ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಜನತೆ ಹಿಂದೆಂದೂ ಕಂಡು ಕೇಳರಿಯದಂತಹ, ಎದೆ ಝಲ್ಲೆನಿಸುವ ಘೋರ ಹ*ತ್ಯಾಕಾಂಡವೊಂದು ಬೆಳಕಿಗೆ ಬಂದಿದೆ. ಆಸ್ತಿ ವಿವಾದ ಹಾಗೂ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಕ್ಯಾಬ್ ಚಾಲಕನೊಬ್ಬ ತನ್ನ ಪತ್ನಿ, 7 ವರ್ಷದ ಮಗು, ಅತ್ತೆ ಸೇರಿ ಒಂದೇ ಕುಟುಂಬದ ಬರೋಬ್ಬರಿ 7 ಜನರನ್ನು ಕೇವಲ ಎರಡೇ ದಿನಗಳಲ್ಲಿ ಬರ್ಬರವಾಗಿ ಕೊ*ಲೆ ಮಾಡಿದ್ದಾನೆ. ಶ್ರೀರಾಂಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಈ ಅಮಾನವೀಯ ಕೃತ್ಯ ನಡೆದಿದ್ದು, 53 ವರ್ಷದ ಕ್ಯಾಬ್ ಚಾಲಕ ಶೇಖರ್ ಎಂಬಾತನೇ ಈ ಪೈಶಾಚಿಕ ಕೃತ್ಯವೆಸಗಿದ ‘ಸೈಕೋ ಕಿಲ್ಲರ್’ ಆಗಿದ್ದಾನೆ.
ಬಲಿಯಾದವರು ಯಾರು? ಕೊಲೆಗೆ ಕಾರಣವೇನು?
ಆರೋಪಿ ಶೇಖರ್‌ನ ಪತ್ನಿ ಸುನೀತಾ, ಅತ್ತೆ ರೂಪಾವತಿ, ಇಬ್ಬರು ಬಾಮೈದರಾದ ಶಿವಕುಮಾರ್ ಮತ್ತು ಶಂಕರ್, ಬಾಮೈದರ ಪತ್ನಿಯರಾದ (ಸೊಸೆಯಂದಿರು) ದಿವ್ಯಾ ಮತ್ತು ನಳಿನಿ ಹಾಗೂ 7 ವರ್ಷದ ಮಗು ಪುನೀತ್ ಈ ಹ*ತ್ಯಾಕಾಂಡದಲ್ಲಿ ಬ*ಲಿಯಾದ ದುರ್ದೈವಿಗಳು.
ಆರೋಪಿ ಶೇಖರ್‌ಗೆ ತನ್ನ ಹೆಂಡತಿಯೊಂದಿಗೆ ಆಸ್ತಿ ವಿಚಾರವಾಗಿ ಆಗಾಗ ಗಲಾಟೆ ನಡೆಯುತ್ತಿತ್ತು. ಅಲ್ಲದೆ, ಆತ ತನ್ನ ಮಗಳಿಗೆ ಕಿರುಕುಳ ನೀಡುತ್ತಿದ್ದ ಎಂಬ ಕಾರಣಕ್ಕೆ ಅತ್ತೆ-ಮಾವ ತರಾಟೆಗೆ ತೆಗೆದುಕೊಂಡಿದ್ದರು. ಇದೇ ದ್ವೇಷದ ಹಿನ್ನೆಲೆಯಲ್ಲಿ ರೊಚ್ಚಿಗೆದ್ದಿದ್ದ ಶೇಖರ್, ಇಡೀ ಕುಟುಂಬವನ್ನೇ ಮುಗಿಸಲು ಸಂಚು ರೂಪಿಸಿದ್ದ. ಈ ಘೋರ ಕೃತ್ಯದಲ್ಲಿ ಆತನ 16 ವರ್ಷದ ಮಗಳೇ ಸಾಥ್ ನೀಡಿದ್ದಾಳೆ ಎಂಬ ಆಘಾತಕಾರಿ ವಿಚಾರವೂ ಪೊಲೀಸ್ ವಿಚಾರಣೆ ವೇಳೆ ಬಯಲಾಗಿದೆ.
ಮನೆಗೆ ಕರೆಸಿ ಒರಳುಕಲ್ಲಿನಿಂದ ಜಜ್ಜಿ ಹ*ತ್ಯೆ!
ಆರೋಪಿ ಶೇಖರ್ ಮೊದಲಿಗೆ ತನ್ನ ಪತ್ನಿ ಸುನೀತಾಳ ತಲೆಗೆ ರುಬ್ಬುಗುಂಡಿನಿಂದ (ಒರಳುಕಲ್ಲು) ಹೊಡೆದು ಬರ್ಬರವಾಗಿ ಹ*ತ್ಯೆ ಮಾಡಿದ್ದಾನೆ. ಬಳಿಕ ಆಕೆಯ ಶ*ವವನ್ನು ನಂದಿಬೆಟ್ಟದ ಬಳಿ ಎಸೆದು ಬಂದು, ಪತ್ನಿ ಪ್ರವಾಸಕ್ಕೆ ಹೋಗಿದ್ದಾಳೆಂದು ನಂಬಿಸಿ ಆಕೆಯ ಮೊಬೈಲ್ ಸ್ವಿಚ್ ಆಫ್ ಮಾಡಿದ್ದ.
ಮರುದಿನ ಮದ್ಯದ ಪಾರ್ಟಿ ಮಾಡುವ ನೆಪದಲ್ಲಿ ಬಾಮೈದರಾದ ಶಿವಕುಮಾರ್ ಮತ್ತು ಶಂಕರ್‌ನನ್ನು ಮನೆಗೆ ಆಹ್ವಾನಿಸಿ ಅವರನ್ನೂ ಹ*ತ್ಯೆಗೈದಿದ್ದಾನೆ. ತರುವಾಯ ಅತ್ತೆ, ಇಬ್ಬರು ಸೊಸೆಯಂದಿರು ಹಾಗೂ 7 ವರ್ಷದ ಮಗುವನ್ನೂ ಒಬ್ಬೊಬ್ಬರನ್ನಾಗಿಯೇ ಮನೆಗೆ ಕರೆಸಿಕೊಂಡು, ಊಟದಲ್ಲಿ ವಿಷವಿಟ್ಟು ಹಾಗೂ ಒರಳುಕಲ್ಲಿನಿಂದ ಜಜ್ಜಿ ಭೀಕರವಾಗಿ ಕೊ*ಲೆ ಮಾಡಿದ್ದಾನೆ.
ಕ್ಯಾಬ್‌ನಲ್ಲೇ ಶ*ವ ಸಾಗಾಟ, ನಾಪತ್ತೆ ನಾಟಕ!
ಕೊ*ಲೆಯ ಬಳಿಕ ಸಿಕ್ಕಿಬೀಳದಿರಲು ಆರೋಪಿ ರಾಸಾಯನಿಕಗಳನ್ನು (ಕೆಮಿಕಲ್) ಬಳಸಿ ಇಡೀ ಮನೆಯ ರಕ್ತದ ಕಲೆಗಳನ್ನು ತೊಳೆದು ಸ್ವಚ್ಛಗೊಳಿಸಿದ್ದಾನೆ. ತಾನು ಓಡಿಸುತ್ತಿದ್ದ ಕ್ಯಾಬ್‌ನಲ್ಲೇ 7 ಜನರ ಶ*ವಗಳನ್ನು ಸಾಗಿಸಿ, ನಂದಿಬೆಟ್ಟ, ಚಾಮುಂಡಿಬೆಟ್ಟ, ಸೇಲಂ ಹಾಗೂ ಚಾರ್ಮಾಡಿ ಘಾಟ್‌ನ ಬೇರೆ ಬೇರೆ ದಿಕ್ಕುಗಳಲ್ಲಿ ಎಸೆದು ಬಂದಿದ್ದಾನೆ. ಕೃತ್ಯ ಎಸಗಿದ ಬಳಿಕ 15 ದಿನಗಳ ಹಿಂದೆ ತಾನೇ ಖುದ್ದಾಗಿ ಪೊಲೀಸ್ ಠಾಣೆಗೆ ತೆರಳಿ, ತನ್ನ ಪತ್ನಿ ಹಾಗೂ ಆಕೆಯ ಮನೆಯವರು ನಾಪತ್ತೆಯಾಗಿದ್ದಾರೆ ಎಂದು ದೂರು ನೀಡಿ ನಾಟಕವಾಡಿದ್ದ.
ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ ರಾಜಾಜಿನಗರ ಪೊಲೀಸರಿಗೆ ಶೇಖರ್‌ನ ವರ್ತನೆ ಹಾಗೂ ಹೇಳಿಕೆಗಳ ಮೇಲೆ ಅನುಮಾನ ಬಂದಿದೆ. ಆತನನ್ನು ವಶಕ್ಕೆ ಪಡೆದು ತೀವ್ರ ವಿಚಾರಣೆಗೊಳಪಡಿಸಿದಾಗ ಈ 7 ಜನರ ನರಮೇಧದ ಸತ್ಯ ಬಾಯ್ಬಿಟ್ಟಿದ್ದಾನೆ. ಸದ್ಯ ಆರೋಪಿಯನ್ನು ಬಂಧಿಸಿರುವ ಪೊಲೀಸರು, ಕೃತ್ಯಕ್ಕೆ ಬಳಸಿದ್ದ ಒರಳುಕಲ್ಲು ಹಾಗೂ ಕಾರನ್ನು ಜಪ್ತಿ ಮಾಡಿದ್ದಾರೆ. ಡಿಸಿಪಿ ನೇತೃತ್ವದಲ್ಲಿ ಮೂವರು ಎಸಿಪಿಗಳನ್ನೊಳಗೊಂಡ ವಿಶೇಷ ತನಿಖಾ ತಂಡವನ್ನು ರಚಿಸಲಾಗಿದ್ದು, ಆರೋಪಿಯನ್ನು ನಂದಿಬೆಟ್ಟಕ್ಕೆ ಕರೆದೊಯ್ದು ಮಗು ಪುನೀತ್‌ನ ಮೃ*ತದೇಹವನ್ನು ಪತ್ತೆಹಚ್ಚಲಾಗಿದೆ. ಉಳಿದ ಮೃ*ತದೇಹಗಳ ಪತ್ತೆಗಾಗಿ ಕಾರ್ಯಾಚರಣೆ ಮುಂದುವರಿದಿದೆ.