“ಒಂದು ದಿನ ಮುಂಜಾನೆ ಎದ್ದ ತಕ್ಷಣ ನಿಮ್ಮ ದೈನಂದಿನ ಆದ್ಯತೆಗಳು ರಾತ್ರೋರಾತ್ರಿ ಬದಲಾಗಿವೆ ಎಂದು ಅರಿವಾಗುವುದು ವಿಚಿತ್ರವಾದ ಅನುಭವ. ನನ್ನ ಮನಸ್ಸು ಇನ್ನೂ ನಾನು ಮಾಡುತ್ತಿದ್ದ ಪ್ರಾಜೆಕ್ಟ್ಗಳ ‘ಟು-ಡು’ ಲಿಸ್ಟ್ ಬಗ್ಗೆಯೇ ಯೋಚಿಸುತ್ತಿದೆ. ಆದರೆ ಈಗ ನಾನು ಕೆಲಸ ಕಳೆದುಕೊಂಡ ಇತರರಂತೆ ಕುಟುಂಬ, ಆರ್ಥಿಕ ಪರಿಸ್ಥಿತಿ ಮತ್ತು ಭವಿಷ್ಯದ ಬಗ್ಗೆ ಭಾರವಾದ ಪ್ರಶ್ನೆಗಳನ್ನು ಎದುರಿಸುತ್ತಿದ್ದೇನೆ” ಎಂದು ಒರಾಕಲ್ (Oracle) ಕಂಪನಿಯ ಬೆಂಗಳೂರು ಕಚೇರಿಯಲ್ಲಿ 16 ವರ್ಷಗಳ ಕಾಲ ಸುದೀರ್ಘ ಸೇವೆ ಸಲ್ಲಿಸಿ ಇತ್ತೀಚೆಗಷ್ಟೇ ಕೆಲಸ ಕಳೆದುಕೊಂಡ ಮ್ಯಾನೇಜರ್ ಹೃಷಿಕೇಶ ನರ್ಷಾ ಅವರು ಭಾವುಕವಾಗಿ ಬರೆದುಕೊಂಡಿದ್ದಾರೆ.
ತಮ್ಮ ವೃತ್ತಿಜೀವನವು ಈ ರೀತಿ ಅಂತ್ಯಗೊಂಡಿದ್ದರ ಬಗ್ಗೆ ಚಿಂತಿಸುವ ಬದಲು, ಕಳೆದ 16 ವರ್ಷಗಳಲ್ಲಿ ಕಂಪನಿ ತಮಗೆ ನೀಡಿದ ಎಲ್ಲವನ್ನೂ ಸಂಭ್ರಮಿಸಲು ನಿರ್ಧರಿಸಿದ್ದೇನೆ ಎಂದು ಅವರು ಹೇಳಿದ್ದಾರೆ. “ಒರಾಕಲ್ ನನ್ನನ್ನು ಒಬ್ಬ ನಾಯಕನನ್ನಾಗಿ ರೂಪಿಸಿತು. ನನ್ನ ಸಹೋದ್ಯೋಗಿಗಳು ಮತ್ತು ಪಾಲುದಾರರಿಗೆ ನಾನು ಆಭಾರಿಯಾಗಿದ್ದೇನೆ. ಅವರಲ್ಲಿ ಕೆಲವರು ನನಗೆ ಜೀವಮಾನದ ಸ್ನೇಹಿತರಾಗಿದ್ದಾರೆ. ನನ್ನ ಮುಂದಿನ ಗುರಿ ಏನೆಂದರೆ, ಹೊಸ ಸವಾಲನ್ನು ಎದುರಿಸಲು ನಾನು ಸಿದ್ಧನಾಗಿದ್ದೇನೆ” ಎಂದು ನರ್ಷಾ ಅವರು ತಮ್ಮ ಸಾಮರ್ಥ್ಯದ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಮೂಲಗಳ ಪ್ರಕಾರ, ಅಮೆರಿಕ ಮೂಲದ ಐಟಿ ದೈತ್ಯ ಕಂಪನಿ ಒರಾಕಲ್, ಭಾರತದಲ್ಲಿ ಬರೋಬ್ಬರಿ 12,000 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಇಷ್ಟೇ ಅಲ್ಲದೆ, ಮುಂದಿನ 1 ತಿಂಗಳೊಳಗೆ ಮತ್ತೊಂದು ಸುತ್ತಿನ ಲೇ-ಆಫ್ ನಡೆಯುವ ನಿರೀಕ್ಷೆಯಿದೆ ಎನ್ನಲಾಗಿದೆ. ಜಾಗತಿಕ ಮಟ್ಟದಲ್ಲಿ ಕಂಪನಿಯು ಸುಮಾರು 30,000 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಹಾಕಿದೆ. ಭಾರತದಲ್ಲಿ ಕಂಪನಿಯು 30,000 ಉದ್ಯೋಗಿಗಳನ್ನು ಹೊಂದಿದ್ದು, ಮಾನವ ಸಂಪನ್ಮೂಲ (HR) ವಿಭಾಗದ ಉದ್ಯೋಗಿ ಸೇರಿದಂತೆ ವಜಾಗೊಂಡ ಇಬ್ಬರು ವ್ಯಕ್ತಿಗಳು ಈ ಬೃಹತ್ ಲೇ-ಆಫ್ ಬಗ್ಗೆ ಮಾಹಿತಿ ನೀಡಿದ್ದಾರೆ.
ಉದ್ಯೋಗಿಗಳಿಗೆ ಕಳುಹಿಸಿರುವ ಇಮೇಲ್ನಲ್ಲಿ ಒರಾಕಲ್, “ಸಾಂಸ್ಥಿಕ ಬದಲಾವಣೆಗಳ ಕಾರಣದಿಂದಾಗಿ ಕಾರ್ಯಾಚರಣೆಗಳನ್ನು ಸುಗಮಗೊಳಿಸಲು ನಿರ್ಧರಿಸಲಾಗಿದೆ. ದುರದೃಷ್ಟವಶಾತ್, ಇದರ ಪರಿಣಾಮವಾಗಿ ನೀವು ಪ್ರಸ್ತುತ ಹೊಂದಿರುವ ಹುದ್ದೆಯು ಕಡಿತಗೊಳ್ಳಲಿದೆ” ಎಂದು ತಿಳಿಸಿದೆ.
ಪರಿಹಾರವಾಗಿ ಕಂಪನಿಯು, ಭಾರತದಲ್ಲಿ 1 ವರ್ಷದ ಸೇವೆ ಪೂರ್ಣಗೊಳಿಸಿದ ಪ್ರತಿ ಉದ್ಯೋಗಿಗೆ 15 ದಿನಗಳ ವೇತನ, ವಜಾಗೊಳಿಸುವ ದಿನಾಂಕದವರೆಗಿನ 1 ತಿಂಗಳ ವೇತನವಿಲ್ಲದ ರಜೆ, ಲೀವ್ ಎನ್ಕ್ಯಾಶ್ಮೆಂಟ್, ಅರ್ಹತೆಯ ಆಧಾರದ ಮೇಲೆ ಗ್ರಾಚ್ಯುಟಿ ಮತ್ತು 1 ತಿಂಗಳ ನೋಟಿಸ್ ಅವಧಿಯ ವೇತನವನ್ನು ನೀಡುವುದಾಗಿ ಪ್ರಕಟಿಸಿದೆ. ಇದರ ಜೊತೆಗೆ ಟಾಪ್-ಅಪ್ ಆಗಿ 2 ತಿಂಗಳ ಹೆಚ್ಚುವರಿ ವೇತನವನ್ನು ಸಹ ಒದಗಿಸುತ್ತಿದೆ.
