ದುಬೈ: ಇರಾನ್ ಹಾಗೂ ಇಸ್ರೇಲ್-ಅಮೆರಿಕ ನಡುವಿನ ಯುದ್ಧದ (Iran Israel War) ಜ್ವಾಲೆ ಈಗ ಸಮುದ್ರ ಮಾರ್ಗಕ್ಕೂ ವ್ಯಾಪಿಸಿದೆ. ಸೋಮವಾರ (ಮಾರ್ಚ್ 30) ದುಬೈ ಸಮೀಪ ಲಂಗರು ಹಾಕಿದ್ದ ಕುವೈತ್ ಒಡೆತನದ ‘ಅಲ್-ಸಲ್ಮಿ’ ಎಂಬ ಕಚ್ಚಾ ತೈಲ ತುಂಬಿದ ಟ್ಯಾಂಕರ್ ಮೇಲೆ ಇರಾನ್ ಡ್ರೋನ್ ದಾಳಿ ನಡೆಸಿದೆ. ಈ ಘಟನೆಯಿಂದಾಗಿ ವಿಶ್ವದ ತೈಲ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಯಾಗಿದ್ದು, ಬೆಲೆಗಳು ದಿಢೀರ್ ಏರಿಕೆಯಾಗಿವೆ.
ಟ್ಯಾಂಕರ್ ಮೇಲೆ ಭೀಕರ ದಾಳಿ:
ಸಂಪೂರ್ಣ ಕಚ್ಚಾ ತೈಲದಿಂದ ತುಂಬಿದ್ದ ಟ್ಯಾಂಕರ್ ಮೇಲೆ ಶಂಕಿತ ಡ್ರೋನ್ ದಾಳಿ ನಡೆದಿದ್ದು, ಹಡಗಿನಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ಹಡಗಿನ ಹಲ್ (Hul) ಭಾಗಕ್ಕೆ ಹಾನಿಯಾಗಿದೆ ಎಂದು ಕುವೈತ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.
ಅದೃಷ್ಟವಶಾತ್ ಹಡಗಿನಲ್ಲಿದ್ದ 24 ಸಿಬ್ಬಂದಿ ಸುರಕ್ಷಿತವಾಗಿದ್ದು, ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಸಮುದ್ರ ಅಗ್ನಿಶಾಮಕ ಪಡೆಗಳು ಬೆಂಕಿಯನ್ನು ನಂದಿಸುವ ಕಾರ್ಯಾಚರಣೆಯಲ್ಲಿ ತೊಡಗಿವೆ. ಟ್ಯಾಂಕರ್‌ನಿಂದ ತೈಲ ಸೋರಿಕೆಯಾಗುವ ಸಾಧ್ಯತೆ ಇದೆ ಎಂದು ‘ಕುವೈತ್ ಪೆಟ್ರೋಲಿಯಂ ಕಾರ್ಪೊರೇಷನ್’ (KPC) ಎಚ್ಚರಿಕೆ ನೀಡಿದೆ.
ಈ ದಾಳಿಯ ಸುದ್ದಿ ಹೊರಬೀಳುತ್ತಿದ್ದಂತೆಯೇ ಜಾಗತಿಕ ಮಾರುಕಟ್ಟೆಯಲ್ಲಿ ತೈಲ ಬೆಲೆಗಳು ಗಗನಕ್ಕೇರಿವೆ. ಯುಎಸ್ ಕಚ್ಚಾ ತೈಲದ ಬೆಲೆ ಬ್ಯಾರೆಲ್‌ಗೆ 3 ಡಾಲರ್ (ಶೇ. 2.9) ಹೆಚ್ಚಳವಾಗಿದ್ದು, ಪ್ರಸ್ತುತ 105.91 ಡಾಲರ್ ತಲುಪಿದೆ. ಯುದ್ಧದ ಭೀತಿಯಿಂದಾಗಿ ಈಗಾಗಲೇ ಏರಿಕೆಯಲ್ಲಿದ್ದ ಬೆಲೆಗಳಿಗೆ ಈ ದಾಳಿ ಮತ್ತಷ್ಟು ಉಪ್ಪು ಸುರಿದಂತಾಗಿದೆ.
ಸೌದಿ ಅರೇಬಿಯಾದಲ್ಲೂ ಸ್ಫೋಟ:
ಇದೇ ವೇಳೆ ಸೌದಿ ಅರೇಬಿಯಾದ ‘ರಾಸ್ ತನುರಾ’ ಬಳಿ ಗ್ರೀಕ್ ಒಡೆತನದ ‘ಎಕ್ಸ್‌ಪ್ರೆಸ್ ರೋಮ್’ ಎಂಬ ಕಂಟೇನರ್ ಹಡಗಿನ ಮೇಲೂ ಎರಡು ಸ್ಫೋಟಕಗಳು ಅಪ್ಪಳಿಸಿವೆ. ಈ ಹಡಗು ಲೈಬೀರಿಯನ್ ಧ್ವಜವನ್ನು ಹೊಂದಿತ್ತು. ಮಾರ್ಚ್ 11ರಂದು ನಡೆದ ಇಂತಹದ್ದೇ ದಾಳಿಯ ಹೊಣೆಯನ್ನು ಇರಾನ್‌ನ ‘ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್’ (IRGC) ಹೊತ್ತುಕೊಂಡಿತ್ತು.
ವಿಶ್ವದ ಒಟ್ಟು ತೈಲ ಸಾಗಣೆಯ ಶೇ. 20ಕ್ಕೂ ಹೆಚ್ಚು ಭಾಗ ಹಾರ್ಮುಜ್ ಜಲಸಂಧಿಯ ಮೂಲಕವೇ ನಡೆಯುತ್ತದೆ. ಇರಾನ್ ಯುದ್ಧದ ಹಿನ್ನೆಲೆಯಲ್ಲಿ ಇಲ್ಲಿ ಹಡಗುಗಳ ಸಂಚಾರ ಈಗಾಗಲೇ ಅಪಾಯಕಾರಿಯಾಗಿದ್ದು, ಇಂದಿನ ಸರಣಿ ದಾಳಿಗಳು ಜಾಗತಿಕ ಆರ್ಥಿಕತೆಗೆ ದೊಡ್ಡ ಹೊಡೆತ ನೀಡುವ ಸಾಧ್ಯತೆ ಇದೆ.