ಚಿತ್ರಮಂದಿರಗಳಲ್ಲಿ ಭರ್ಜರಿ ಪ್ರದರ್ಶನ ಕಂಡು, ಜಾಗತಿಕ ಬಾಕ್ಸ್ ಆಫೀಸ್ನಲ್ಲಿ ಬರೋಬ್ಬರಿ 370 ಮಿಲಿಯನ್ ಡಾಲರ್ಗೂ ಅಧಿಕ ಹಣ ಬಾಚಿಕೊಂಡ ಈ ವರ್ಷದ ಅತಿ ದೊಡ್ಡ ಹಾರರ್ ಸರ್ಪ್ರೈಸ್ ‘ಅಬ್ಸೆಷನ್’ (Obsession) ಸಿನಿಮಾ ಕೊನೆಗೂ ಒಟಿಟಿ (OTT) ಪ್ಲಾಟ್ಫಾರ್ಮ್ಗಳಿಗೆ ಲಗ್ಗೆ ಇಟ್ಟಿದೆ. ಯೂಟ್ಯೂಬರ್ ಕರಿ ಬಾರ್ಕರ್ ನಿರ್ದೇಶನದ ಈ ಜಾಗತಿಕ ಸೆನ್ಸೇಷನಲ್ ಸಿನಿಮಾ ಡಿಜಿಟಲ್ ಲೋಕಕ್ಕೆ ಪ್ರವೇಶ ಪಡೆದಿದ್ದರೂ, ಇದನ್ನು ಎದುರುನೋಡುತ್ತಿದ್ದ ವೀಕ್ಷಕರಿಗೆ ಸಣ್ಣ ನಿರಾಸೆಯ ಸುದ್ದಿಯೊಂದು ಕಾದಿದೆ.
ಹಣ ಪಾವತಿಸಿ ನೋಡಬೇಕಾದ ಅನಿವಾರ್ಯತೆ
ಸದ್ಯಕ್ಕೆ ಈ ಸಿನಿಮಾ ‘ಅಮೆಜಾನ್ ಪ್ರೈಮ್ ವಿಡಿಯೋ’ ಮತ್ತು ‘ಆಪಲ್ ಟಿವಿ’ ಮುಂತಾದ ಪ್ರಮುಖ ಡಿಜಿಟಲ್ ಪ್ಲಾಟ್ಫಾರ್ಮ್ಗಳಲ್ಲಿ ಲಭ್ಯವಿದೆ. ಆದರೆ, ಒಟಿಟಿ ಚಂದಾದಾರರು ಇದನ್ನು ಉಚಿತವಾಗಿ ನೋಡಲು ಸಾಧ್ಯವಿಲ್ಲ. ಅಂತಾರಾಷ್ಟ್ರೀಯ ಪ್ಲಾಟ್ಫಾರ್ಮ್ಗಳಲ್ಲಿ ಈ ಚಿತ್ರವನ್ನು ಖರೀದಿಸಲು 24.99 ಡಾಲರ್ ಹಾಗೂ ಬಾಡಿಗೆಗೆ ಪಡೆಯಲು 19.99 ಡಾಲರ್ ನಿಗದಿಪಡಿಸಲಾಗಿದೆ. ಎಲ್ಲರಿಗೂ ಮುಕ್ತವಾಗಿ ಸಿಗುವ ಪೂರ್ಣ ಪ್ರಮಾಣದ ಒಟಿಟಿ ಸ್ಟ್ರೀಮಿಂಗ್ ದಿನಾಂಕವನ್ನು ಚಿತ್ರತಂಡ ಈ ತಿಂಗಳ ಕೊನೆಯಲ್ಲಿ ಪ್ರಕಟಿಸುವ ಸಾಧ್ಯತೆಯಿದೆ.
ವೀಕ್ಷಕರಿಗೆ ಲಭ್ಯವಾಗಲಿದೆ ಬೋನಸ್ ಕಂಟೆಂಟ್
ಚಿತ್ರಮಂದಿರಗಳಲ್ಲಿ ಈ ಸಿನಿಮಾವನ್ನು ಮಿಸ್ ಮಾಡಿಕೊಂಡವರು ಈಗ ಆಪಲ್ ಟಿವಿ ಅಥವಾ ಪ್ರೈಮ್ ವಿಡಿಯೋದಲ್ಲಿ ಬಾಡಿಗೆ ಅಥವಾ ಹಣ ಪಾವತಿಸಿ ವೀಕ್ಷಿಸಬಹುದಾಗಿದೆ. ಇದರ ಜೊತೆಗೆ ವೀಕ್ಷಕರಿಗೆ ಮತ್ತೊಂದು ಸಿಹಿ ಸುದ್ದಿ ಕೂಡ ಇದೆ. ಈ ಡಿಜಿಟಲ್ ಬಿಡುಗಡೆಯೊಂದಿಗೆ ಬಿಹೈಂಡ್ ದಿ ಸೀನ್ಸ್ (ತೆರೆಯ ಹಿಂದಿನ ದೃಶ್ಯಗಳು) ಮತ್ತು ನಿರ್ದೇಶಕ ಕರಿ ಬಾರ್ಕರ್ ಅವರ ವಿಶೇಷ ಕಾಮೆಂಟರಿಯನ್ನು ಒಳಗೊಂಡ ಬೋನಸ್ ಕಂಟೆಂಟ್ಗಳನ್ನು ನೀಡಲಾಗುತ್ತಿದೆ. ಜುಲೈ 14 ರಂದು ಇದರ ಡಿವಿಡಿ ಹಾಗೂ ಬ್ಲೂ-ರೇ ಬಿಡುಗಡೆಯಾಗಲಿದ್ದು, ಮುಂಬರುವ ದಿನಗಳಲ್ಲಿ ‘ಪೀಕಾಕ್’ ಒಟಿಟಿಯಲ್ಲೂ ಸಿನಿಮಾ ಸ್ಟ್ರೀಮ್ ಆಗುವ ನಿರೀಕ್ಷೆಯಿದೆ.
ಕೇವಲ 5 ಕೋಟಿ ಬಜೆಟ್, ಕೋಟಿ ಕೋಟಿ ಕಲೆಕ್ಷನ್
ಮೇ 15 ರಂದು ಫೋಕಸ್ ಫೀಚರ್ಸ್ ಮೂಲಕ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದ ಈ ಸಿನಿಮಾ, ಚಿತ್ರರಂಗದ ಇತಿಹಾಸದಲ್ಲೇ ಅತ್ಯಂತ ಅನಿರೀಕ್ಷಿತ ಬಾಕ್ಸ್ ಆಫೀಸ್ ಯಶಸ್ಸಿನ ಕಥೆಯಾಗಿದೆ. ಕೇವಲ 700 ಸಾವಿರ ಡಾಲರ್ (ಸುಮಾರು 5 ರಿಂದ 6 ಕೋಟಿ ರೂ.) ಬಜೆಟ್ನಲ್ಲಿ ತಯಾರಾದ ಈ ಚಿತ್ರ, ಪ್ರೇಕ್ಷಕರ ಬಾಯಿಮಾತಿನ ಪ್ರಚಾರದಿಂದಲೇ ಭರ್ಜರಿ ಗಳಿಕೆ ಮಾಡಿತು.
ಟೊರೊಂಟೊ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವದ ಮಿಡ್ನೈಟ್ ಸೆಕ್ಷನ್ನಲ್ಲಿ ಪ್ರದರ್ಶನಗೊಂಡ ತಕ್ಷಣವೇ ಫೋಕಸ್ ಫೀಚರ್ಸ್ ಸಂಸ್ಥೆಯು ಇದನ್ನು 15 ಮಿಲಿಯನ್ ಡಾಲರ್ಗಿಂತಲೂ ಹೆಚ್ಚು ಮೊತ್ತ ನೀಡಿ ಖರೀದಿಸಿತ್ತು. ಅಂತಿಮವಾಗಿ ಈ ಚಿತ್ರ ಜಾಗತಿಕವಾಗಿ 370 ಮಿಲಿಯನ್ ಡಾಲರ್ಗಿಂತಲೂ ಹೆಚ್ಚು ಕಲೆಕ್ಷನ್ ಮಾಡಿ, ಫೋಕಸ್ ಫೀಚರ್ಸ್ ಸಂಸ್ಥೆಯ ಇತಿಹಾಸದಲ್ಲೇ ಅತಿ ಹೆಚ್ಚು ಗಳಿಕೆ ಮಾಡಿದ ಸಿನಿಮಾ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
‘ಅಬ್ಸೆಷನ್’ ಚಿತ್ರದ ಕಥಾಹಂದರ
ಕೇವಲ 20 ವರ್ಷದ ಯೂಟ್ಯೂಬರ್ ಕರಿ ಬಾರ್ಕರ್ ಬರೆದು ನಿರ್ದೇಶಿಸಿರುವ ಈ ಚಿತ್ರದಲ್ಲಿ ಮೈಕೆಲ್ ಜಾನ್ಸ್ಟನ್ (ಬೇರ್ ಪಾತ್ರದಲ್ಲಿ) ನಟಿಸಿದ್ದಾರೆ. ತನ್ನನ್ನು ತನ್ನ ಕ್ರಶ್ ಪ್ರೀತಿಸುವಂತೆ ಮಾಡಲು ‘ಒನ್ ವಿಶ್ ವಿಲೋ’ ಎಂಬ ನಿಗೂಢ ವಸ್ತುವನ್ನು ಬಳಸುವ ಹತಾಶ ಪ್ರೇಮಿಯ ಕಥೆ ಇದಾಗಿದೆ. ಆದರೆ, ಆತನ ಆಸೆ ಈಡೇರಿದ ನಂತರ ಪರಿಸ್ಥಿತಿ ಅತ್ಯಂತ ಭಯಾನಕ ತಿರುವು ಪಡೆದುಕೊಳ್ಳುತ್ತದೆ. ನಿಕ್ಕಿ (ಇಂಡಿ ನವರೇಟೆ) ಆತನಿಗೆ ಅಪಾಯಕಾರಿ ಹಾಗೂ ಗೀಳಿನ ರೀತಿಯಲ್ಲಿ ಅಂಟಿಕೊಳ್ಳುತ್ತಾಳೆ. ಈ ಗೀಳು ಮುಂದೆ ಯಾವ ಹಂತಕ್ಕೆ ತಲುಪುತ್ತದೆ ಎಂಬುದು ಚಿತ್ರದ ರೋಚಕ ಕಥೆಯಾಗಿದೆ.