ಬೆಂಗಳೂರು: ಸುರಂಗ (ಟನಲ್) ರಸ್ತೆ ಯೋಜನೆ ವಿರೋಧಿಸಿ ವಿಪಕ್ಷ ನಾಯಕ ಆರ್. ಅಶೋಕ್ ನೇತೃತ್ವದಲ್ಲಿ ಬಿಜೆಪಿ ಅಭಿಯಾನ ನಡೆಸುತ್ತಿರುವ ವಿಚಾರಕ್ಕೆ ಸಂಬಂಧಿಸಿದಂತೆ ಉಪಮುಖ್ಯಮಂತ್ರಿ ಮತ್ತು ಬೆಂಗಳೂರು ನಗರಾಭಿವೃದ್ಧಿ ಸಚಿವರಾದ ಡಿ.ಕೆ. ಶಿವಕುಮಾರ್ ಅವರು ಇಂದು ತೀವ್ರವಾಗಿ ಪ್ರತಿಕ್ರಿಯಿಸಿದ್ದಾರೆ.
ಮೆಟ್ರೋ ಮೂಲವೇ ಟನಲ್: ಬಿಜೆಪಿ ವಿರೋಧಕ್ಕೆ ಪ್ರತಿಕ್ರಿಯಿಸಿದ ಡಿ.ಕೆ.ಶಿ, “ಟನಲ್‌ನಿಂದಲೇ ತಾನೇ ಮೆಟ್ರೋ ಬಂದಿದ್ದು? ನಾನು ಎಲ್ಲವನ್ನು ಅಧ್ಯಯನ ಮಾಡಿದ್ದೇನೆ. ಮೆಟ್ರೋ ಮಾರ್ಗವನ್ನೂ ಸಹ ಟನಲ್ ತಂತ್ರಜ್ಞಾನ ಬಳಸಿ ನಿರ್ಮಿಸಲಾಗಿದೆ” ಎಂದು ಹೇಳಿದರು.
ಇದನ್ನೂ ಓದಿ: Tunnel Project ವಿರೋಧಿಸಿ ಬಿಜೆಪಿ ಜನಜಾಗೃತಿ: ‘ಸಸ್ಯಕಾಶಿಗೆ ಗುಂಡಿ ತೋಡುತ್ತಿದೆ ಸರ್ಕಾರ’ – ಆರ್. ಅಶೋಕ್ ವಾಗ್ದಾಳಿ
“ಲಾಲ್‌ ಬಾಗ್‌ ಹಾಳು ಮಾಡುವಷ್ಟು ಮೂರ್ಖನಲ್ಲ”: ಟನಲ್ ಯೋಜನೆಯಿಂದ ಲಾಲ್‌ ಬಾಗ್‌ಗೆ ಧಕ್ಕೆಯಾಗಲಿದೆ ಎಂಬ ಬಿಜೆಪಿ ಮತ್ತು ಪರಿಸರವಾದಿಗಳ ಆರೋಪವನ್ನು ಡಿ.ಕೆ.ಶಿ. ಅವರು ತಳ್ಳಿ ಹಾಕಿದರು. “ಲಾಲ್‌ ಬಾಗ್‌ ಹಾಳು ಮಾಡುವಷ್ಟು ನಾನು ಮೂರ್ಖನಲ್ಲ. ಬೆಂಗಳೂರಿನ ಪರಿಸರ ಮತ್ತು ಪರಂಪರೆಯನ್ನು ರಕ್ಷಿಸುವ ಜವಾಬ್ದಾರಿ ನಮಗೂ ಇದೆ,” ಎಂದು ಸ್ಪಷ್ಟಪಡಿಸಿದರು.
ಸಮಿತಿ ರಚನೆಗೆ ಸಿದ್ಧತೆ: ಯೋಜನೆಯ ಕುರಿತು ಉಂಟಾಗಿರುವ ಗೊಂದಲ ನಿವಾರಣೆಗಾಗಿ ವಿರೋಧ ಪಕ್ಷದ ನಾಯಕ ಆರ್. ಅಶೋಕ್ ಅವರ ಅಧ್ಯಕ್ಷತೆಯಲ್ಲೇ ತಾಂತ್ರಿಕ ಸಮಿತಿ ರಚಿಸಲು ತಾವು ಸಿದ್ಧರಿರುವುದಾಗಿ ಡಿಸಿಎಂ ಡಿ.ಕೆ. ಶಿವಕುಮಾರ್ ಘೋಷಿಸಿದರು. ಈ ಮೂಲಕ ಯೋಜನೆಯಲ್ಲಿ ಪಾರದರ್ಶಕತೆ ಕಾಯ್ದುಕೊಳ್ಳುವ ಭರವಸೆ ನೀಡಿದರು.
ಸಹಿ ಸಂಗ್ರಹಕ್ಕೆ ಅಭ್ಯಂತರವಿಲ್ಲ: ಬಿಜೆಪಿ ನಾಯಕರು ಟನಲ್ ಯೋಜನೆ ವಿರೋಧಿಸಿ ಸಹಿ ಸಂಗ್ರಹ ಅಭಿಯಾನ ನಡೆಸುತ್ತಿರುವ ಬಗ್ಗೆ ಪ್ರತಿಕ್ರಿಯಿಸಿ, “ಸಹಿ ಸಂಗ್ರಹ ಮಾಡಲಿ, ಅದಕ್ಕೆ ನಮ್ಮ ಅಭ್ಯಂತರ ಇಲ್ಲ. ಪ್ರಜಾಪ್ರಭುತ್ವದಲ್ಲಿ ಪ್ರತಿಭಟನೆಗೆ ಅವಕಾಶವಿದೆ,” ಎಂದು ಅವರು ಹೇಳಿದರು. ಆದರೆ, ಯೋಜನೆಯ ಅವಶ್ಯಕತೆ ಮತ್ತು ಕಾರ್ಯಸಾಧ್ಯತೆಯ ಬಗ್ಗೆ ಸರ್ಕಾರಕ್ಕೆ ಸ್ಪಷ್ಟ ಅರಿವಿದೆ ಎಂದು ಪ್ರತಿಪಾದಿಸಿದರು.