ನವದೆಹಲಿ: ವಿಡಿಯೋ ವೀಕ್ಷಣೆ ವೇಳೆ ಬರುವ ಜಾಹೀರಾತುಗಳನ್ನು (Ads) ಸ್ಕಿಪ್ ಮಾಡಿದರೂ ಸಹ, ಆ ಬ್ರ್ಯಾಂಡ್ಗಳ ಜಾಹೀರಾತುಗಳು ವೀಕ್ಷಕರ ಕಣ್ಣಿಗೆ ಬೀಳುವಂತೆ ಮಾಡುವ ಹೊಸ ‘ಸ್ಟಿಕಿ ಬ್ಯಾನರ್’ (Sticky banner ads) ಮಾದರಿಯನ್ನು ಜನಪ್ರಿಯ ವಿಡಿಯೋ ಪ್ಲಾಟ್ಫಾರ್ಮ್ ‘ಯೂಟ್ಯೂಬ್’ (YouTube) ಪ್ರಾಯೋಗಿಕವಾಗಿ ಪರೀಕ್ಷಿಸುತ್ತಿದೆ.
ಹೇಗೆ ಕಾರ್ಯನಿರ್ವಹಿಸುತ್ತದೆ ಈ ಹೊಸ ಫೀಚರ್?
ಸಾಮಾನ್ಯವಾಗಿ ಯೂಟ್ಯೂಬ್ನಲ್ಲಿ ವಿಡಿಯೋ ನೋಡುವಾಗ ಜಾಹೀರಾತು ಬಂದರೆ, ಕೆಲವು ಸೆಕೆಂಡುಗಳ ನಂತರ ‘ಸ್ಕಿಪ್’ (Skip) ಆಯ್ಕೆ ಒತ್ತಿದಾಗ ಜಾಹೀರಾತು ಸಂಪೂರ್ಣ ಕಣ್ಮರೆಯಾಗಿ ನಾವು ನೋಡಬೇಕಾದ ವಿಡಿಯೋ ಶುರುವಾಗುತ್ತದೆ. ಆದರೆ, ಪ್ರಸ್ತುತ ಪರೀಕ್ಷೆಯಲ್ಲಿರುವ ಹೊಸ ಅಪ್ಡೇಟ್ನಂತೆ, ಬಳಕೆದಾರರು ಸ್ಕಿಪ್ ಮಾಡಿದ ಬಳಿಕವೂ ಆ ಜಾಹೀರಾತಿಗೆ ಸಂಬಂಧಿಸಿದ ಸಣ್ಣ ‘ಬ್ಯಾನರ್’ ಅಥವಾ ‘ಬ್ರ್ಯಾಂಡೆಡ್ ಕಾರ್ಡ್’ ವಿಡಿಯೋ ಪ್ಲೇಯರ್ನ ಒಂದು ಭಾಗದಲ್ಲಿ ಹಾಗೆಯೇ ಅಂಟಿಕೊಂಡಿರುತ್ತದೆ. ಬಳಕೆದಾರರು ಅದನ್ನು ಸ್ವತಃ (ಮ್ಯಾನುಯಲ್ ಆಗಿ) ಕ್ಲೋಸ್ ಮಾಡುವವರೆಗೂ ಅದು ಸ್ಕ್ರೀನ್ ಮೇಲೆ ಕಾಣಿಸುತ್ತಲೇ ಇರುತ್ತದೆ.
ಬೆಳಕಿಗೆ ಬಂದಿದ್ದು ಹೇಗೆ?
‘ಆಡ್ಸ್ಕ್ವೈರ್’ (Adsquire) ಸಂಸ್ಥಾಪಕ ಮತ್ತು ಸಿಇಒ ಆಂಥೋನಿ ಹಿಗ್ಮನ್ ಅವರು ಮೊದಲ ಬಾರಿಗೆ ಈ ಹೊಸ ಫೀಚರ್ ಅನ್ನು ಗುರುತಿಸಿದ್ದಾರೆ. ಆರಂಭದಲ್ಲಿ ಇದೊಂದು ತಾಂತ್ರಿಕ ದೋಷ (Glitch) ಇರಬಹುದು ಎಂದು ಅವರು ಭಾವಿಸಿದ್ದರು. ಆದರೆ, ಸತತವಾಗಿ ಹಲವು ಬಾರಿ ಇದೇ ರೀತಿ ಜಾಹೀರಾತು ಕಾಣಿಸಿಕೊಂಡ ನಂತರ, ಯೂಟ್ಯೂಬ್ ಉದ್ದೇಶಪೂರ್ವಕವಾಗಿಯೇ ಈ ಹೊಸ ಪ್ರಯೋಗ ಮಾಡುತ್ತಿರುವುದು ಬೆಳಕಿಗೆ ಬಂದಿದೆ.
ಜಾಹೀರಾತುದಾರರಿಗೆ ಲಾಭ, ವೀಕ್ಷಕರಿಗೆ ಕಿರಿಕಿರಿ!
ಜಾಹೀರಾತುದಾರರ ದೃಷ್ಟಿಯಿಂದ ಇದೊಂದು ಅತ್ಯುತ್ತಮ ಅವಕಾಶವಾಗಿದೆ. ವೀಕ್ಷಕರು ಪೂರ್ಣ ಪ್ರಮಾಣದಲ್ಲಿ ವಿಡಿಯೋ ಜಾಹೀರಾತು ನೋಡದಿದ್ದರೂ, ಸ್ಕ್ರೀನ್ ಮೇಲಿರುವ ಬ್ಯಾನರ್ ಮೂಲಕ ಬ್ರ್ಯಾಂಡ್ನ ಹೆಸರು ಅವರ ಮನಸ್ಸಿನಲ್ಲಿ ಅಚ್ಚಳಿಯುವಂತೆ (Brand recall) ಮಾಡಲು ಇದು ಸಹಾಯ ಮಾಡುತ್ತದೆ.
ಮತ್ತೊಂದೆಡೆ, ವಿಡಿಯೋ ನೋಡುವಾಗ ಸ್ಕ್ರೀನ್ ಮೇಲೆ ನಿರಂತರವಾಗಿ ಪ್ರಮೋಷನಲ್ ಬ್ಯಾನರ್ ಕಾಣಿಸಿಕೊಳ್ಳುವುದು ಬಳಕೆದಾರರಿಗೆ ಕಿರಿಕಿರಿ ಉಂಟುಮಾಡುವ ಹಾಗೂ ವಿಡಿಯೋ ವೀಕ್ಷಣೆಯ ಅನುಭವವನ್ನು ಕೆಡಿಸುವ (Intrusive) ಸಾಧ್ಯತೆಯೇ ಹೆಚ್ಚು ಎಂದು ವಿಶ್ಲೇಷಿಸಲಾಗಿದೆ.
ಸದ್ಯ ಈ ಫೀಚರ್ ಪ್ರಾಯೋಗಿಕ ಹಂತದಲ್ಲಿದ್ದು, ಶೀಘ್ರದಲ್ಲೇ ಎಲ್ಲಾ ಬಳಕೆದಾರರಿಗೂ ವಿಸ್ತರಣೆಯಾಗುವ ಸಾಧ್ಯತೆಯಿದೆ.