ಮುಂಬೈ: ಬಾಲಿವುಡ್ ಬಾದ್‌ಶಾ ಶಾರುಖ್ ಖಾನ್ ತಮ್ಮ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದು, ಈ ವಿಶೇಷ ದಿನದಂದು ಅಭಿಮಾನಿಗಳಿಗೆ ಅದ್ಭುತ ಉಡುಗೊರೆಯೊಂದನ್ನು ನೀಡಿದ್ದಾರೆ. ಅವರ ಬಹುನಿರೀಕ್ಷಿತ ಆಕ್ಷನ್ ಎಂಟರ್‌ಟೈನರ್ ‘ಕಿಂಗ್’ ಚಿತ್ರದ ಮೊದಲ ಹಾಡು ‘ತು ಮಿಲ್ ಜಾಯೆ’ ಬಿಡುಗಡೆಯಾಗಿದ್ದು, ಸಂಗೀತ ಮತ್ತು ಸಿನಿಮಾ ಪ್ರಿಯರಲ್ಲಿ ಭಾರಿ ಸಂಚಲನ ಮೂಡಿಸಿದೆ. ಜಾಗತಿಕ ಮಟ್ಟದ ಪ್ರತಿಭೆಗಳನ್ನು ಒಟ್ಟುಗೂಡಿಸಿರುವ ಈ ಹಾಡಿನಲ್ಲಿ ಶಾರುಖ್ ಖಾನ್ ಮತ್ತು ದೀಪಿಕಾ ಪಡುಕೋಣೆ ಜೋಡಿ ಮತ್ತೊಮ್ಮೆ ತಮ್ಮ ಅದ್ಭುತ ಆನ್‌ಸ್ಕ್ರೀನ್ ಕೆಮಿಸ್ಟ್ರಿ ಮೂಲಕ ಮೋಡಿ ಮಾಡಿದೆ.
ಚಿತ್ರದ ಜಗತ್ತನ್ನು ಪರಿಚಯಿಸುವ ಈ ವಿಡಿಯೋ ಹಾಡು ಶಾರುಖ್ ಖಾನ್ ಅವರ ಖಡಕ್ ಡೈಲಾಗ್‌ನೊಂದಿಗೆ ಪ್ರಾರಂಭವಾಗುತ್ತದೆ. “ಮೈ ಖಾತಿಲ್ ನಹಿ, ಆಶಿಕ್ ಹೂಂ, ಔರ್ ನಿಶಾನಾ ಮೇರಿ ಮಶೂಕಾ, ಔರ್ ವೋಹ್ ಆಶಿಕ್ ಹಿ ಕ್ಯಾ ಜೋ ದಿಲ್ ಚೀರ್ ನಾ ದೇ” ಎಂಬ ಪವರ್‌ಫುಲ್ ಸಂಭಾಷಣೆ ಅವರ ಪಾತ್ರದ ಗತ್ತನ್ನು ತೋರಿಸಿಕೊಟ್ಟಿದೆ.
ಇದಾದ ಬಳಿಕ ಆರಂಭವಾಗುವ ರೊಮ್ಯಾಂಟಿಕ್ ಟ್ರ್ಯಾಕ್‌ನಲ್ಲಿ ಬಾಲಿವುಡ್‌ನ ಜನಪ್ರಿಯ ಗಾಯಕ ಅರಿಜಿತ್ ಸಿಂಗ್ ಅವರ ಕಂಠಸಿರಿ ಮತ್ತು ಜಾಗತಿಕ ಪಾಪ್ ಸೆನ್ಸೇಷನ್ ಎಡ್ ಶೀರನ್ ಅವರ ವಿಶಿಷ್ಟ ರಾಪ್ ಶೈಲಿ ಅದ್ಭುತವಾಗಿ ಬೆಸೆದುಕೊಂಡಿದೆ. ಗಾಯಕಿ ಮಧುಬಂತಿ ಬಾಗ್ಚಿ ಕೂಡ ತಮ್ಮ ಧ್ವನಿಯ ಮೂಲಕ ಈ ಹಾಡಿಗೆ ವಿಶೇಷ ಮೆರುಗು ನೀಡಿದ್ದಾರೆ.
ರೊಮ್ಯಾನ್ಸ್ ಹಾಗೂ ಭರ್ಜರಿ ಆಕ್ಷನ್ ಮಿಶ್ರಣವಾಗಿರುವ ಈ ಹಾಡು ‘ಕಿಂಗ್’ ಚಿತ್ರದ ಒಳನೋಟವನ್ನು ತೆರೆದಿಡುತ್ತದೆ. ಸಚಿನ್-ಜಿಗರ್ ಸಂಗೀತ ಸಂಯೋಜನೆ, ಕುಮಾರ್ ಸಾಹಿತ್ಯ ಹಾಗೂ ಪಿಯೂಷ್-ಶಾಜಿಯಾ ಅವರ ನೃತ್ಯ ನಿರ್ದೇಶನ ಈ ಹಾಡಿಗಿದೆ. ಹಾಡಿನ ಅಂತ್ಯದಲ್ಲಿ ಬರುವ “ಇಸ್ ಬಾರ್ ದಿಲ್ ಮೇಂ ಆಗ್ ಲಗೀ ಹೈ, ಅಬ್ ದುನಿಯಾ ಜಲಾಯೆ ಬಿನಾ ಮಾನೇಗಾ ನಹಿ” ಎಂಬ ಡೈಲಾಗ್‌ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.
ಸಿದ್ಧಾರ್ಥ್ ಆನಂದ್ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ ಈ ಸಿನಿಮಾವನ್ನು ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್ ಮತ್ತು ಮಾರ್ಫ್ಲಿಕ್ಸ್ ಪಿಕ್ಚರ್ಸ್ ಜಂಟಿಯಾಗಿ ನಿರ್ಮಿಸುತ್ತಿದ್ದು, 2026ರ ಡಿಸೆಂಬರ್ 24ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿದೆ. ಸದ್ಯ ಈ ಹಾಡು ಝೀ ಮ್ಯೂಸಿಕ್ ಮತ್ತು ಟಿ-ಸೀರೀಸ್ ಯೂಟ್ಯೂಬ್ ಚಾನೆಲ್‌ಗಳಲ್ಲಿ ವೀಕ್ಷಣೆಗೆ ಲಭ್ಯವಿದೆ.