ಶುಕ್ರವಾರದ (ಏಪ್ರಿಲ್ 24) ಆರಂಭಿಕ ವಹಿವಾಟಿನಲ್ಲಿ ದೇಶೀಯ ಷೇರುಪೇಟೆ ಮಂಕಾಗಿದೆ. ಹೆಚ್ಚುತ್ತಿರುವ ಜಾಗತಿಕ ಭೌಗೋಳಿಕ ಉದ್ವಿಗ್ನತೆ ಹಾಗೂ 4ನೇ ತ್ರೈಮಾಸಿಕದ ಗಳಿಕೆ ವರದಿಗಳ ಹಿನ್ನೆಲೆಯಲ್ಲಿ ಹೂಡಿಕೆದಾರರು ಎಚ್ಚರಿಕೆಯ ಹೆಜ್ಜೆ ಇಟ್ಟಿದ್ದು, ಮಾರುಕಟ್ಟೆಯಲ್ಲಿ ನಕಾರಾತ್ಮಕ ವಾತಾವರಣ ಕಂಡುಬಂದಿದೆ. ಐಟಿ, ಹಣಕಾಸು ಹಾಗೂ ಫಾರ್ಮಾ ವಲಯದ ಷೇರುಗಳಲ್ಲಿ ಕಂಡುಬಂದ ತೀವ್ರ ಮಾರಾಟದ ಒತ್ತಡದಿಂದಾಗಿ ಬಿಎಸ್ಇ ಸೆನ್ಸೆಕ್ಸ್ (Sensex) 400 ಅಂಕ ಅಥವಾ ಶೇ. 0.51 ರಷ್ಟು ಕುಸಿದು 77,263 ಮಟ್ಟದಲ್ಲಿ ವಹಿವಾಟು ನಡೆಸುತ್ತಿದೆ. ಅಂತೆಯೇ, ಎನ್ಎಸ್ಇ ನಿಫ್ಟಿ (Nifty) 100 ಅಂಕ ಅಥವಾ ಶೇ. 0.41 ರಷ್ಟು ಇಳಿಕೆ ಕಂಡಿದೆ. ಆದಾಗ್ಯೂ, ಎಫ್ಎಂಸಿಜಿ (FMCG) ಮತ್ತು ರಾಸಾಯನಿಕ ವಲಯದ ಷೇರುಗಳು ಆರಂಭಿಕ ಕುಸಿತದ ನಡುವೆಯೂ ಮಾರುಕಟ್ಟೆಗೆ ಕೊಂಚ ಬೆಂಬಲ ಒದಗಿಸಿವೆ.
ನಷ್ಟ ಅನುಭವಿಸಿದ ಪ್ರಮುಖ ಷೇರುಗಳು ಹಾಗೂ ವಲಯಗಳು: ಸಿಪ್ಲಾ, ಇನ್ಫೋಸಿಸ್, ಡಾ. ರೆಡ್ಡೀಸ್ ಲ್ಯಾಬೋರೇಟರೀಸ್, ಸನ್ ಫಾರ್ಮಾ, ಟಿಸಿಎಸ್ ಹಾಗೂ ಐಸಿಐಸಿಐ ಬ್ಯಾಂಕ್ ಷೇರುಗಳು ಅತಿ ಹೆಚ್ಚು ನಷ್ಟ ಅನುಭವಿಸಿದ ಪ್ರಮುಖ ಕಂಪನಿಗಳಾಗಿವೆ. ವಲಯವಾರು ಸೂಚ್ಯಂಕಗಳನ್ನು ಗಮನಿಸುವುದಾದರೆ;
- ನಿಫ್ಟಿ ಐಟಿ (Nifty IT): ಶೇ. 1.57 ರಷ್ಟು ಕುಸಿತ.
- ನಿಫ್ಟಿ ಪ್ರೈವೇಟ್ ಬ್ಯಾಂಕ್: ಶೇ. 0.31 ರಷ್ಟು ಇಳಿಕೆ.
- ನಿಫ್ಟಿ ಫಾರ್ಮಾ: ಶೇ. 0.27 ರಷ್ಟು ಇಳಿಕೆ ಕಂಡಿದೆ.
ಮಾರುಕಟ್ಟೆ ತಜ್ಞರ ಸಲಹೆ ಏನು?
ಪ್ರಸ್ತುತ ಜಾಗತಿಕ ಅನಿಶ್ಚಿತತೆಗಳು ಮತ್ತು ಮಾರುಕಟ್ಟೆಯ ತೀವ್ರ ಏರಿಳಿತಗಳ ಹಿನ್ನೆಲೆಯಲ್ಲಿ ಹೂಡಿಕೆದಾರರು ಆಯ್ದ ಷೇರುಗಳಲ್ಲಿ ಎಚ್ಚರಿಕೆಯಿಂದ ಹೂಡಿಕೆ ಮಾಡುವುದು ಸೂಕ್ತ ಎಂದು ಮಾರುಕಟ್ಟೆ ತಜ್ಞರು ಸಲಹೆ ನೀಡಿದ್ದಾರೆ. “ಮಾರುಕಟ್ಟೆ ಕುಸಿತ ಕಂಡಾಗ ಆರ್ಥಿಕವಾಗಿ ಬಲಿಷ್ಠವಾಗಿರುವ ಷೇರುಗಳನ್ನು ಖರೀದಿಸಲು ಆದ್ಯತೆ ನೀಡಿ. ನಿಫ್ಟಿ 24,500 ಮಟ್ಟವನ್ನು ಸ್ಪಷ್ಟವಾಗಿ ದಾಟಿ, ಅಲ್ಲಿಯೇ ಸ್ಥಿರತೆ ಕಾಯ್ದುಕೊಂಡರೆ ಮಾತ್ರ ಹೊಸ ‘ಲಾಂಗ್ ಪೊಸಿಷನ್’ (Long positions) ತೆಗೆದುಕೊಳ್ಳುವುದು ಸೂಕ್ತ” ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಭೌಗೋಳಿಕ ರಾಜಕೀಯ ಬೆಳವಣಿಗೆಗಳು ಮತ್ತು ಕಚ್ಚಾ ತೈಲ ಬೆಲೆಗಳ ಏರಿಳಿತಗಳು ಮುಂದಿನ ದಿನಗಳಲ್ಲಿ ಮಾರುಕಟ್ಟೆಯ ದಿಕ್ಕನ್ನು ನಿರ್ಧರಿಸಲಿವೆ.
ಕಚ್ಚಾ ತೈಲ ಏರಿಕೆ, ವಿದೇಶಿ ಹೂಡಿಕೆದಾರರಿಂದ ಮಾರಾಟ ಮುಂದುವರಿಕೆ:
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕಚ್ಚಾ ತೈಲದ (Brent crude) ಬೆಲೆ ಶೇ. 2 ರಷ್ಟು ಜಿಗಿದು ಬ್ಯಾರೆಲ್ಗೆ 107 ಡಾಲರ್ಗೆ ತಲುಪಿದ್ದರೆ, ಯುಎಸ್ ವೆಸ್ಟ್ ಟೆಕ್ಸಾಸ್ ಇಂಟರ್ಮೀಡಿಯೇಟ್ (WTI) ಶೇ. 2 ರಷ್ಟು ಏರಿಕೆ ಕಂಡು 97.6 ಡಾಲರ್ಗೆ ತಲುಪಿದೆ.
ಏಷ್ಯನ್ ಮಾರುಕಟ್ಟೆಗಳಲ್ಲಿ ಜಪಾನ್ನ ನಿಕ್ಕಿ ಶೇ. 0.43 ರಷ್ಟು ಏರಿಕೆ (59,394) ಕಂಡಿದ್ದರೆ, ಹ್ಯಾಂಗ್ ಸೆಂಗ್ ಶೇ. 0.37 ರಷ್ಟು (25,819) ಹಾಗೂ ಕೊಸ್ಪಿ ಶೇ. 0.40 ರಷ್ಟು (6,450.15) ಕುಸಿತ ದಾಖಲಿಸಿವೆ. ಸಾಂಸ್ಥಿಕ ಹೂಡಿಕೆದಾರರ ವಿಚಾರಕ್ಕೆ ಬಂದರೆ, ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (FII) ಗುರುವಾರ ಸತತ 4ನೇ ದಿನವೂ ಮಾರಾಟ ಮುಂದುವರಿಸಿದ್ದು, ಬರೋಬ್ಬರಿ 3,254 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ಆದರೆ, ದೇಶೀಯ ಸಾಂಸ್ಥಿಕ ಹೂಡಿಕೆದಾರರು (DII) 941 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಖರೀದಿಸುವ ಮೂಲಕ ಮಾರುಕಟ್ಟೆಗೆ ಕೊಂಚ ಆಸರೆಯಾಗಿದ್ದಾರೆ.