ಮೈಸೂರು: ರಸ್ತೆಯಲ್ಲಿ ಸಾರ್ವಜನಿಕರು ಹೆಲ್ಮೆಟ್ ಧರಿಸದಿದ್ದರೆ ಅಥವಾ ಸಣ್ಣದಾಗಿ ಸಿಗ್ನಲ್ ಜಂಪ್ ಮಾಡಿದರೆ ತಕ್ಷಣವೇ ಮುಗಿಬಿದ್ದು ದಂಡ ವಿಧಿಸುವ ಪೊಲೀಸರೇ ಈಗ ತಾವೇ ತೋಡಿದ ಗುಂಡಿಗೆ ಬಿದ್ದಿದ್ದಾರೆ. ಸಾರ್ವಜನಿಕರಿಗೆ ಕಾನೂನಿನ ಪಾಠ ಮಾಡುವ ಪೊಲೀಸ್ ಇಲಾಖೆಯ ಸ್ವಂತ ಗಸ್ತು ವಾಹನವೇ ಕಳೆದ ಎರಡು ವರ್ಷಗಳಲ್ಲಿ ಬರೋಬ್ಬರಿ 71 ಬಾರಿ ಸಂಚಾರ ನಿಯಮಗಳನ್ನು ಗಾಳಿಗೆ ತೂರಿರುವುದು ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಜಗಜ್ಜಾಹೀರಾಗಿದೆ. ಮೈಸೂರು ನಗರದಲ್ಲಿ 24 ಗಂಟೆಯೂ ನಿರಂತರವಾಗಿ ಸಂಚರಿಸುವ ಪೊಲೀಸರ ಸಾರ್ವಜನಿಕ ತುರ್ತು ಸೇವಾ ‘112’ ಗಸ್ತು ವಾಹನವು ಆಟೋಮೆಟಿಕ್ ಹೈಟೆಕ್ ಕ್ಯಾಮೆರಾಗಳ ಕಣ್ಣಿಗೆ ಸಿಲುಕಿ ಈ ರೀತಿ ಭಾರಿ ಮೊತ್ತದ ದಂಡವನ್ನು ಬಾಕಿ ಉಳಿಸಿಕೊಂಡಿದೆ.
ಈ ರೋಚಕ ಕೃತ್ಯ ಬಯಲಾಗಿದ್ದು ಮೈಸೂರಿನ ನ್ಯಾಯಾಲಯದ ಆವರಣದಲ್ಲಿ. ಶನಿವಾರದಂದು ಕೋರ್ಟ್ ಆವರಣದಲ್ಲಿ ವಾಹನ ಸವಾರರಿಂದ ಬಾಕಿ ಇರುವ ಹಳೇ ಟ್ರಾಫಿಕ್ ದಂಡವನ್ನು ರಿಯಾಯಿತಿ ದರದಲ್ಲಿ ಸಂಗ್ರಹಿಸಲು ವಿಶೇಷ ಕೌಂಟರ್ ಒಂದನ್ನು ತೆರೆಯಲಾಗಿತ್ತು. ಈ ವೇಳೆ ಪೊಲೀಸರು ಸಾರ್ವಜನಿಕರಿಂದ ದಂಡ ವಸೂಲಿ ಮಾಡುವ ಭರಾಟೆಯಲ್ಲಿದ್ದಾಗ, ಅದೇ ಆವರಣಕ್ಕೆ ಪೊಲೀಸರ ‘112’ ಗಸ್ತು ವಾಹನ ಬಂದಿದೆ. ಇದನ್ನು ಗಮನಿಸಿದ ಮೈಸೂರಿನ ವಕೀಲರಾದ ಪುನೀತ್ ಎನ್. ಅವರಿಗೆ ಕುತೂಹಲ ಮೂಡಿ, ಸಂಚಾರ ಇಲಾಖೆಯ ಅಧಿಕೃತ ಆನ್ಲೈನ್ ಆ್ಯಪ್ನಲ್ಲಿ ಆ ವಾಹನದ ನೋಂದಣಿ ಸಂಖ್ಯೆಯನ್ನು ಹಾಕಿ ಪರಿಶೀಲಿಸಿದ್ದಾರೆ. ಆಗ ಆ ವಾಹನದ ಹೆಸರಿನಲ್ಲಿ ಬರೋಬ್ಬರಿ 71 ಟ್ರಾಫಿಕ್ ರೂಲ್ಸ್ ಬ್ರೇಕಿಂಗ್ ಕೇಸ್ಗಳು ಹಾಗೂ ಒಟ್ಟು 36,500 ರೂಪಾಯಿಗಳ ಭಾರಿ ಮೊತ್ತದ ದಂಡ ಬಾಕಿ ಇರುವುದು ಪರದೆಯ ಮೇಲೆ ಮೂಡಿಬಂದಿದೆ.
ವಕೀಲರು ಈ ಇಡೀ ಡಿಜಿಟಲ್ ದಾಖಲೆಯನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸುತ್ತಿದ್ದಂತೆ ಅಲ್ಲಿಯೇ ಇದ್ದ ಖಾಕಿ ಪಡೆ ಉತ್ತರಿಸಲಾಗದೆ ಸಂಪೂರ್ಣ ತಬ್ಬಿಬ್ಬಾಗಿದೆ. ಸಾರ್ವಜನಿಕರಿಗೆ ಕಠಿಣ ನಿಯಮಗಳನ್ನು ಹೇರುವ ಪೊಲೀಸರೇ ಇಷ್ಟೊಂದು ಭಾರಿ ಪ್ರಮಾಣದ ದಂಡ ಬಾಕಿ ಉಳಿಸಿಕೊಂಡಿರುವುದು ಸಾರ್ವಜನಿಕರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ. ಈಗಲಾದರೂ ಮೈಸೂರು ಹಿರಿಯ ಪೊಲೀಸ್ ಅಧಿಕಾರಿಗಳು ಎಚ್ಚೆತ್ತುಕೊಂಡು, ಈ 36,500 ರೂ. ದಂಡವನ್ನು ಸಾರ್ವಜನಿಕರ ತೆರಿಗೆ ದುಡ್ಡಿನಲ್ಲಿ ಕಟ್ಟುತ್ತಾರಾ ಅಥವಾ ನಿಯಮ ಉಲ್ಲಂಘಿಸಿದ ಆಯಾ ಪೊಲೀಸ್ ಚಾಲಕರಿಂದಲೇ ವಸೂಲಿ ಮಾಡುತ್ತಾರಾ ಎಂಬುದನ್ನು ಕಾದುನೋಡಬೇಕಿದೆ.