ಬೆಂಗಳೂರು: ಅಕ್ಷಯ ತೃತೀಯದಂದು ಚಿನ್ನ ಖರೀದಿಸುವುದು ಸಾಂಪ್ರದಾಯಿಕ ನಂಬಿಕೆ. ಆದರೆ, ಎಲ್ಲರಿಗೂ ಚಿನ್ನ ಕೊಳ್ಳಲು ಸಾಧ್ಯವಾಗದಿರಬಹುದು. ಅಂತಹ ಸಂದರ್ಭದಲ್ಲಿ ಅಥವಾ ಚಿನ್ನದ ಜೊತೆಗೆ ಈ ಕೆಳಗಿನ ವಸ್ತುಗಳನ್ನು ಮನೆಗೆ ತರುವುದು ಅಷ್ಟೇ ಮಂಗಳಕರ ಮತ್ತು ಅದೃಷ್ಟದಾಯಕ ಎಂದು ನಂಬಲಾಗಿದೆ.
ಬೆಳ್ಳಿ : ಚಿನ್ನದ ನಂತರ ಬೆಳ್ಳಿಯನ್ನು ಅತ್ಯಂತ ಶುಭ ಲೋಹವೆಂದು ಪರಿಗಣಿಸಲಾಗುತ್ತದೆ. ಅಕ್ಷಯ ತೃತೀಯದಂದು ಬೆಳ್ಳಿಯ ನಾಣ್ಯ, ದೀಪ ಅಥವಾ ಸಣ್ಣ ಪಾತ್ರೆಯನ್ನು ಖರೀದಿಸುವುದು ಲಕ್ಷ್ಮಿ ದೇವಿಯ ಕೃಪೆಗೆ ಪಾತ್ರವಾಗುತ್ತದೆ. ಇದು ಆರ್ಥಿಕ ಸ್ಥಿರತೆಯನ್ನು ತರುತ್ತದೆ ಎಂಬ ನಂಬಿಕೆಯಿದೆ.
ಪುಸ್ತಕಗಳು: ಅಕ್ಷಯ ತೃತೀಯದಂದು ಪುಸ್ತಕಗಳನ್ನು ಖರೀದಿಸುವುದು ಸಹ ಬಹಳ ಶುಭ. ಇಂದು ಪುಸ್ತಕಗಳನ್ನು ಖರೀದಿಸುವುದು ಲಕ್ಷ್ಮಿ ಮತ್ತು ಸರಸ್ವತಿ ದೇವಿಯ ಆಶೀರ್ವಾದವನ್ನು ತರುತ್ತದೆ.
ಕಲ್ಲುಪ್ಪು: ಉಪ್ಪನ್ನು ಲಕ್ಷ್ಮಿಯ ಸ್ವರೂಪ ಎಂದು ಕರೆಯಲಾಗುತ್ತದೆ. ಅಕ್ಷಯ ತೃತೀಯದಂದು ಹೊಸದಾಗಿ ಉಪ್ಪಿನ ಪ್ಯಾಕೆಟ್ ಖರೀದಿಸಿ ಮನೆಗೆ ತರುವುದು ನಕಾರಾತ್ಮಕ ಶಕ್ತಿಯನ್ನು ದೂರ ಮಾಡಿ, ಮನೆಯಲ್ಲಿ ಸಕಾರಾತ್ಮಕತೆ ಮತ್ತು ಸಂಪತ್ತನ್ನು ಹೆಚ್ಚಿಸುತ್ತದೆ ಎನ್ನಲಾಗುತ್ತದೆ.
ಮಣ್ಣಿನ ಮಡಕೆ : ಬೇಸಿಗೆಯ ಸಮಯವಾಗಿರುವುದರಿಂದ ಅಕ್ಷಯ ತೃತೀಯದಂದು ಮಣ್ಣಿನ ಮಡಕೆ ಖರೀದಿಸಿ, ಅದರಲ್ಲಿ ನೀರು ತುಂಬಿಸಿ ದಾನ ಮಾಡುವುದು ಅಥವಾ ಮನೆಯಲ್ಲಿ ಇಟ್ಟುಕೊಳ್ಳುವುದು ಅತ್ಯಂತ ಪುಣ್ಯದ ಕೆಲಸ. ಇದು ಕುಬೇರ ದೇವನ ಅನುಗ್ರಹಕ್ಕೆ ಕಾರಣವಾಗುತ್ತದೆ ಎಂಬ ಪ್ರತೀತಿ ಇದೆ.
ಧಾನ್ಯಗಳು : ಈ ದಿನ ಅಕ್ಕಿ, ಗೋಧಿ ಅಥವಾ ಕಡಲೆ ಬೇಳೆಯನ್ನು ಖರೀದಿಸುವುದು ಮನೆಯಲ್ಲಿ ‘ಅನ್ನಪೂರ್ಣೇಶ್ವರಿ’ ನೆಲೆಸುವಂತೆ ಮಾಡುತ್ತದೆ. ವಿಶೇಷವಾಗಿ ಈ ದಿನ ಬಾರ್ಲಿ (ಯವ) ಧಾನ್ಯವನ್ನು ಖರೀದಿಸುವುದು ವಿಷ್ಣು ದೇವರಿಗೆ ಅತ್ಯಂತ ಪ್ರಿಯವಾದುದು.
ತುಳಸಿ ಗಿಡ: ಮನೆಯಲ್ಲಿ ತುಳಸಿ ಗಿಡವಿಲ್ಲದವರು ಅಕ್ಷಯ ತೃತೀಯದಂದು ತುಳಸಿ ಗಿಡ ಖರೀದಿಸಬೇಕು ಎಂದು ನಂಬಲಾಗಿದೆ. ಈ ದಿನ ತುಳಸಿ ಗಿಡ ಖರೀದಿಸಿ ಮನೆಗೆ ತಂದರೆ ಲಕ್ಷ್ಮಿ ದೇವಿ ನಿಮ್ಮ ಮನೆಗೆ ಬಂದಂತೆ, ಹಾಗೆ ಮಾಡುವುದರಿಂದ ಅದೃಷ್ಟ ಬರುತ್ತದೆ.
ದಾನದ ಮಹತ್ವ:
ಅಕ್ಷಯ ತೃತೀಯದಂದು ಕೇವಲ ವಸ್ತುಗಳನ್ನು ಖರೀದಿಸುವುದು ಮಾತ್ರವಲ್ಲ, ಬಡವರಿಗೆ ಅನ್ನದಾನ, ಬಾಯಾರಿದವರಿಗೆ ನೀರು ಅಥವಾ ಪ್ರಾಣಿ-ಪಕ್ಷಿಗಳಿಗೆ ಆಹಾರ ನೀಡುವುದು ನೀವು ಮಾಡುವ ಪುಣ್ಯವನ್ನು ‘ಅಕ್ಷಯ’ (ಅಳಿಯದಂತೆ) ಮಾಡುತ್ತದೆ.