ಕೆಲಸ ಕಳೆದುಕೊಂಡು ಕಂಗಾಲಾಗಿದ್ದ ಉದ್ಯೋಗಿಯೊಬ್ಬರಿಗೆ ಅದೇ ದಿನ ಅನಿರೀಕ್ಷಿತವಾಗಿ ಭಾರಿ ಮೊತ್ತದ ವೇತನದ ಹೊಸ ಉದ್ಯೋಗವೊಂದು ಒಲಿದುಬಂದಿದೆ. ಕಳೆದ ನಾಲ್ಕೂವರೆ ವರ್ಷಗಳಿಂದ ತಿಂಗಳಿಗೆ 70 ಸಾವಿರ ರೂಪಾಯಿ ಸಂಬಳ ಪಡೆಯುತ್ತಿದ್ದ ಈ ಉದ್ಯೋಗಿ, ಲೇಆಫ್ಗೆ ತುತ್ತಾದ ಬೆನ್ನಲ್ಲೇ ಇದೀಗ ತಿಂಗಳಿಗೆ 1.58 ಲಕ್ಷ ರೂಪಾಯಿ ವೇತನದ ಹೊಸ ಆಫರ್ ಪಡೆದು ಅಕ್ಷರಶಃ ದಂಗಾಗಿದ್ದಾರೆ. ತಮ್ಮ ಹಿಂದಿನ ವೇತನಕ್ಕಿಂತ ದುಪ್ಪಟ್ಟು ಸಂಬಳದ ಈ ಆಫರ್ ಕಂಡು ಇದು ನಿಜವೋ ಅಥವಾ ಕನಸೋ ಎಂದು ಸ್ವತಃ ಅವರೇ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
ರೆಡ್ಡಿಟ್ನಲ್ಲಿ ವೈರಲ್ ಆದ ಉದ್ಯೋಗಿಯ ಪೋಸ್ಟ್
ಈ ಕುರಿತು ಉದ್ಯೋಗಿಯು ರೆಡ್ಡಿಟ್ (Reddit) ಜಾಲತಾಣದಲ್ಲಿ “ಸಂಬಳದ ಹೆಚ್ಚಳವು ನನ್ನನ್ನು ಆಘಾತಕ್ಕೀಡುಮಾಡಿದೆ” ಎಂಬ ಶೀರ್ಷಿಕೆಯಡಿ ತಮ್ಮ ಅನುಭವವನ್ನು ಹಂಚಿಕೊಂಡಿದ್ದಾರೆ. ಕಂಪನಿಯ ಆಂತರಿಕ ಬದಲಾವಣೆಗಳ (Restructuring) ನೆಪವೊಡ್ಡಿ ಇತ್ತೀಚೆಗಷ್ಟೇ ಅವರನ್ನು ಕೆಲಸದಿಂದ ದಿಢೀರ್ ಆಗಿ ತೆಗೆದುಹಾಕಲಾಗಿತ್ತು. ಲೇಆಫ್ ಆಘಾತದಿಂದ ಹೊರಬರಲಾಗದೆ, ಪರಿಹಾರದ ಮೊತ್ತದ (Severance payout) ವಿಚಾರವಾಗಿ ಮಾನವ ಸಂಪನ್ಮೂಲ ವಿಭಾಗದ (HR) ಜೊತೆ ವಾಗ್ವಾದ ನಡೆಸುತ್ತಿದ್ದ ಅದೇ ದಿನ, ವಿದೇಶಿ ಕಂಪನಿಯೊಂದರಿಂದ ಈ ಬಂಪರ್ ಉದ್ಯೋಗದ ಆಫರ್ ಬಂದಿರುವುದಾಗಿ ಅವರು ಬರೆದುಕೊಂಡಿದ್ದಾರೆ.
ಹೊಸ ಉದ್ಯೋಗದ ಸ್ವರೂಪ ಮತ್ತು ಅಚ್ಚರಿ
ಹೊಸ ಕಂಪನಿಯು ಭಾರತದ ಹೊರಗಿದ್ದು, ಇದು ಸಂಪೂರ್ಣವಾಗಿ ಮನೆಯಿಂದಲೇ ಕೆಲಸ ಮಾಡುವ (Work From Home) ಅವಕಾಶವನ್ನು ಕಲ್ಪಿಸಿದೆ. ಗ್ರಾಹಕರಿಗೆ ಉತ್ಪನ್ನಗಳನ್ನು ಬಳಸಲು ಸಹಾಯ ಮಾಡುವುದು ಹಾಗೂ ತಾಂತ್ರಿಕ ಸಮಸ್ಯೆಗಳನ್ನು ಬಗೆಹರಿಸುವುದು ಇವರ ಹೊಸ ಜವಾಬ್ದಾರಿಯಾಗಿದೆ. ಇದೀಗ ತಿಂಗಳಿಗೆ ಸುಮಾರು 1.58 ಲಕ್ಷ ರೂಪಾಯಿ (ಅಮೆರಿಕನ್ ಡಾಲರ್ಗಳಲ್ಲಿ) ವೇತನ ಪಡೆಯುತ್ತಿರುವುದಾಗಿ ಅವರು ಸಂತಸ ಹಂಚಿಕೊಂಡಿದ್ದಾರೆ. ಇಷ್ಟು ದೊಡ್ಡ ಮೊತ್ತದ ಹಣವನ್ನು ಪಡೆಯುತ್ತಿರುವುದು ನಂಬಲಾಗದ ಸಂಗತಿಯಾಗಿದ್ದು, ಇದು ನನ್ನ ಅದೃಷ್ಟವೋ ಅಥವಾ ಸಮಯದ ಮಹಿಮೆಯೋ ಎಂದು ಅಚ್ಚರಿಪಟ್ಟಿದ್ದಾರೆ. ತಮ್ಮನ್ನು ಕಡೆಗಣಿಸಿದಾಗ ಅಥವಾ ಕಡಿಮೆ ಅಂದಾಜಿಸಿದಾಗ, ನಮಗೆ ಯಾವುದೇ ಯೋಗ್ಯತೆ ಇಲ್ಲವೇನೋ ಎಂಬ ಕೀಳರಿಮೆ ಕಾಡುತ್ತದೆ ಎಂದು ಅವರು ತಮ್ಮ ಹಿಂದಿನ ಕಂಪನಿಯ ಅನುಭವವನ್ನು ನೆನಪಿಸಿಕೊಂಡಿದ್ದಾರೆ.
ನೆಟ್ಟಿಗರಿಂದ ಭಾರಿ ಬೆಂಬಲ ಮತ್ತು ಶುಭಾಶಯ
ಉದ್ಯೋಗಿಯ ಈ ಪೋಸ್ಟ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಬೆಂಬಲ ವ್ಯಕ್ತವಾಗಿದೆ. ಅನೇಕ ಬಳಕೆದಾರರು ಕಾಮೆಂಟ್ ಮಾಡುವ ಮೂಲಕ ಶುಭಾಶಯ ತಿಳಿಸಿದ್ದಾರೆ. ನಿಮಗೆ ಈ ಗೆಲುವು ಖಂಡಿತವಾಗಿಯೂ ಅರ್ಹವಾದದ್ದೇ ಆಗಿದೆ, ನಿಮ್ಮ ಮೇಲೆ ನಿಮಗೆ ನಂಬಿಕೆ ಇರಲಿ ಎಂದು ಒಬ್ಬರು ಪ್ರತಿಕ್ರಿಯಿಸಿದ್ದಾರೆ. ಇದೊಂದು ಸ್ಪರ್ಧಾತ್ಮಕ ಮಾರುಕಟ್ಟೆಯಾಗಿದ್ದು, ನೀವು ಇಲ್ಲಿ ಯಶಸ್ವಿಯಾಗಿದ್ದೀರಿ ಎಂದರೆ ನಿಮಗೆ ಆ ಅರ್ಹತೆ ಇದೆ ಎಂದರ್ಥ, ಮುಂದೆ ನೀವು ನೀಡಿದ ಭರವಸೆಗಳನ್ನು ಈಡೇರಿಸುವತ್ತ ಗಮನಹರಿಸಿ ಎಂದು ಮತ್ತೊಬ್ಬರು ಹುರಿದುಂಬಿಸಿದ್ದಾರೆ. ಉದ್ಯೋಗಿಗಳು ಕೇವಲ ಒಂದು ಕಂಪನಿಗೆ ನಿಷ್ಠರಾಗಿರದೇ, ತಮ್ಮ ವೃತ್ತಿಜೀವನದ ಬೆಳವಣಿಗೆಗಾಗಿ ಇಂತಹ ಕಾರ್ಯತಂತ್ರದ ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಿರುವುದು ಸಂತಸದ ವಿಚಾರ ಎಂದು ಹಲವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.