ಮುಂಬೈ: ಭಾರತೀಯ ಚಿತ್ರರಂಗದ ಗಾನ ಸಾಮ್ರಾಜ್ಯವನ್ನು ಸತತ 8 ದಶಕಗಳ ಕಾಲ ಆಳಿದ ದಿಗ್ಗಜ ಗಾಯಕಿ, ಅಭಿಮಾನಿಗಳ ನೆಚ್ಚಿನ ‘ಆಶಾ ತಾಯಿ’ ಆಶಾ ಭೋಸ್ಲೆ ಅವರ ನಿಧನಕ್ಕೆ ಇಡೀ ದೇಶವೇ ಕಣ್ಣೀರು ಹಾಕುತ್ತಿದೆ. ಅವರ ಅಗಲಿಕೆಯ ಸುದ್ದಿ ಕೇವಲ ಭಾರತೀಯ ಕಲಾ ಲೋಕಕ್ಕೆ ಮಾತ್ರವಲ್ಲದೆ, ಅಂತರಾಷ್ಟ್ರೀಯ ಮಟ್ಟದ ಗಣ್ಯರಿಗೂ ತೀವ್ರ ದುಃಖ ತರಿಸಿದ್ದು, ಗಾನ ಪ್ರತಿಭೆಗೆ ವಿಶ್ವದಾದ್ಯಂತ ಭಾವಪೂರ್ಣ ನಮನಗಳು ಸಲ್ಲಿಕೆಯಾಗುತ್ತಿವೆ. ಭಾರತದ ಅತ್ಯಂತ ಪ್ರಭಾವಿ ಹಾಗೂ ಜನಪ್ರಿಯ ಗಾಯಕಿಯರಲ್ಲಿ ಒಬ್ಬರಾಗಿದ್ದ ಅವರ ಅಗಲಿಕೆ ಸಂಗೀತ ಲೋಕಕ್ಕೆ ತುಂಬಲಾರದ ನಷ್ಟವನ್ನು ಉಂಟುಮಾಡಿದೆ.
ವಿಶ್ವಪ್ರಸಿದ್ಧ ರೆಸ್ಲರ್ ಹಾಗೂ ಹಾಲಿವುಡ್ ನಟ ಜಾನ್ ಸೀನಾ ಅವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಆಶಾ ಭೋಸ್ಲೆ ಅವರ ಫೋಟೋವನ್ನು ಹಂಚಿಕೊಳ್ಳುವ ಮೂಲಕ ವಿಶೇಷ ಗೌರವ ಸಲ್ಲಿಸಿದ್ದಾರೆ. ಸಾಮಾನ್ಯವಾಗಿ ಯಾವುದೇ ಅಡಿಬರಹವಿಲ್ಲದೆ ಚಿತ್ರಗಳನ್ನು ಪೋಸ್ಟ್ ಮಾಡುವ ಅಭ್ಯಾಸ ಹೊಂದಿರುವ ಜಾನ್ ಸೀನಾ, ಇದೀಗ ಆಶಾ ಅವರ ಫೋಟೋ ಹಂಚಿಕೊಂಡಿರುವುದು ಭಾರತೀಯ ಅಭಿಮಾನಿಗಳನ್ನು ತೀವ್ರವಾಗಿ ಭಾವುಕರನ್ನಾಗಿಸಿದೆ. ಈ ಪೋಸ್ಟ್ಗೆ ಕಮೆಂಟ್ ಮಾಡುತ್ತಿರುವ ನೆಟ್ಟಿಗರು, “ಒಬ್ಬ ದಿಗ್ಗಜ ಕಲಾವಿದೆಯನ್ನು ಮತ್ತೊಬ್ಬ ದಿಗ್ಗಜ ಗುರುತಿಸಿದ್ದಾರೆ” ಎಂದು ಬಣ್ಣಿಸುತ್ತಿದ್ದು, “ಜಾನ್, ಭಾರತ ನಿಮ್ಮನ್ನು ಪ್ರೀತಿಸುತ್ತದೆ” ಎಂದು ತಮ್ಮ ಅಭಿಮಾನವನ್ನು ವ್ಯಕ್ತಪಡಿಸುತ್ತಿದ್ದಾರೆ.
ಇದೇ ಸಂದರ್ಭದಲ್ಲಿ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಮಾಜಿ ವೇಗದ ಬೌಲರ್ ಬ್ರೆಟ್ ಲೀ ಕೂಡ ಆಶಾ ಭೋಸ್ಲೆ ಅವರೊಂದಿಗಿನ ತಮ್ಮ ಹಳೆಯ ಒಡನಾಟವನ್ನು ಸ್ಮರಿಸಿದ್ದಾರೆ. 2006 ರಲ್ಲಿ ಬಿಡುಗಡೆಯಾಗಿದ್ದ ‘ಯು ಆರ್ ದಿ ಒನ್ ಫಾರ್ ಮಿ’ ಎಂಬ ಹಾಡಿಗಾಗಿ ಆಶಾ ಅವರೊಂದಿಗೆ ಒಟ್ಟಾಗಿ ಕೆಲಸ ಮಾಡಿದ್ದನ್ನು ನೆನಪಿಸಿಕೊಂಡಿರುವ ಲೀ, “ಅವರ ಅಸಾಧಾರಣ ಪ್ರತಿಭೆ ಮಾತ್ರವಲ್ಲದೆ, ಅವರ ನಯವಿನಯ ಹಾಗೂ ನಮ್ರತೆ ನನಗೆ ಸದಾ ಸ್ಫೂರ್ತಿದಾಯಕ” ಎಂದು ಬರೆದುಕೊಂಡಿದ್ದಾರೆ. ಇಷ್ಟೆಲ್ಲಾ ದೊಡ್ಡ ಸಾಧನೆ ಮಾಡಿದ್ದರೂ ಆಶಾ ಅವರು ಪ್ರತಿಯೊಬ್ಬರನ್ನೂ ಅತ್ಯಂತ ಪ್ರೀತಿಯಿಂದ ಕಾಣುತ್ತಿದ್ದರು ಎಂದು ಬ್ರೆಟ್ ಲೀ ಭಾವುಕರಾಗಿ ನುಡಿದಿದ್ದಾರೆ.
ಮುಂಬೈನ ಶಿವಾಜಿ ಪಾರ್ಕ್ ಚಿತಾಗಾರದಲ್ಲಿ ಸೋಮವಾರ ಸಂಜೆ ಆಶಾ ಭೋಸ್ಲೆ ಅವರ ಅಂತ್ಯಕ್ರಿಯೆಯನ್ನು ಸಕಲ ಸರ್ಕಾರಿ ಗೌರವಗಳೊಂದಿಗೆ ನೆರವೇರಿಸಲಾಯಿತು. ಚಿತ್ರರಂಗದ ಅನೇಕ ಗಣ್ಯರು, ರಾಜಕೀಯ ನಾಯಕರು ಹಾಗೂ 1000 ಕ್ಕೂ ಹೆಚ್ಚು ಅಭಿಮಾನಿಗಳು ತಮ್ಮ ನೆಚ್ಚಿನ ಗಾಯಕಿಯ ಅಂತಿಮ ದರ್ಶನ ಪಡೆದು ಕಂಬನಿ ಮಿಡಿದರು.