ಹಣಕಾಸು ಮತ್ತು ಬ್ಯಾಂಕಿಂಗ್ ಕ್ಷೇತ್ರಗಳಲ್ಲಿ ಕೃತಕ ಬುದ್ಧಿಮತ್ತೆಯ (AI) ಬಳಕೆಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯುವ ನಿಟ್ಟಿನಲ್ಲಿ ಓಪನ್ ಎಐ (OpenAI) ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಹೂಡಿಕೆ ಬ್ಯಾಂಕಿಂಗ್ (Investment Banking) ಮತ್ತು ಈಕ್ವಿಟಿ ರಿಸರ್ಚ್ (Equity Research) ತಂಡಗಳ ಅಗತ್ಯಗಳನ್ನು ಪೂರೈಸುವ ಉದ್ದೇಶದಿಂದ ವಿನ್ಯಾಸಗೊಳಿಸಲಾದ ‘ಚಾಟ್ಜಿಪಿಟಿ ಫಾರ್ ಫೈನಾನ್ಷಿಯಲ್ ಸರ್ವೀಸಸ್’ (ChatGPT for Financial Services) ಎಂಬ ಹಣಕಾಸು ಕೇಂದ್ರಿತ ನೂತನ ಆವೃತ್ತಿಯನ್ನು ಓಪನ್ ಎಐ ಬಿಡುಗಡೆ ಮಾಡಿದೆ.
ಮೋರ್ಗನ್ ಸ್ಟಾನ್ಲಿ (Morgan Stanley) ಮತ್ತು ಎವರ್ಕೋರ್ (Evercore) ನಂತಹ ಪ್ರಮುಖ ಹಣಕಾಸು ಸಂಸ್ಥೆಗಳ ಸಹಭಾಗಿತ್ವದಲ್ಲಿ ಈ ಉತ್ಪನ್ನವನ್ನು ಅಭಿವೃದ್ಧಿಪಡಿಸಲಾಗಿದ್ದು, ಆರ್ಥಿಕ ವಲಯದ ವೃತ್ತಿಪರರು ಎದುರಿಸುತ್ತಿರುವ ಪ್ರಮುಖ ಸವಾಲುಗಳಿಗೆ ಇದು ಪರಿಹಾರ ಒದಗಿಸಲಿದೆ. ನಿಖರವಾದ ಡೇಟಾ ಲಭ್ಯತೆ ಮತ್ತು ಉತ್ತಮ ಗುಣಮಟ್ಟದ ವರದಿಗಳ ತಯಾರಿಕೆಯು ಈ ವಲಯದ ಅತಿದೊಡ್ಡ ಸವಾಲುಗಳಾಗಿದ್ದವು ಎಂದು ಓಪನ್ ಎಐ ತಿಳಿಸಿದೆ.
ಈ ನೂತನ ಪ್ಲಾಟ್ಫಾರ್ಮ್ನ ಪ್ರಮುಖ ಆಕರ್ಷಣೆಯೆಂದರೆ, ಇದರಲ್ಲಿ Daloopa, PitchBook, LSEG News ಮತ್ತು Crunchbase ನಂತಹ ಪ್ರತಿಷ್ಠಿತ ಮೂಲಗಳ ಪ್ರೀಮಿಯಂ ಹಣಕಾಸು ಡೇಟಾಸೆಟ್ಗಳನ್ನು (financial datasets) ಅಂತರ್ಗತವಾಗಿ ಅಳವಡಿಸಲಾಗಿದೆ. ಇದರಿಂದಾಗಿ ಬಳಕೆದಾರರು ಪ್ರತ್ಯೇಕ ಕಾಂಟ್ರಾಕ್ಟ್ಗಳು ಅಥವಾ ಕನೆಕ್ಟರ್ಗಳಿಲ್ಲದೆ, ಕಂಪನಿಗಳ ಆದಾಯದ ವರದಿಗಳು (earnings transcripts), ಹಣಕಾಸು ಹೇಳಿಕೆಗಳು, ಖಾಸಗಿ ಕಂಪನಿಗಳ ಮಾಹಿತಿ ಸೇರಿದಂತೆ ನಿಖರವಾದ ಡೇಟಾವನ್ನು ಸುಲಭವಾಗಿ ಪಡೆಯಬಹುದು.
ಬ್ಯಾಂಕರ್ಗಳು ಪಿ&ಎಲ್ (P&L) ಮತ್ತು ಇಬಿಐಟಿಡಿಎ (EBITDA) ವಿಶ್ಲೇಷಣೆ ನಡೆಸುವಾಗ ನೇರವಾಗಿ ಮೂಲ ದಾಖಲೆಗಳನ್ನು ಪರಿಶೀಲಿಸಲು ಈ ವ್ಯವಸ್ಥೆ ನೆರವಾಗುತ್ತದೆ. ಜೊತೆಗೆ, ವಿಶ್ಲೇಷಣೆಗಳನ್ನು ಅಂತಿಮ ವರದಿಗಳಾಗಿ ಪರಿವರ್ತಿಸಲು, ತಮ್ಮದೇ ಸಂಸ್ಥೆಯ ಟೆಂಪ್ಲೇಟ್ಗಳನ್ನು (Excel, Word, PowerPoint) ಬಳಸಿ ಕ್ಷಣಾರ್ಧದಲ್ಲಿ ವ್ಯಾಲ್ಯುಯೇಶನ್ ಮಾಡೆಲ್ ಹಾಗೂ ಪಿಚ್ಬುಕ್ಗಳನ್ನು (Pitchbooks) ಸಿದ್ಧಪಡಿಸಲು ಇದು ಅನುವು ಮಾಡಿಕೊಡುತ್ತದೆ.
ಹಣಕಾಸು ಸಂಸ್ಥೆಗಳಲ್ಲಿ ಭದ್ರತೆ ಮತ್ತು ಗ್ರಾಹಕರ ಗೌಪ್ಯತೆ ಅತ್ಯಂತ ಪ್ರಮುಖವಾಗಿರುವುದರಿಂದ, ಈ ಆವೃತ್ತಿಯಲ್ಲಿ ‘ಚಾಟ್ಜಿಪಿಟಿ ಎಂಟರ್ಪ್ರೈಸ್’ ಮಾದರಿಯ ಸುಧಾರಿತ ಭದ್ರತಾ ವೈಶಿಷ್ಟ್ಯಗಳನ್ನು ಒದಗಿಸಲಾಗಿದೆ. SAML SSO, SCIM ಪ್ರಾವಿಷನಿಂಗ್ ಹಾಗೂ ರೋಲ್-ಬೇಸ್ಡ್ ಆಕ್ಸೆಸ್ ಕಂಟ್ರೋಲ್ಸ್ ಮೂಲಕ ಭದ್ರತೆಯನ್ನು ಖಚಿತಪಡಿಸಲಾಗಿದೆ.
ಪ್ರಮುಖವಾಗಿ, ಸಂಸ್ಥೆಗಳ ಸೂಕ್ಷ್ಮ ವ್ಯವಹಾರದ ಡೇಟಾವನ್ನು ಓಪನ್ ಎಐ ತನ್ನ ಮಾಡೆಲ್ಗಳಿಗೆ ತರಬೇತಿ ನೀಡಲು (Training) ಬಳಸುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ಡೇಟಾವನ್ನು ಸಂಪೂರ್ಣವಾಗಿ ಎನ್ಕ್ರಿಪ್ಟ್ ಮಾಡಲಾಗಿದ್ದು, ಸಂಸ್ಥೆಗಳ ಆಂತರಿಕ ಮಾಹಿತಿ ಸುರಕ್ಷಿತವಾಗಿರಲು ಮಲ್ಟಿಪಲ್ ವರ್ಕ್ಸ್ಪೇಸ್ಗಳನ್ನು (multiple workspaces) ರಚಿಸಲು ಮತ್ತು ನಿರ್ವಾಹಕರಿಗೆ ಸಂಪೂರ್ಣ ನಿಯಂತ್ರಣ ಹೊಂದಲು ಅವಕಾಶ ಕಲ್ಪಿಸಲಾಗಿದೆ.