ಬೆಂಗಳೂರಿನಲ್ಲಿ ಆಟೋ ಎಲ್ಪಿಜಿ ಬಿಕ್ಕಟ್ಟು ದಿನೇ ದಿನೇ ಉಲ್ಬಣಗೊಳ್ಳುತ್ತಿದ್ದು, ನಗರದ ಅರ್ಧದಷ್ಟು ಗ್ಯಾಸ್ ವಿತರಣಾ ಕೇಂದ್ರಗಳು ಬಾಗಿಲು ಮುಚ್ಚಿವೆ. ಹಿಂದೆ ಪ್ರತಿ ಲೀಟರ್ಗೆ ಸುಮಾರು 58 ರೂಪಾಯಿ ಇದ್ದ ಎಲ್ಪಿಜಿ ದರ ಇದೀಗ ಗಗನಕ್ಕೇರಿದೆ. ಇಂಡೇನ್, ಎಚ್ಪಿ ಮತ್ತು ಭಾರತ್ ಪೆಟ್ರೋಲಿಯಂನಂತಹ ಸರ್ಕಾರಿ ಸ್ವಾಮ್ಯದ ಏಜೆನ್ಸಿಗಳು ಲೀಟರ್ಗೆ 85 ರೂಪಾಯಿ ದರದಲ್ಲಿ ಎಲ್ಪಿಜಿ ಮಾರಾಟ ಮಾಡುತ್ತಿದ್ದರೆ, ಖಾಸಗಿ ಬಂಕ್ಗಳು ಬರೋಬ್ಬರಿ 120 ರಿಂದ 125 ರೂಪಾಯಿಗಳನ್ನು ವಸೂಲಿ ಮಾಡುತ್ತಿವೆ.
ಈ ಕುರಿತು ಅಸಹಾಯಕತೆ ವ್ಯಕ್ತಪಡಿಸಿರುವ ಖಾಸಗಿ ಗ್ಯಾಸ್ ಸ್ಟೇಷನ್ ಮ್ಯಾನೇಜರ್ ಚೇತನ್ ಗೌಡ, ಕಳೆದ ಮೂರು ದಿನಗಳಿಂದ ಸ್ಟಾಕ್ ಬಂದಿಲ್ಲ, ಕಳೆದ ಕೆಲವು ವಾರಗಳಿಂದ 4 ಟನ್ನಿಂದ 2 ಟನ್ಗೆ ಇಳಿಕೆಯಾಗಿದ್ದ ಪೂರೈಕೆ ಈಗ ಸಂಪೂರ್ಣವಾಗಿ ಸ್ಥಗಿತಗೊಂಡಿದೆ, ಪೂರೈಕೆ ಯಾವಾಗ ಸಹಜ ಸ್ಥಿತಿಗೆ ಮರಳುತ್ತದೆ ಎಂಬ ಬಗ್ಗೆ ನಮಗೂ ಯಾವುದೇ ಮಾಹಿತಿಯಿಲ್ಲ ಎಂದು ಹೇಳಿದ್ದಾರೆ.
ಗ್ಯಾಸ್ಗಾಗಿ ಬಂಕ್ಗಳ ಮುಂದೆ ಸುಮಾರು ಮೂರು ಕಿಲೋಮೀಟರ್ವರೆಗೂ ಆಟೋ ರಿಕ್ಷಾಗಳ ಸರತಿ ಸಾಲುಗಳು ಕಂಡುಬರುತ್ತಿರುವುದು ನಗರದಲ್ಲಿ ಇದೀಗ ಸಾಮಾನ್ಯ ದೃಶ್ಯವಾಗಿದೆ. ಬೆಳಗಿನ ಜಾವ 5 ಗಂಟೆಯಿಂದಲೇ ಗ್ಯಾಸ್ಗಾಗಿ ಕಾದು ಕುಳಿತು, ಗಂಟೆಗಳ ಬಳಿಕ ಬರಿಗೈಯಲ್ಲಿ ವಾಪಸಾಗುತ್ತಿರುವ ಆಟೋ ಚಾಲಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಈ ಬಗ್ಗೆ ಅಳಲು ತೋಡಿಕೊಂಡಿರುವ ಆಟೋ ಚಾಲಕ ಕೃಷ್ಣಸ್ವಾಮಿ, ಎರಡು ದಿನಗಳ ಹಿಂದೆ ಹಾಕಿಸಿದ ಗ್ಯಾಸ್ನಲ್ಲೇ ಆಟೋ ಓಡಿಸುತ್ತಿದ್ದೇನೆ, ನಿನ್ನೆ ಮತ್ತು ಇಂದು ಗ್ಯಾಸ್ ಸಿಗಲಿಲ್ಲ. ಮಧ್ಯದಲ್ಲೇ ಗ್ಯಾಸ್ ಖಾಲಿಯಾಗುವ ಭಯದಿಂದ ಪ್ರಯಾಣಿಕರನ್ನು ಹತ್ತಿಸಿಕೊಳ್ಳಲೂ ಹಿಂದೇಟು ಹಾಕುತ್ತಿದ್ದೇನೆ ಎಂದಿದ್ದಾರೆ.
ಮತ್ತೊಬ್ಬ ಚಾಲಕ ಶರವಣ ಪ್ರತಿಕ್ರಿಯಿಸಿ, ಗಂಟೆಗಟ್ಟಲೆ ಕಾದ ನಂತರ ಕೇವಲ ಐದು ಲೀಟರ್ ಗ್ಯಾಸ್ ತುಂಬಲು ಮಾತ್ರ ಅವಕಾಶ ನೀಡಲಾಯಿತು. ಅದರಿಂದ ಕೇವಲ 40-50 ಕಿ.ಮೀ ಮಾತ್ರ ಓಡಿಸಬಹುದು. ಸಿಕ್ಕ ಬಾಡಿಗೆಯಲ್ಲೇ ಒಂದಷ್ಟು ಹಣ ಸಂಪಾದಿಸಲು ಪ್ರಯತ್ನಿಸುತ್ತೇನೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.
ಗ್ಯಾಸ್ ಅಭಾವ ಮತ್ತು ದುಬಾರಿ ದರದಿಂದಾಗಿ ನೂರಾರು ಆಟೋ ಚಾಲಕರು ತಮ್ಮ ದೈನಂದಿನ ದುಡಿಮೆ ಇಲ್ಲದೆ ಸಾಲದ ಸುಳಿಗೆ ಸಿಲುಕುವ ಭೀತಿಯಲ್ಲಿದ್ದಾರೆ. ಕಣ್ಮುಚ್ಚಿ ಬಿಡುವಷ್ಟರಲ್ಲಿ ದರ 58 ರಿಂದ 125 ರೂಪಾಯಿಗೆ ಏರಿಕೆಯಾಗಿದೆ. ಇದೇ ಪರಿಸ್ಥಿತಿ ಮುಂದುವರಿದರೆ ಹೊಟ್ಟೆಪಾಡಿಗಾಗಿ ನಮ್ಮ ಆಟೋಗಳನ್ನೇ ಮಾರಾಟ ಮಾಡಬೇಕಾದ ಪರಿಸ್ಥಿತಿ ಬರಬಹುದು ಎಂದು ಶಂಕರೇಗೌಡ ಎಂಬ ಚಾಲಕ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇನ್ನು, ಎಲೆಕ್ಟ್ರಿಕ್ ಮತ್ತು ಸಿಎನ್ಜಿ ಆಟೋಗಳ ಲಭ್ಯತೆಯಿಂದಾಗಿ ಪ್ರಯಾಣಿಕರಿಗೆ ಈ ಬಿಕ್ಕಟ್ಟಿನ ಬಿಸಿ ಸಂಪೂರ್ಣವಾಗಿ ತಟ್ಟಿಲ್ಲವಾದರೂ, ವಾಹನಗಳಿಗಾಗಿ ಕಾಯುವ ಸಮಯ ಹೆಚ್ಚಾಗಿದೆ. ಈ ನಡುವೆ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ (IOCL) ಪ್ರಕಟಣೆ ಹೊರಡಿಸಿದ್ದು, ತನ್ನ ಎಲ್ಲಾ ಚಿಲ್ಲರೆ ಮಾರಾಟ ಕೇಂದ್ರಗಳು ಕಾರ್ಯನಿರ್ವಹಿಸುತ್ತಿವೆ ಮತ್ತು ಅಗತ್ಯ ದಾಸ್ತಾನು ಇದೆ ಎಂದು ಸ್ಪಷ್ಟಪಡಿಸಿದೆ. ಬಹುತೇಕ ಆಟೋ ಎಲ್ಪಿಜಿ ವಾಹನಗಳು ದ್ವಿ-ಇಂಧನ (Bi-fuel) ವ್ಯವಸ್ಥೆ ಹೊಂದಿದ್ದು, ಪೆಟ್ರೋಲ್ನಲ್ಲೂ ಚಲಿಸಬಲ್ಲವು. ಹೀಗಾಗಿ ಗ್ಯಾಸ್ಗಾಗಿ ದೀರ್ಘಕಾಲ ಕಾಯುವ ಬದಲು, ಪೆಟ್ರೋಲ್ ಬಳಸಿ ತಮ್ಮ ಪ್ರಯಾಣವನ್ನು ನಿರಂತರವಾಗಿ ಮುಂದುವರಿಸುವಂತೆ ಸಂಸ್ಥೆ ಚಾಲಕರಿಗೆ ಸಲಹೆ ನೀಡಿದೆ.