ಆಧ್ಯಾತ್ಮಿಕ ಗುರು ನೀಮ್ ಕರೊಲಿ ಬಾಬಾ ಅವರ ಜೀವನ ಚರಿತ್ರೆ ಆಧಾರಿತ ಹಿಂದಿ ಚಲನಚಿತ್ರ ‘ಹನುಮಾನ್ ಅಂಶ್’ (Hanuman Ansh) ಬಾಕ್ಸ್ ಆಫೀಸ್ನಲ್ಲಿ ಸೃಷ್ಟಿಸುತ್ತಿರುವ ಸುನಾಮಿ ಅಂತಿಂಥದ್ದಲ್ಲ. ಕೇವಲ 2 ಕೋಟಿ ರೂಪಾಯಿಗಳ ಸಣ್ಣ ಬಜೆಟ್ನಲ್ಲಿ ನಿರ್ಮಾಣವಾದ ಈ ಚಿತ್ರ, ಕೇವಲ ಬಾಯಿಂದ ಬಾಯಿಗೆ ಹರಡಿದ ವಿಮರ್ಶೆ ಹಾಗೂ ಪ್ರಚಾರದಿಂದಲೇ (Word of mouth) ಬರೋಬ್ಬರಿ 220 ಕೋಟಿ ರೂಪಾಯಿಗೂ ಅಧಿಕ ಕಲೆಕ್ಷನ್ ಮಾಡಿ ಮುನ್ನುಗ್ಗುತ್ತಿದೆ.
ಶನಿವಾರ (ಸೆಪ್ಟೆಂಬರ್ 12), ಅಂದರೆ ಬಿಡುಗಡೆಯಾದ 37ನೇ ದಿನವೂ ಭಾರತದಲ್ಲಿ ಭರ್ಜರಿ ಪ್ರದರ್ಶನ ಕಂಡಿರುವ ಚಿತ್ರ, ಬರೋಬ್ಬರಿ 18.50 ಕೋಟಿ ರೂ. ಗಳಿಕೆ ಮಾಡಿದೆ. ಶೀಘ್ರದಲ್ಲೇ 250 ಕೋಟಿ ರೂ. ಕ್ಲಬ್ ಸೇರುವ ವಿಶ್ವಾಸದಲ್ಲಿರುವ ಈ ಚಿತ್ರವನ್ನು ಕೇವಲ ಸಾಮಾನ್ಯ ಪ್ರೇಕ್ಷಕರು ಮಾತ್ರವಲ್ಲದೆ, ಸೆಲೆಬ್ರಿಟಿಗಳೂ ಮೆಚ್ಚಿ ಕೊಂಡಾಡುತ್ತಿದ್ದಾರೆ. ಚಿತ್ರದ ಈ ಅದ್ಭುತ ಯಶಸ್ಸಿನ ಬೆನ್ನಲ್ಲೇ ‘ಹನುಮಾನ್ ಅಂಶ್’ ಒಟಿಟಿ (OTT) ಹಕ್ಕುಗಳ ಕುರಿತು ಭಾರೀ ಚರ್ಚೆ ಶುರುವಾಗಿದೆ.
100 ಕೋಟಿ ರೂ. ಒಟಿಟಿ ಆಫರ್ ಬಂದಿದೆಯೇ?
ಚಿತ್ರಮಂದಿರಗಳಲ್ಲಿ ಪ್ರೇಕ್ಷಕರ ದಟ್ಟಣೆ ಹೆಚ್ಚಾಗುತ್ತಿದ್ದಂತೆ, ಒಟಿಟಿ ವೇದಿಕೆಗಳಿಂದಲೂ ಚಿತ್ರಕ್ಕೆ ಭಾರೀ ಬೇಡಿಕೆ ಸೃಷ್ಟಿಯಾಗಿದೆ. ಸೋಶಿಯಲ್ ಮೀಡಿಯಾದಲ್ಲಿ ಈ ಚಿತ್ರದ ಹಕ್ಕುಗಳನ್ನು ಖರೀದಿಸಲು ಬರೋಬ್ಬರಿ 100 ಕೋಟಿ ರೂಪಾಯಿಗಳ ಒಟಿಟಿ ಆಫರ್ ಬಂದಿದೆ ಎಂಬ ಪೋಸ್ಟ್ಗಳು ವೈರಲ್ ಆಗಿವೆ. ಆದರೆ, ಈ ವದಂತಿಗಳಿಗೆ ಚಿತ್ರದ ನಿರ್ಮಾಪಕಿಯರಲ್ಲೊಬ್ಬರಾದ ರಾಗಿಣಿ ಸೋನಾ ಅವರು ಸ್ಪಷ್ಟನೆ ನೀಡಿದ್ದಾರೆ.
“100 ಕೋಟಿ ರೂ. ಆಫರ್ ಬಂದಿದೆ ಎನ್ನುವುದೆಲ್ಲಾ ಕೇವಲ ವದಂತಿಗಳು, ದಯವಿಟ್ಟು ಅವುಗಳಿಗೆ ಕಿವಿಗೊಡಬೇಡಿ. ಪ್ರೇಕ್ಷಕರು ಚಿತ್ರಮಂದಿರಗಳಲ್ಲೇ ಸಿನಿಮಾ ನೋಡಿ ಆನಂದಿಸಬೇಕು ಎಂಬುದು ನಮ್ಮ ಆಸೆ. ಸ್ವತಃ ಪ್ರೇಕ್ಷಕರೇ ನಮಗಾಗಿ ಪ್ರಚಾರ ಮಾಡುತ್ತಿರುವುದು ನಾನು ಹಿಂದೆಂದೂ ಕಂಡಿಲ್ಲ, ಇದು ಖಂಡಿತವಾಗಿಯೂ ನೀಮ್ ಕರೋಲಿ ಬಾಬಾ ಅವರ ಪವಾಡ. ನಮ್ಮ ಬಳಿ ಯಾವುದೇ 100 ಕೋಟಿ ಒಟಿಟಿ ಪ್ರಸ್ತಾಪವಿಲ್ಲ ಮತ್ತು ಅಂತಹ ಪ್ರಸ್ತಾಪಗಳ ಅಗತ್ಯವೂ ಸದ್ಯಕ್ಕಿಲ್ಲ” ಎಂದು ರಾಗಿಣಿ ಸೋನಾ ವದಂತಿಗಳನ್ನು ತಳ್ಳಿಹಾಕಿದ್ದಾರೆ.
ಸದ್ಯಕ್ಕೆ ಯಾವುದೇ ಒಟಿಟಿ ಬಿಡುಗಡೆಯ ದಿನಾಂಕ ಅಂತಿಮವಾಗಿಲ್ಲ. ಏನೇ ಇದ್ದರೂ ಚಿತ್ರತಂಡದೊಂದಿಗೆ ಚರ್ಚಿಸಿ ಸೂಕ್ತ ಸಮಯದಲ್ಲಿ ನಾವೇ ಅಧಿಕೃತವಾಗಿ ಘೋಷಿಸುತ್ತೇವೆ. ಅಲ್ಲಿಯವರೆಗೆ ಚಿತ್ರಮಂದಿರಗಳಲ್ಲೇ ಸಿನಿಮಾ ವೀಕ್ಷಿಸಿ ಎಂದು ಅವರು ಮನವಿ ಮಾಡಿದ್ದಾರೆ. ‘ಹನುಮಾನ್ ಅಂಶ್’ ಚಿತ್ರದಲ್ಲಿ ಶೋಭಿನವ್ ಸತ್ಯ, ವಿಹಾನ್ ಶೆಡ್ಗೆ, ಚಂದನ್ ಕೆ. ಆನಂದ್, ಪೂರ್ಣಿಮಾ ತಿವಾರಿ, ಅನಿಲ್ ರಸ್ತೋಗಿ, ಗುಲ್ಶನ್ ಪಾಂಡೆ ಹಾಗೂ ಭಗವಾನದಾಸ್ ಪಟೇಲ್ ಮುಂತಾದವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.