ಆತ ಇಂತಹ ಕೃತ್ಯಕ್ಕೆ ಕೈಹಾಕದಂತೆ ಕಠಿಣ ಕ್ರಮ ಜರುಗಿಸುತ್ತೇವೆ” ಎಂದು ಗುಡುಗಿದ್ದಾರೆ. ಪಂಚಮಹಲ್ ಜಿಲ್ಲೆಯಲ್ಲಿ ಮುಸ್ಲಿಮರೇ ಇಲ್ಲದ ಹಳ್ಳಿಗಳಲ್ಲಿ ನೂರಾರು ನಕಲಿ ‘ನಿಕಾಹ್’ ಪ್ರಮಾಣಪತ್ರಗಳನ್ನು ವಿತರಿಸಿದ ಪ್ರಕರಣಗಳನ್ನು ಅವರು ಈ ವೇಳೆ ಉಲ್ಲೇಖಿಸಿದರು.
“ಸರ್ಕಾರ ಪ್ರೇಮ ವಿವಾಹಗಳ ವಿರುದ್ಧವಿಲ್ಲ. ಆದರೆ, ವಂಚನೆ ಮತ್ತು ಬಲವಂತದ ಮತಾಂತರವನ್ನು ನಾವು ಸಹಿಸುವುದಿಲ್ಲ. ಸನಾತನ ಸಂಪ್ರದಾಯ ಮತ್ತು ವಿವಾಹ ವ್ಯವಸ್ಥೆಯನ್ನು ಉಳಿಸಲು ಈ ನಿರ್ಧಾರ ಕೈಗೊಳ್ಳಲಾಗಿದೆ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಕಾನೂನು ಸಚಿವ ಕೌಶಿಕ್ ವೇಕರಿಯಾ ಅವರು ವಿವಿಧ ಸಾಮಾಜಿಕ ಸಂಘಟನೆಗಳೊಂದಿಗೆ 30ಕ್ಕೂ ಹೆಚ್ಚು ಸಭೆಗಳನ್ನು ನಡೆಸಿದ ಬಳಿಕ ಈ ತೀರ್ಮಾನಕ್ಕೆ ಬರಲಾಗಿದೆ. ಹೊಸ ನಿಯಮಗಳನ್ನು ಜಾರಿಗೆ ತರುವ ಮುನ್ನ ಸಾರ್ವಜನಿಕರಿಗೆ ಸಲಹೆ ಮತ್ತು ಆಕ್ಷೇಪಣೆ ಸಲ್ಲಿಸಲು 30 ದಿನಗಳ ಕಾಲಾವಕಾಶ ನೀಡಲಾಗಿದೆ.
