ಅಮೆರಿಕದ ಮಧ್ಯಂತರ ಚುನಾವಣೆಯಲ್ಲಿ ವಿರೋಧ ಪಕ್ಷವಾದ ಡೆಮಾಕ್ರಟಿಕ್ ಪಾರ್ಟಿ ಐತಿಹಾಸಿಕ ಜಯಭೇರಿ ಬಾರಿಸಿದೆ. ಸಂಸತ್‌ನ ಎರಡೂ ಸದನಗಳಾದ ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ ಹಾಗೂ ‘ಸೆನೆಟ್’ನಲ್ಲಿ ಡೆಮಾಕ್ರಟಿಕ್ ಪಕ್ಷ ಬಹುಮತ ಸಾಧಿಸುವ ಮೂಲಕ ರಿಪಬ್ಲಿಕನ್ ಪಕ್ಷದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಭಾರಿ ಮುಖಭಂಗವಾಗಿದೆ.
ಅಮೆರಿಕ ಅಧ್ಯಕ್ಷ ಟ್ರಂಪ್ ಅವರ ಬಗ್ಗೆ ಜನರ ಕಡಿಮೆ ಒಲವು, ಏರುತ್ತಿರುವ ಬೆಲೆಗಳು ಹಾಗೂ ಇರಾನ್ ಜೊತೆಗಿನ ಯುದ್ಧದ ಬಗ್ಗೆ ಅಸಮಾಧಾನವು ಡೆಮಾಕ್ರಟಿಕ್ ಪಕ್ಷದ ಗೆಲುವಿಗೆ ಪ್ರಮುಖ ಕಾರಣವಾಗಿದೆ. ಟೆಕ್ಸಾಸ್, ಸೌತ್ ಕೆರೊಲಿನಾ, ಕಾನ್ಸಾಸ್ ಹಾಗೂ ಅಯೋವಾದಂತಹ ರಿಪಬ್ಲಿಕನ್ ಭದ್ರಕೋಟೆಗಳಲ್ಲೂ ಡೆಮಾಕ್ರಟಿಕ್ ಪಕ್ಷ ನಿರ್ಣಾಯಕ ಗೆಲುವು ಸಾಧಿಸಿದೆ. ಈ ಗೆಲುವಿನೊಂದಿಗೆ, ಟ್ರಂಪ್ ಅವರ ದೇಶೀಯ ಮತ್ತು ವಿದೇಶಿ ನೀತಿಗಳನ್ನು ನಿಯಂತ್ರಿಸುವ ಗಣನೀಯ ಅಧಿಕಾರವನ್ನು ಡೆಮಾಕ್ರಟಿಕ್ ಪಕ್ಷ ತನ್ನದಾಗಿಸಿಕೊಂಡಿದೆ.
ಎನ್‌ಬಿಸಿ ನ್ಯೂಸ್ ಅಂದಾಜಿನ ಪ್ರಕಾರ, 435 ಸದಸ್ಯ ಬಲದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ ಡೆಮಾಕ್ರಟಿಕ್ ಪಕ್ಷವು 255 ಸ್ಥಾನಗಳನ್ನು ಗೆಲ್ಲುವ ಹಾದಿಯಲ್ಲಿದೆ. ಇದು ಪಕ್ಷದ ಹಿಂದಿನ ಸಂಖ್ಯೆಗಿಂತ 40ಕ್ಕೂ ಹೆಚ್ಚು ಸ್ಥಾನಗಳ ಏರಿಕೆಯಾಗಿದ್ದು, ಸುಮಾರು 20 ವರ್ಷಗಳಲ್ಲೇ ಅತ್ಯುತ್ತಮ ಸಾಧನೆಯಾಗಿದೆ. ಈ ಗೆಲುವಿನಿಂದಾಗಿ ಹಕೀಮ್ ಜೆಫ್ರೀಸ್ ಅವರು ಸ್ಪೀಕರ್ ಆಗುವ ಸಾಧ್ಯತೆಯಿದೆ.
ಸೆನೆಟ್‌ನಲ್ಲೂ ಡೆಮಾಕ್ರಟಿಕ್ ಅಭ್ಯರ್ಥಿಗಳು ಪಾರುಪತ್ಯ ಮೆರೆದಿದ್ದಾರೆ. ಟೆಕ್ಸಾಸ್‌ನಲ್ಲಿ 37 ವರ್ಷದ ಜೇಮ್ಸ್ ತಲಾರಿಕೊ ಅವರು ರಿಪಬ್ಲಿಕನ್ ಅಭ್ಯರ್ಥಿ ಕೆನ್ ಪ್ಯಾಕ್ಸ್‌ಟನ್ ಅವರನ್ನು ಸೋಲಿಸುವ ಮೂಲಕ 1988ರ ನಂತರ ಸೆನೆಟ್ ಸ್ಥಾನ ಗೆದ್ದ ಮೊದಲ ಡೆಮಾಕ್ರಟ್ ಎನಿಸಿಕೊಂಡರು. ಸೌತ್ ಕೆರೊಲಿನಾದಲ್ಲಿ ಅನ್ನಿ ಆಂಡ್ರ್ಯೂಸ್, ನಾರ್ತ್ ಕೆರೊಲಿನಾದಲ್ಲಿ ರಾಯ್ ಕೂಪರ್, ಓಹಿಯೋದಲ್ಲಿ ಶೆರೋಡ್ ಬ್ರೌನ್ ಹಾಗೂ ಕಾನ್ಸಾಸ್‌ನಲ್ಲಿ ಆಡಮ್ ಹ್ಯಾಮಿಲ್ಟನ್ ಭರ್ಜರಿ ಜಯ ಗಳಿಸಿದ್ದಾರೆ.
ಟೆಕ್ಸಾಸ್ ಗವರ್ನರ್ ಚುನಾವಣೆಯಲ್ಲಿ ಡೆಮಾಕ್ರಟ್ ಅಭ್ಯರ್ಥಿ ಗಿನಾ ಹಿನೊಜೊಸಾ ಅವರು ರಿಪಬ್ಲಿಕನ್ ಪಕ್ಷದ ಗ್ರೆಗ್ ಅಬಾಟ್ ಅವರನ್ನು ಸೋಲಿಸಿ, 1994ರ ನಂತರ ರಾಜ್ಯದ ಮೊದಲ ಡೆಮಾಕ್ರಟಿಕ್ ಹಾಗೂ ಮೊದಲ ಲ್ಯಾಟಿನಾ ಗವರ್ನರ್ ಆಗಿ ಇತಿಹಾಸ ನಿರ್ಮಿಸಿದ್ದಾರೆ. ಆಡಮ್ ಹ್ಯಾಮಿಲ್ಟನ್ 1932ರ ನಂತರ ಸೆನೆಟ್‌ನಲ್ಲಿ ಕಾನ್ಸಾಸ್ ಅನ್ನು ಪ್ರತಿನಿಧಿಸಲಿರುವ ಮೊದಲ ಡೆಮಾಕ್ರಟ್ ಆಗಲಿದ್ದಾರೆ.
2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಟ್ರಂಪ್ ಸುಲಭವಾಗಿ ಗೆದ್ದಿದ್ದ ಅನೇಕ ರಾಜ್ಯಗಳಲ್ಲೂ ರಿಪಬ್ಲಿಕನ್ನರು ಈ ಬಾರಿ ಸೋಲು ಅನುಭವಿಸಿರುವುದು ಪಕ್ಷಕ್ಕೆ ತೀವ್ರ ಹಿನ್ನಡೆಯಾಗಿದೆ. ಉದಾಹರಣೆಗೆ, ಓಹಿಯೋದಲ್ಲಿ ವಿವೇಕ್ ರಾಮಸ್ವಾಮಿ ಮತ್ತು ಜಾನ್ ಹಸ್ಟೆಡ್ ಇಬ್ಬರೂ ಡೆಮಾಕ್ರಟಿಕ್ ಅಭ್ಯರ್ಥಿಗಳ ವಿರುದ್ಧ ಪರಾಭವಗೊಂಡಿದ್ದಾರೆ.
ಟೆಕ್ಸಾಸ್‌ನ ಜೇಮ್ಸ್ ತಲಾರಿಕೊ ಹಾಗೂ ಕೆನ್ ಪ್ಯಾಕ್ಸ್‌ಟನ್ ನಡುವಿನ ಸೆನೆಟ್ ಚುನಾವಣೆ ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಚುನಾವಣೆ ಎನಿಸಿಕೊಂಡಿದ್ದು, ಇದರಲ್ಲಿ ರಿಪಬ್ಲಿಕನ್ ಅಭ್ಯರ್ಥಿ ಪರವಾಗಿ ಬಿಲಿಯನೇರ್ ಎಲೋನ್ ಮಸ್ಕ್ ಸುಮಾರು 200 ಮಿಲಿಯನ್ ಡಾಲರ್ ಖರ್ಚು ಮಾಡಿದ್ದರೂ ಸೋಲು ತಪ್ಪಿಲ್ಲ ಎನ್ನಲಾಗಿದೆ. ಈ ಸೋಲಿನ ಬಗ್ಗೆ ಪ್ರತಿಕ್ರಿಯಿಸಿರುವ ಟ್ರಂಪ್, “ನಾನು ಈ ಚುನಾವಣಾ ಕಣದಲ್ಲಿ ಇರಲಿಲ್ಲ, ಒಂದುವೇಳೆ ಇದ್ದಿದ್ದರೆ ನಾವೇ ಭರ್ಜರಿ ಜಯ ಸಾಧಿಸುತ್ತಿದ್ದೆವು” ಎಂದು ಟ್ರುತ್ ಸೋಷಿಯಲ್‌ನಲ್ಲಿ ಬರೆದುಕೊಂಡಿದ್ದಾರೆ.