ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಏರಿಕೆ ಹಾಗೂ ನಿರಂತರ ವಿದೇಶಿ ಬಂಡವಾಳ ಹಿಂತೆಗೆತದ ಭಾರಿ ಒತ್ತಡಕ್ಕೆ ಸಿಲುಕಿರುವ ಭಾರತೀಯ ರೂಪಾಯಿ ಮೌಲ್ಯವು ಮಂಗಳವಾರದ ಆರಂಭಿಕ ವಹಿವಾಟಿನಲ್ಲಿ ಮತ್ತಷ್ಟು ಕುಸಿತ ಕಂಡಿದೆ. ಅಮೆರಿಕನ್ ಡಾಲರ್ ಎದುರು ರೂಪಾಯಿ ಮೌಲ್ಯವು 16 ಪೈಸೆಗಳಷ್ಟು ಇಳಿಕೆಯಾಗುವ ಮೂಲಕ, ಮಾನಸಿಕವಾಗಿ ಅತ್ಯಂತ ಪ್ರಮುಖವಾಗಿದ್ದ 96 ರ ಗಡಿಯನ್ನು ದಾಟಿ ಕೆಳಮುಖವಾಗಿ ಚಲಿಸಿದೆ.
ಅಂತರ್‌ಬ್ಯಾಂಕ್ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ಮಂಗಳವಾರ ಬೆಳಿಗ್ಗೆ 96.03 ರ ಮಟ್ಟದಲ್ಲಿ ವಹಿವಾಟು ಆರಂಭಿಸಿದ ರೂಪಾಯಿ, ಕೆಲವೇ ಹೊತ್ತಿನಲ್ಲಿ 96.13 ಕ್ಕೆ ಕುಸಿಯಿತು. ಸೋಮವಾರದ ವಹಿವಾಟಿನ ಅಂತ್ಯಕ್ಕೆ ಡಾಲರ್ ಎದುರು ರೂಪಾಯಿ ಮೌಲ್ಯವು 95.97 ರಷ್ಟಿತ್ತು. ದೃಢವಾದ ತೈಲ ಬೆಲೆಗಳು ಮತ್ತು ಏರುತ್ತಿರುವ ಅಮೆರಿಕದ ಖಜಾನೆ ಇಳುವರಿಯು ಭಾರತ ಸೇರಿದಂತೆ ಉದಯೋನ್ಮುಖ ಮಾರುಕಟ್ಟೆಗಳಿಂದ ವಿದೇಶಿ ಹೂಡಿಕೆಗಳು ಹೊರಹೋಗಲು ಪ್ರಮುಖ ಕಾರಣವಾಗಿವೆ ಎಂದು ಫಾರೆಕ್ಸ್ ವ್ಯಾಪಾರಿಗಳು ವಿಶ್ಲೇಷಿಸಿದ್ದಾರೆ.
ರೂಪಾಯಿ ಮೌಲ್ಯದ ಮುಂದಿನ ಹಾದಿಯ ಬಗ್ಗೆ ವಿಶ್ಲೇಷಿಸಿರುವ ಕೋಟಕ್ ಸೆಕ್ಯುರಿಟೀಸ್‌ನ ಸರಕು ಮತ್ತು ಕರೆನ್ಸಿ ಸಂಶೋಧನಾ ವಿಭಾಗದ ಮುಖ್ಯಸ್ಥ ಅನಿಂಧ್ಯ ಬ್ಯಾನರ್ಜಿ, ಮುಂಬರುವ ದಿನಗಳಲ್ಲಿ ಡಾಲರ್ ಮೌಲ್ಯ 96.50 ಕ್ಕೆ ತಲುಪುವುದನ್ನು ನಾವು ನೋಡಬಹುದು ಮತ್ತು ಇದು 96.50 ರ ಗಡಿಯನ್ನು ಸ್ಪಷ್ಟವಾಗಿ ದಾಟಿದರೆ 98 ರ ಕಡೆಗೆ ಸಾಗುವ ಸಾಧ್ಯತೆಗಳು ನಿಚ್ಚಳವಾಗಿವೆ ಎಂದಿದ್ದಾರೆ. ಸದ್ಯಕ್ಕೆ 95.50 ರ ಮಟ್ಟವು ಪ್ರಮುಖ ಬೆಂಬಲವಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಈ ಆತಂಕದ ನಡುವೆಯೂ ಆಗಸ್ಟ್ ತಿಂಗಳಲ್ಲಿ ಕೈಗಾರಿಕಾ ಉತ್ಪಾದನೆಯು ಶೇಕಡಾ 8 ರಷ್ಟು ಬೆಳವಣಿಗೆ ಕಂಡಿರುವುದು ಹಾಗೂ ರಿಸರ್ವ್ ಬ್ಯಾಂಕ್ (RBI) ಈ ತಿಂಗಳು ಬಲವಾದ ಬೇಡಿಕೆಯೊಂದಿಗೆ ಬಾಂಡ್ ಮಾರಾಟದ ದೊಡ್ಡ ಕಾರ್ಯಕ್ರಮವನ್ನು ಪೂರ್ಣಗೊಳಿಸಿರುವುದು ದೇಶೀಯ ಆರ್ಥಿಕತೆಯ ಬಲವನ್ನು ತೋರಿಸುತ್ತದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ. ಇದೇ ವೇಳೆ 6 ಪ್ರಮುಖ ಕರೆನ್ಸಿಗಳ ಎದುರು ಅಮೆರಿಕನ್ ಡಾಲರ್‌ನ ಬಲವನ್ನು ಅಳೆಯುವ ಡಾಲರ್ ಸೂಚ್ಯಂಕವು ಶೇಕಡಾ 0.04 ರಷ್ಟು ಏರಿಕೆ ಕಂಡು 101.23 ರಲ್ಲಿ ವಹಿವಾಟು ನಡೆಸುತ್ತಿದೆ.
ಮಧ್ಯಪ್ರಾಚ್ಯದ ಹಾರ್ಮುಜ್ ಜಲಸಂಧಿಯ ಮೂಲಕ ನಡೆಯುವ ಕಚ್ಚಾ ತೈಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗುವ ಭೀತಿಯಿಂದಾಗಿ ಜಾಗತಿಕ ತೈಲ ಮಾನದಂಡವಾದ ಬ್ರೆಂಟ್ ಕ್ರೂಡ್ ಫ್ಯೂಚರ್ಸ್ ವಹಿವಾಟಿನಲ್ಲಿ ಶೇಕಡಾ 1.51 ರಷ್ಟು ಏರಿಕೆ ಕಂಡು ಪ್ರತಿ ಬ್ಯಾರೆಲ್‌ಗೆ 106.87 ಡಾಲರ್ ತಲುಪಿದೆ. ತೈಲ ಬೆಲೆ ಏರಿಕೆ ಹಾಗೂ ರೂಪಾಯಿ ಮೌಲ್ಯ ಕುಸಿತದ ನೇರ ಪರಿಣಾಮ ದೇಶೀಯ ಷೇರುಪೇಟೆಯ ಮೇಲೂ ಬೀರಿದ್ದು, ಮಂಗಳವಾರದ ಆರಂಭಿಕ ವಹಿವಾಟಿನಲ್ಲಿ ಬಿಎಸ್‌ಇ ಸೆನ್ಸೆಕ್ಸ್ 503 ಅಂಕಗಳ ಭಾರಿ ಕುಸಿತ ಕಂಡು 72,260.09 ಮಟ್ಟಕ್ಕೆ ತಲುಪಿದೆ.
ಅದೇ ರೀತಿ ಎನ್‌ಎಸ್‌ಇ ನಿಫ್ಟಿ 151 ಅಂಕಗಳ ಇಳಿಕೆಯೊಂದಿಗೆ 22,626.50 ಮಟ್ಟಕ್ಕೆ ಕುಸಿದಿದೆ. ಷೇರುಪೇಟೆಯ ಅಂಕಿಅಂಶಗಳ ಪ್ರಕಾರ, ಸೋಮವಾರದ ವಹಿವಾಟಿನಲ್ಲಿ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (FIIs) ಬರೋಬ್ಬರಿ 5,353.22 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿ ಮಾರುಕಟ್ಟೆಯಿಂದ ಬಂಡವಾಳವನ್ನು ಹಿಂಪಡೆದಿದ್ದಾರೆ.