ಮುಂಬೈ: ಬಾಲಿವುಡ್ ನಟಿ ಆಲಿಯಾ ಭಟ್ ಅವರ ಜನಪ್ರಿಯತೆಯನ್ನು ಪಾಕಿಸ್ತಾನದ ಪ್ರಸಿದ್ಧ ಫ್ಯಾಶನ್ ಬ್ರಾಂಡ್ ‘ಲೇಬಲ್ ಶಾನ್’ (Label Shaan), ತನ್ನ ಹೊಸ ಕಲೆಕ್ಷನ್ ಪ್ರಚಾರಕ್ಕಾಗಿ ಆಲಿಯಾ ಭಟ್ ಅವರ ಎಐ ಎಡಿಟೆಡ್ ಚಿತ್ರಗಳನ್ನು ಬಳಸಿ ಈಗ ವಿವಾದಕ್ಕೆ ಸಿಲುಕಿದೆ.
ಏನಿದು ವಿವಾದ?
ಸಾಮಾನ್ಯವಾಗಿ ದೊಡ್ಡ ನಟಿಯರನ್ನು ಬ್ರಾಂಡ್ ಅಂಬಾಸಿಡರ್ ಆಗಿ ನೇಮಿಸಿಕೊಳ್ಳಲು ಕೋಟಿಗಟ್ಟಲೆ ಹಣ ನೀಡಬೇಕಾಗುತ್ತದೆ. ಆದರೆ, ಈ ಪಾಕಿಸ್ತಾನಿ ಬ್ರಾಂಡ್ ಆಲಿಯಾ ಭಟ್ ಅವರ ಅನುಮತಿ ಇಲ್ಲದೆಯೇ, ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ಬಳಸಿ ಅವರ ಮುಖವನ್ನು ಹೋಲುವ ಚಿತ್ರಗಳನ್ನು ಸೃಷ್ಟಿಸಿದೆ. ಈ ಚಿತ್ರಗಳಲ್ಲಿ ಆಲಿಯಾ ಭಟ್ ಅವರು ಪಾಕಿಸ್ತಾನಿ ಶೈಲಿಯ ಉಡುಗೆಗಳನ್ನು ತೊಟ್ಟಂತೆ ತೋರಿಸಲಾಗಿದೆ.
ಈ ಚಿತ್ರಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. “ಒಬ್ಬ ನಟಿಯ ಅನುಮತಿಯಿಲ್ಲದೆ ಅವರ ಮುಖವನ್ನು ಎಐ ಮೂಲಕ ಬಳಸುವುದು ಕಾನೂನುಬಾಹಿರ ಮತ್ತು ಅನೈತಿಕ” ಎಂದು ಅನೇಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
View this post on Instagram
“ಬ್ರಾಂಡ್ ಅಂಬಾಸಿಡರ್ ಆಗಿ ನೇಮಿಸಿಕೊಳ್ಳಲು ಹಣವಿಲ್ಲದೆ ಈ ರೀತಿ ಶಾರ್ಟ್ಕಟ್ ಬಳಸುತ್ತಿದ್ದಾರೆ” ಎಂದು ಕೆಲವರು ಲೇವಡಿ ಮಾಡಿದ್ದಾರೆ. ಇನ್ನು ಕೆಲವು ಬಳಕೆದಾರರು, “ಇದು ಎಐ ಚಿತ್ರ ಎಂದು ನಂಬಲು ಸಾಧ್ಯವಿಲ್ಲ, ಅಷ್ಟು ನೈಜವಾಗಿ ಕಾಣುತ್ತಿದೆ” ಎಂದು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಸೆಲೆಬ್ರಿಟಿಗಳ ‘ಡೀಪ್ಫೇಕ್’ ಮತ್ತು ‘ಎಐ’ ಚಿತ್ರಗಳು ದೊಡ್ಡ ತಲೆನೋವಾಗಿ ಪರಿಣಮಿಸಿವೆ. ಈ ಹಿಂದೆ ರಶ್ಮಿಕಾ ಮಂದಣ್ಣ, ಕತ್ರಿನಾ ಕೈಫ್ ಸೇರಿದಂತೆ ಹಲವು ನಟಿಯರು ಇಂತಹ ತಂತ್ರಜ್ಞಾನದ ದುರುಪಯೋಗಕ್ಕೆ ಬಲಿಯಾಗಿದ್ದರು. ಈಗ ಆಲಿಯಾ ಭಟ್ ಅವರ ಚಿತ್ರಗಳನ್ನು ವಾಣಿಜ್ಯ ಉದ್ದೇಶಕ್ಕೆ ಬಳಸಿರುವುದು ಕಾನೂನು ಹೋರಾಟಕ್ಕೆ ದಾರಿ ಮಾಡಿಕೊಡುವ ಸಾಧ್ಯತೆಯಿದೆ.
ಸದ್ಯಕ್ಕೆ ಈ ಬಗ್ಗೆ ಆಲಿಯಾ ಭಟ್ ಕಡೆಯಿಂದ ಯಾವುದೇ ಅಧಿಕೃತ ಪ್ರತಿಕ್ರಿಯೆ ಬಂದಿಲ್ಲ. ಆದರೆ, ಫ್ಯಾಶನ್ ಜಗತ್ತಿನಲ್ಲಿ ಎಐ ಬಳಕೆ ಮತ್ತು ನೈತಿಕತೆಯ ಬಗ್ಗೆ ಹೊಸ ಚರ್ಚೆ ಮಾತ್ರ ಶುರುವಾಗಿದೆ.