ಬೆಂಗಳೂರು: ಅಪರಾಧ ಪ್ರಕರಣಗಳ ಅತ್ಯುತ್ತಮ ತನಿಖೆ ಹಾಗೂ ವಿಧಿವಿಜ್ಞಾನ (Forensic) ಕ್ಷೇತ್ರದಲ್ಲಿ ಅಸಾಧಾರಣ ಸೇವೆ ಸಲ್ಲಿಸಿದ ದೇಶದ ಪೊಲೀಸ್ ಅಧಿಕಾರಿಗಳಿಗೆ ನೀಡಲಾಗುವ ಪ್ರತಿಷ್ಠಿತ ‘ಕೇಂದ್ರ ಗೃಹ ಸಚಿವರ ದಕ್ಷತಾ ಪದಕ’ (Kendriya Grihmantri Dakshata Padak – 2026) ಅಕ್ಟೋಬರ್ 31ರಂದು ಪ್ರಕಟವಾಗಿದೆ. ಈ ಬಾರಿಯ ಪ್ರಶಸ್ತಿಗೆ ಕರ್ನಾಟಕದ ಒಟ್ಟು 7 ಅಧಿಕಾರಿಗಳು ಭಾಜನರಾಗುವ ಮೂಲಕ ರಾಜ್ಯ ಪೊಲೀಸ್ ಇಲಾಖೆಯ ಘನತೆಯನ್ನು ರಾಷ್ಟ್ರಮಟ್ಟದಲ್ಲಿ ಎತ್ತಿಹಿಡಿದಿದ್ದಾರೆ.
ಅತ್ಯುತ್ತಮ ತನಿಖಾ ಪದಕ ವಿಜೇತರು (Investigation Medal): ಸಂಕೀರ್ಣ ಕ್ರಿಮಿನಲ್ ಪ್ರಕರಣಗಳ ಅತ್ಯುತ್ತಮ ಹಾಗೂ ನಿಷ್ಪಕ್ಷಪಾತ ತನಿಖೆಗಾಗಿ ರಾಜ್ಯದ 6 ಪೊಲೀಸ್ ಅಧಿಕಾರಿಗಳು ಈ ಪದಕಕ್ಕೆ ಆಯ್ಕೆಯಾಗಿದ್ದಾರೆ. ಪ್ರಶಸ್ತಿ ವಿಜೇತರ ಪಟ್ಟಿ ಇಂತಿದೆ:
- ಶೋಭಾ ಎನ್. – ಪೊಲೀಸ್ ಇನ್ಸ್‌ಪೆಕ್ಟರ್, ಹಲಸೂರು ಗೇಟ್ ಸಂಚಾರಿ ಪೊಲೀಸ್ ಠಾಣೆ, ಬೆಂಗಳೂರು ನಗರ.
- ರತ್ನಮ್ಮ ಕೆ. – ಎಎಸ್‌ಐ (ASI), ಮಹಿಳಾ ಪೊಲೀಸ್ ಠಾಣೆ (ಪೂರ್ವ ವಿಭಾಗ), ಬೆಂಗಳೂರು ನಗರ.
- ಬಾಲಕೃಷ್ಣ ವೈ. – ಮುಖ್ಯ ಪೇದೆ (CHC), ಎಫ್‌ಐಯು ಸಿಐಡಿ (FIU CID), ಬೆಂಗಳೂರು.
- ಬಾವುದ್ದೀನ್ ರುಕ್ಮುದ್ದೀನ್ ಗಡ್ಡೆಕರ್ – ಪೊಲೀಸ್ ಇನ್ಸ್‌ಪೆಕ್ಟರ್, ಮಾಳಮಾರುತಿ ಪೊಲೀಸ್ ಠಾಣೆ, ಬೆಳಗಾವಿ ನಗರ.
- ಎಂ. ಶ್ರೀನಿವಾಸ್ ರಾವ್ – ಪೊಲೀಸ್ ಇನ್ಸ್‌ಪೆಕ್ಟರ್, ಡಿಎಸ್‌ಬಿ (DSB) ಬಳ್ಳಾರಿ.
- ಮಂಜುನಾಥ್ – ಪೊಲೀಸ್ ಇನ್ಸ್‌ಪೆಕ್ಟರ್, ದೇವದುರ್ಗ ಪೊಲೀಸ್ ಠಾಣೆ, ರಾಯಚೂರು.
ವಿಧಿವಿಜ್ಞಾನ ವಿಭಾಗದ ಸಾಧಕರು (FSL Medal): ವಿಧಿವಿಜ್ಞಾನ ವಿಭಾಗದಲ್ಲಿ ತೋರಿದ ಅತ್ಯುತ್ತಮ ಕಾರ್ಯಕ್ಷಮತೆ ಹಾಗೂ ಅಪರಾಧ ಪ್ರಕರಣಗಳನ್ನು ಬೇಧಿಸುವಲ್ಲಿ ವೈಜ್ಞಾನಿಕ ಸಾಕ್ಷ್ಯಾಧಾರಗಳನ್ನು ಕಲೆಹಾಕುವಲ್ಲಿ ತೋರಿದ ವೃತ್ತಿಪರತೆಗಾಗಿ ಮೈಸೂರಿನ ಪ್ರಾದೇಶಿಕ ವಿಧಿವಿಜ್ಞಾನ ಪ್ರಯೋಗಾಲಯದ (RFSL) ಉಪ ನಿರ್ದೇಶಕರಾದ ಡಾ. ಚಂದ್ರಶೇಖರ ಅವರಿಗೆ ಈ ಪ್ರತಿಷ್ಠಿತ ಪದಕ ಒಲಿದಿದೆ.