ಬೆಂಗಳೂರು: ಅಕ್ವೇರಿಯಂ ಮೀನು ಸಾಕಲು ಪೋಷಕರು ಅವಕಾಶ ನೀಡಲಿಲ್ಲ ಎಂಬ ಸಣ್ಣ ಕಾರಣಕ್ಕೆ ತೀವ್ರವಾಗಿ ಮನನೊಂದ 13 ವರ್ಷದ ಬಾಲಕನೊಬ್ಬ ಮನೆ ಬಿಟ್ಟು ಹೋಗಿದ್ದು, ನಾಪತ್ತೆಯಾಗಿ ನಾಲ್ಕು ದಿನಗಳು ಕಳೆದರೂ ಯಾವುದೇ ಸುಳಿವು ಲಭ್ಯವಾಗಿಲ್ಲ. ಮಗನ ಕಾಣೆಯಾಗುವಿಕೆಯಿಂದ ಕಂಗಾಲಾಗಿರುವ ಪೋಷಕರು ಕಣ್ಣೀರಿನಲ್ಲಿ ಕೈತೊಳೆಯುವಂತಾಗಿದೆ. ಬೆಂಗಳೂರಿನ ಉತ್ತರಹಳ್ಳಿ ಸಮೀಪದ ಗೌಡನಪಾಳ್ಯದ ನಿವಾಸಿ ಕಿಶೋರ್ (13) ನಾಪತ್ತೆಯಾದ ದುರ್ದೈವಿ ಬಾಲಕ.
ಮಗನಿಗಾಗಿ ಕಳೆದ ನಾಲ್ಕು ದಿನಗಳಿಂದ ಹಗಲು-ರಾತ್ರಿ ಎನ್ನದೆ ಪೋಷಕರು ಊರೆಲ್ಲಾ ಹುಡುಕಾಟ ನಡೆಸುತ್ತಿದ್ದಾರೆ. ಬಾಲಕ ಕಿಶೋರ್ಗೆ ಅಕ್ವೇರಿಯಂ ಮೀನುಗಳನ್ನು ಸಾಕುವ ತೀವ್ರವಾದ ಆಸೆಯಿತ್ತು. ಈ ಹಿನ್ನೆಲೆಯಲ್ಲಿ ಆತ ಕೇವಲ 15 ದಿನಗಳ ಹಿಂದೆಯಷ್ಟೇ ಮನೆಗೆ ಅಕ್ವೇರಿಯಂ ಫಿಶ್ ತಂದಿದ್ದ. ಈ ವೇಳೆ ತಂದೆ ನಾಗೇಂದ್ರ ಅವರು “ಸುಮ್ಮನೆ ಹಣ ವ್ಯರ್ಥ ಮಾಡಬೇಡ” ಎಂದು ಮಗನಿಗೆ ಹೊಡೆದು, ಗದರಿಸಿ ಬುದ್ಧಿವಾದ ಹೇಳಿದ್ದರು. ಆ ಸಂದರ್ಭದಲ್ಲೂ ಕೋಪಗೊಂಡು ಮನೆ ಬಿಟ್ಟು ಹೋಗಿದ್ದ ಕಿಶೋರ್, ಕೆಲವೇ ಗಂಟೆಗಳಲ್ಲಿ ಪತ್ತೆಯಾಗಿದ್ದ. ಆಗ ಪೋಷಕರು ಮಗನಿಗೆ “ಮತ್ತೆಂದೂ ಈ ರೀತಿ ಮನೆ ಬಿಟ್ಟು ಹೋಗಬಾರದು” ಎಂದು ಪ್ರೀತಿಯಿಂದಲೇ ತಿಳಿಹೇಳಿದ್ದರು.
ಆದರೆ, ಘಟನೆ ನಡೆದು ಕೆಲವೇ ದಿನಗಳಲ್ಲಿ, ಅಂದರೆ ಇದೇ ತಿಂಗಳ 27ನೇ ತಾರೀಕಿನಂದು ಶಾಲೆಯಿಂದ ಮನೆಗೆ ಮರಳುವಾಗ ಕಿಶೋರ್ ಮತ್ತೆ ಅಕ್ವೇರಿಯಂ ಫಿಶ್ ತಂದಿದ್ದ. ಇದನ್ನು ಕಂಡು ತೀವ್ರವಾಗಿ ಕೋಪಗೊಂಡ ತಂದೆ ನಾಗೇಂದ್ರ ಅವರು ಮಗನಿಗೆ ಮತ್ತೊಮ್ಮೆ ಹೊಡೆದಿದ್ದರು. ಬಳಿಕ ಸಂಜೆ ಟ್ಯೂಷನ್ಗೆ ಹೋಗುವಂತೆ ಖಡಕ್ ಆಗಿ ಸೂಚಿಸಿ, ಕೆಲಸದ ನಿಮಿತ್ತ ತಾವು ಮನೆಯಿಂದ ಹೊರಗೆ ಹೋಗಿದ್ದರು. ಅಪ್ಪನ ಬೈಗುಳ ಹಾಗೂ ಏಟಿನಿಂದ ತೀವ್ರವಾಗಿ ನೊಂದ ಕಿಶೋರ್, ಸಂಜೆ 5 ಗಂಟೆ ಸುಮಾರಿಗೆ ತನ್ನ ಸೈಕಲ್ ಏರಿ ಮನೆಯಿಂದ ಹೊರಟು ಹೋಗಿದ್ದಾನೆ.
ರಾತ್ರಿ 10 ಗಂಟೆಯಾದರೂ ಮಗ ಮನೆಗೆ ಬಾರದಿದ್ದಾಗ ಪೋಷಕರಿಗೆ ಆತಂಕ ಶುರುವಾಗಿದೆ. ಕೂಡಲೇ ಸಂಬಂಧಿಕರು, ಸ್ನೇಹಿತರ ಮನೆಗಳು ಹಾಗೂ ಶಾಲೆಯಲ್ಲಿ ವಿಚಾರಿಸಿದರೂ ಆತನ ಬಗ್ಗೆ ಯಾವುದೇ ಸುಳಿವು ಲಭ್ಯವಾಗಿಲ್ಲ. ಹುಡುಕಿ ಹುಡುಕಿ ಕಂಗಾಲಾದ ಬಾಲಕನ ತಾಯಿ ಲಕ್ಷ್ಮೀ ಅವರು ಅಂತಿಮವಾಗಿ ಸುಬ್ರಮಣ್ಯಪುರ ಪೊಲೀಸ್ ಠಾಣೆಗೆ ತೆರಳಿ ಮಿಸ್ಸಿಂಗ್ ಕೇಸ್ (ನಾಪತ್ತೆ ದೂರು) ದಾಖಲಿಸಿದ್ದಾರೆ. ದೂರು ದಾಖಲಿಸಿಕೊಂಡಿರುವ ಸುಬ್ರಮಣ್ಯಪುರ ಠಾಣಾ ಪೊಲೀಸರು ಬಾಲಕನಿಗಾಗಿ ತೀವ್ರ ಶೋಧ ಕಾರ್ಯ ನಡೆಸುತ್ತಿದ್ದಾರೆ. ಆದರೂ, ನಾಲ್ಕು ದಿನ ಕಳೆದರೂ ಸೈಕಲ್ ಸಮೇತ ಹೋದ ಕಿಶೋರ್ ಪತ್ತೆಯಾಗದ ಹಿನ್ನೆಲೆಯಲ್ಲಿ ಆತನ ಕುಟುಂಬಸ್ಥರ ಆತಂಕ ಮುಗಿಲುಮುಟ್ಟಿದೆ.