ಗುಜರಾತ್‌ನ ವಡೋದರಾದ ಕರ್ಜನ್ ಬಳಿಯ ರಾಷ್ಟ್ರೀಯ ಹೆದ್ದಾರಿ-48ರಲ್ಲಿರುವ (NH-48) ಸಿಎನ್‌ಜಿ (CNG) ಸ್ಟೇಷನ್‌ನಲ್ಲಿ ಕಾರಿಗೆ ಅನಿಲ ತುಂಬಿಸುವಾಗ ಸಿಲಿಂಡರ್ ಭೀಕರವಾಗಿ ಸ್ಫೋಟಗೊಂಡಿದೆ. ಅಕ್ಟೋಬರ್ 1 ರಂದು ಈ ದುರ್ಘಟನೆ ನಡೆದಿದ್ದು, ಸ್ಫೋಟದ ತೀವ್ರತೆಯ ಬೆಚ್ಚಿಬೀಳಿಸುವ ದೃಶ್ಯಗಳು ಬಂಕ್‌ನ ಸಿಸಿಟಿವಿ ಕ್ಯಾಮೆರಾದಲ್ಲಿ (CCTV footage) ಸೆರೆಯಾಗಿವೆ.
ಸ್ಫೋಟದ ರಭಸಕ್ಕೆ ಕಾರಿನ ಮೇಲ್ಛಾವಣಿ ಹಾಗೂ ಬಿಡಿಭಾಗಗಳು ಸಂಪೂರ್ಣವಾಗಿ ಛಿದ್ರಗೊಂಡು, ಗಾಜಿನ ಚೂರುಗಳು ಮತ್ತು ಲೋಹದ ತುಂಡುಗಳು ಎಲ್ಲೆಡೆ ಹರಡಿಕೊಂಡಿವೆ. ಅಲ್ಲದೆ, ಪಕ್ಕದಲ್ಲೇ ನಿಂತಿದ್ದ ಇತರ ಎರಡು ವಾಹನಗಳಿಗೂ ಈ ಸ್ಫೋಟದಿಂದ ಹಾನಿಯಾಗಿದೆ.
ಆದರೆ, ಕಾರಿಗೆ ಗ್ಯಾಸ್ ತುಂಬಿಸುವ ಮುನ್ನವೇ ಚಾಲಕ ಹಾಗೂ ಪ್ರಯಾಣಿಕರು ವಾಹನದಿಂದ ಕೆಳಗಿಳಿದು ಸುರಕ್ಷಿತ ಅಂತರದಲ್ಲಿ ನಿಂತಿದ್ದರಿಂದ ಭಾರಿ ಪ್ರಾಣಾಪಾಯವೊಂದು ಅದೃಷ್ಟವಶಾತ್ ತಪ್ಪಿದೆ. ಘಟನೆಯಲ್ಲಿ ಯಾರಿಗೂ ಯಾವುದೇ ಗಂಭೀರ ಗಾಯಗಳಾಗಿಲ್ಲ ಎಂದು ವರದಿಯಾಗಿದೆ.
ಗ್ಯಾಸ್ ಟ್ಯಾಂಕ್‌ನ ಅತಿಯಾದ ಒತ್ತಡ ಅಥವಾ ತಾಂತ್ರಿಕ ದೋಷದಿಂದಾಗಿ ಈ ಸ್ಫೋಟ ಸಂಭವಿಸಿರಬಹುದು ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ. ಘಟನೆಯ ಬೆನ್ನಲ್ಲೇ ಸ್ಥಳೀಯ ಪೊಲೀಸರು ಹಾಗೂ ಅಗ್ನಿಶಾಮಕ ದಳದ ಸಿಬ್ಬಂದಿ ಸ್ಥಳಕ್ಕೆ ದೌಡಾಯಿಸಿ ಪರಿಸ್ಥಿತಿ ನಿಯಂತ್ರಿಸಿದ್ದಾರೆ.
ಇದೀಗ ಈ ಭೀಕರ ಸ್ಫೋಟದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಿಎನ್‌ಜಿ ಭರ್ತಿ ಮಾಡುವಾಗ ಪ್ರಯಾಣಿಕರು ಕಡ್ಡಾಯವಾಗಿ ವಾಹನದಿಂದ ಕೆಳಗಿಳಿಯಲೇಬೇಕು ಎಂಬ ಪ್ರಮುಖ ಸುರಕ್ಷತಾ ನಿಯಮಗಳ ಕುರಿತು ನೆಟ್ಟಿಗರು ವ್ಯಾಪಕವಾಗಿ ಜಾಗೃತಿ ಮೂಡಿಸುತ್ತಿದ್ದಾರೆ.
