ನವದೆಹಲಿ: ಪ್ರಖ್ಯಾತ ಕ್ರೀಡಾ ಉಡುಪು ಮತ್ತು ಪರಿಕರಗಳ ಬ್ರ್ಯಾಂಡ್ ‘ರೀಬಾಕ್’ (Reebok) ಭಾರತದಲ್ಲಿ ತನ್ನ ನೂತನ ಬ್ರ್ಯಾಂಡ್ ಅಂಬಾಸಿಡರ್ ಆಗಿ ಒಲಿಂಪಿಕ್ ಶೂಟರ್ ಮನು ಭಾಕರ್ ಅವರನ್ನು ನೇಮಕ ಮಾಡಿದೆ. ಕೇವಲ 24 ವರ್ಷದ ಈ ಯುವ ಪ್ರತಿಭೆ ಭಾರತೀಯ ಕ್ರೀಡಾ ಕ್ಷೇತ್ರದಲ್ಲಿ ಹೊಸ ಮೈಲಿಗಲ್ಲು ನಿರ್ಮಿಸಿದ್ದು, ಈಗ ಜಾಗತಿಕ ಬ್ರ್ಯಾಂಡ್ನ ಮುಖವಾಣಿಯಾಗಿ ಹೊರಹೊಮ್ಮಿದ್ದಾರೆ.
ಒಲಿಂಪಿಕ್ಸ್ನಲ್ಲಿ ಇತಿಹಾಸ ಬರೆದಿದ್ದ ಮನು ಭಾಕರ್
2024ರ ಪ್ಯಾರಿಸ್ ಬೇಸಿಗೆ ಒಲಿಂಪಿಕ್ಸ್ನಲ್ಲಿ ಮಹಿಳೆಯರ 10 ಮೀಟರ್ ಏರ್ ಪಿಸ್ತೂಲ್ ಹಾಗೂ 10 ಮೀಟರ್ ಏರ್ ಪಿಸ್ತೂಲ್ ಮಿಶ್ರ ತಂಡ ವಿಭಾಗದಲ್ಲಿ ಮನು ಭಾಕರ್ ಎರಡು ಕಂಚಿನ ಪದಕಗಳನ್ನು ಮುಡಿಗೇರಿಸಿಕೊಂಡಿದ್ದರು. ಈ ಮೂಲಕ ಒಂದೇ ಒಲಿಂಪಿಕ್ ಕ್ರೀಡಾಕೂಟದಲ್ಲಿ ಎರಡು ಪದಕ ಗೆದ್ದ ಮೊದಲ ಭಾರತೀಯ ಅಥ್ಲೀಟ್ ಮತ್ತು ಒಲಿಂಪಿಕ್ ಪದಕ ಗೆದ್ದ ಮೊದಲ ಭಾರತೀಯ ಮಹಿಳಾ ಶೂಟರ್ ಎಂಬ ಐತಿಹಾಸಿಕ ಹಾಗೂ ಅಪ್ರತಿಮ ಸಾಧನೆ ಮಾಡಿದ್ದರು.
“ನನ್ನ ನಂಬಿಕೆಯೇ ರೀಬಾಕ್ ಜೊತೆ ಬೆಸೆಯಲು ಕಾರಣ”
ಈ ಹೊಸ ಒಪ್ಪಂದದ ಬಗ್ಗೆ ಸಂತಸ ಹಂಚಿಕೊಂಡಿರುವ ಮನು ಭಾಕರ್, “ಯಾವುದೇ ಫಲಿತಾಂಶವು ಸ್ಪರ್ಧೆಯ ದಿನಕ್ಕಿಂತ ಮುಂಚೆಯೇ, ಅಂದರೆ ತರಬೇತಿಯ ಹಂತದಲ್ಲೇ ಆರಂಭವಾಗುತ್ತದೆ. ನಿರಂತರ ತರಬೇತಿ, ಏಕಾಗ್ರತೆ ಮತ್ತು ನನ್ನ ಮೇಲಿನ ನಂಬಿಕೆ ನಾನು ಮಾಡುವ ಪ್ರತಿಯೊಂದು ಕೆಲಸವನ್ನು ರೂಪಿಸುತ್ತದೆ. ಇದೇ ಅಂಶ ನನ್ನನ್ನು ರೀಬಾಕ್ನೊಂದಿಗೆ ಬೆಸೆಯುವಂತೆ ಮಾಡಿದೆ. ಕ್ರೀಡಾಪಟುಗಳ ತರಬೇತಿಯ ಪ್ರತಿ ಹಂತದಲ್ಲೂ ಬೆಂಬಲವಾಗಿ ನಿಲ್ಲುವ ಮತ್ತು ಪೂರ್ವಸಿದ್ಧತೆಗೆ ಒತ್ತು ನೀಡುವ ಬ್ರ್ಯಾಂಡ್ ಅನ್ನು ಪ್ರತಿನಿಧಿಸಲು ನನಗೆ ಹೆಮ್ಮೆಯಾಗುತ್ತಿದೆ” ಎಂದಿದ್ದಾರೆ.
ರೀಬಾಕ್ ಇಂಡಿಯಾ ಹೇಳಿದ್ದೇನು?
ರೀಬಾಕ್ ಇಂಡಿಯಾದ ಬ್ರ್ಯಾಂಡ್ ಹೆಡ್ ಅರ್ಜುನ್ ರಾಮಮೂರ್ತಿ ಮಾತನಾಡಿ, “ಮನು ಭಾಕರ್ ಅವರು ಭಾರತೀಯ ಕ್ರೀಡೆಯ ಭವಿಷ್ಯವನ್ನು ಪ್ರತಿನಿಧಿಸುತ್ತಾರೆ. ಅವರ ಏಕಾಗ್ರತೆ, ನಿರ್ಭಯತೆ ಮತ್ತು ಕಠಿಣ ಪರಿಶ್ರಮ ಅಸಾಧಾರಣವಾದದ್ದು. ಶಾರ್ಟ್ಕಟ್ಗಳನ್ನು ಹುಡುಕದೆ, ಸತತ ತರಬೇತಿಯ ಮೂಲಕ ಸಿದ್ಧರಾಗುವ ಕ್ರೀಡಾಪಟುಗಳ ಮೇಲಿನ ನಮ್ಮ ನಂಬಿಕೆಯನ್ನು ಈ ಪಾಲುದಾರಿಕೆ ಪ್ರತಿಬಿಂಬಿಸುತ್ತದೆ. ಯುವಜನತೆಯಲ್ಲಿ ಆತ್ಮವಿಶ್ವಾಸ ತುಂಬುವ ನಿಟ್ಟಿನಲ್ಲಿ ಇದೊಂದು ಮಹತ್ವದ ಹೆಜ್ಜೆಯಾಗಿದೆ” ಎಂದು ತಿಳಿಸಿದ್ದಾರೆ.
