ಭಾರತದಲ್ಲಿ ಗಂಭೀರ ರಕ್ತದ ಕಾಯಿಲೆಗಳಿಂದ ಬಳಲುತ್ತಿರುವ ಪ್ರತಿ 10 ಮಕ್ಕಳ ಪೈಕಿ ಕೇವಲ ಮೂವರಿಗೆ ಮಾತ್ರ ಹೊಂದಾಣಿಕೆಯಾಗುವ ಮೂಳೆ ಮಜ್ಜೆ ದಾನಿಗಳು ಲಭ್ಯವಾಗುತ್ತಿದ್ದಾರೆ. ಇಂತಹ ಸಂಕಷ್ಟದ ನಡುವೆಯೂ, ಬೆಂಗಳೂರಿನ ನಾರಾಯಣ ಹೆಲ್ತ್ ಸಿಟಿಯು 1,000ಕ್ಕೂ ಹೆಚ್ಚು ಮಕ್ಕಳಿಗೆ ‘ಹಾಪ್ಲೊಐಡೆಂಟಿಕಲ್’ (ಹಾಫ್ ಮ್ಯಾಚ್) ಮೂಳೆ ಮಜ್ಜೆ ಕಸಿ (BMT) ಚಿಕಿತ್ಸೆ ನೆರವೇರಿಸುವ ಮೂಲಕ ಏಷ್ಯಾದಲ್ಲೇ ಅತಿ ಹೆಚ್ಚು ಶಸ್ತ್ರಚಿಕಿತ್ಸೆ ನಡೆಸಿದ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದರ ಜೊತೆಗೆ ವಯಸ್ಕರು ಹಾಗೂ ಮಕ್ಕಳ ಒಟ್ಟಾರೆ ಕಸಿ ಲೆಕ್ಕಾಚಾರದಲ್ಲಿ ಆಸ್ಪತ್ರೆಯ ಸಂಚಿತ ಚಿಕಿತ್ಸೆಗಳ ಸಂಖ್ಯೆ 2,500ರ ಗಡಿ ದಾಟಿದೆ.
ದಾನಿಗಳ ಕೊರತೆ ಮತ್ತು ಜಾಗತಿಕ ದಾಖಲೆ
ರೋಗಿಗಳಲ್ಲಿ ಕೇವಲ ಶೇ. 25 ರಿಂದ 30ರಷ್ಟು ಮಕ್ಕಳಿಗೆ ಮಾತ್ರ ಒಡಹುಟ್ಟಿದವರಿಂದ ಪೂರ್ಣ ಹೊಂದಾಣಿಕೆಯ ದಾನಿಗಳು ಸಿಗುತ್ತಾರೆ. ಉಳಿದ ಶೇ. 10-15ರಷ್ಟು ಮಂದಿಗೆ ಹೊರಗಿನ ದಾನಿಗಳು ದೊರೆಯಬಹುದು. ಬಹುಪಾಲು ರೋಗಿಗಳಿಗೆ ಪೋಷಕರಿಂದ ಶೇ. 50ರಷ್ಟು ಹೊಂದಾಣಿಕೆಯಾಗುವ ಕೋಶಗಳನ್ನು ಪಡೆದು ಮಾಡುವ ಹಾಪ್ಲೊಐಡೆಂಟಿಕಲ್ ಕಸಿಯೇ ಬದುಕಿಗೆ ಏಕೈಕ ದಾರಿಯಾಗಿದೆ. ಈ ಸವಾಲಿನ ನಡುವೆಯೂ ನಾರಾಯಣ ಹೆಲ್ತ್ ಸಿಟಿಯು ಒಂದೇ ಹಣಕಾಸು ವರ್ಷದಲ್ಲಿ ಬರೋಬ್ಬರಿ 228 ಮಕ್ಕಳಿಗೆ ಯಶಸ್ವಿ ಮೂಳೆ ಮಜ್ಜೆ ಕಸಿ ನೆರವೇರಿಸಿದ್ದು, ಇದು ಜಾಗತಿಕ ಮಟ್ಟದಲ್ಲೇ ಒಂದು ವರ್ಷದ ಅವಧಿಯಲ್ಲಿ ಆಸ್ಪತ್ರೆಯೊಂದು ದಾಖಲಿಸಿದ ಅತ್ಯಧಿಕ ಸಂಖ್ಯೆಯಾಗಿದೆ. ಥಲಸ್ಸೆಮಿಯಾ, ಲ್ಯುಕೇಮಿಯಾ ಮತ್ತು ಅಪ್ಲಾಸ್ಟಿಕ್ ಅನೀಮಿಯಾದಂತಹ ಸಂಕೀರ್ಣ ಪ್ರಕರಣಗಳನ್ನು ಸಂಸ್ಥೆ ಯಶಸ್ವಿಯಾಗಿ ನಿರ್ವಹಿಸಿದೆ.
ದಾನಿಗಳ ಕೊರತೆ ಭರವಸೆಯ ಕೊರತೆಯಾಗಬಾರದು
ದೇಹಕ್ಕೆ ಸರಿಹೊಂದುವ ದಾನಿ ಸಿಗಲಿಲ್ಲ ಎಂಬ ಒಂದೇ ಕಾರಣಕ್ಕೆ ಯಾವುದೇ ಮಗು ರೋಗದ ವಿರುದ್ಧದ ಹೋರಾಟದಲ್ಲಿ ಸೋಲಬಾರದು ಎಂಬ ದೃಷ್ಟಿಕೋನದಿಂದ ಈ ವಿಭಾಗವನ್ನು ಕಟ್ಟಲಾಗಿದೆ ಎಂದು ನಾರಾಯಣ ಹೆಲ್ತ್ ಸಂಸ್ಥಾಪಕ ಡಾ. ದೇವಿ ಶೆಟ್ಟಿ ತಿಳಿಸಿದ್ದಾರೆ. ಆಸ್ಪತ್ರೆಯಿಂದ ಗುಣಮುಖರಾಗಿ ಹೊರನಡೆಯುವ ಮಕ್ಕಳೇ ಸೇವೆಗೆ ನಿಜವಾದ ಪ್ರೇರಣೆ ಎಂದು ಅವರು ಬಣ್ಣಿಸಿದ್ದಾರೆ. ನಾರಾಯಣ ಹೆಲ್ತ್ ಸಿಟಿಯ ಪೀಡಿಯಾಟ್ರಿಕ್ ಹೆಮಟಾಲಜಿ ಮತ್ತು ಬಿಎಂಟಿ ವಿಭಾಗದ ಕ್ಲಿನಿಕಲ್ ಲೀಡ್ ಡಾ. ಸುನೀಲ್ ಭಟ್ ಅವರು, 1,000ಕ್ಕೂ ಹೆಚ್ಚು ಮಕ್ಕಳಿಗೆ ಈ ಚಿಕಿತ್ಸೆ ನೀಡಿರುವ ಅನುಭವವು ಸಂಕೀರ್ಣ ಪ್ರಕರಣಗಳನ್ನು ಸುರಕ್ಷಿತವಾಗಿ ನಿರ್ವಹಿಸುವ ಆಳವಾದ ಪರಿಣತಿಯನ್ನು ತಂದುಕೊಟ್ಟಿದೆ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.
ಮಕ್ಕಳಿಗೆ ಮರುಜೀವ ನೀಡಿದ ಯಶಸ್ವಿ ಪ್ರಕರಣಗಳು
ಇದೇ ವೇಳೆ ಆಸ್ಪತ್ರೆಯಲ್ಲಿ ಮರುಜೀವ ಪಡೆದ ಹಲವು ಮಕ್ಕಳ ಪ್ರಕರಣಗಳು ಇತರರಿಗೂ ಭರವಸೆ ಮೂಡಿಸಿವೆ. ಜಮ್ಮು ಮತ್ತು ಕಾಶ್ಮೀರದ ಶಿರಿನ್ ಎಂಬ ಬಾಲಕಿ ಕುಟುಂಬದವರ ನೆರವಿನಿಂದ ಯಶಸ್ವಿ ಕಸಿಗೆ ಒಳಗಾಗಿ ಆಸ್ಪತ್ರೆಯ 2,500ನೇ ಕಸಿ ರೋಗಿಯಾಗಿ ಹೊರಹೊಮ್ಮಿದ್ದಾಳೆ. ಲ್ಯುಕೇಮಿಯಾ ಮರುಕಳಿಕೆಯಿಂದ ಬಳಲುತ್ತಿದ್ದ 11 ವರ್ಷದ ವಿಪಿನ್ ಹಾಗೂ ತೀವ್ರ ಅಪ್ಲಾಸ್ಟಿಕ್ ಅನೀಮಿಯಾದಿಂದ ಬಳಲುತ್ತಿದ್ದ ಛತ್ತೀಸ್‌ಗಢದ 15 ವರ್ಷದ ಅಶುತೋಷ್ ತಮ್ಮ ತಂದೆಯಿಂದಲೇ ಹಾಪ್ಲೊಐಡೆಂಟಿಕಲ್ ಸ್ಟೆಮ್ ಸೆಲ್ ಪಡೆದು ಗುಣಮುಖರಾಗಿದ್ದಾರೆ.
ಅಂತೆಯೇ, ರಕ್ತದ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದ ತುಮಕೂರಿನ 7 ವರ್ಷದ ಮಯಾಂಕ್, ಮೂತ್ರಪಿಂಡದ ಸಮಸ್ಯೆ ಸೇರಿದಂತೆ ಹಲವು ಸಂಕೀರ್ಣ ಸವಾಲುಗಳ ನಡುವೆಯೂ ತಂದೆಯ ಜೀವಕೋಶದ ನೆರವಿನಿಂದ ಯಶಸ್ವಿ ಕಸಿ ಚಿಕಿತ್ಸೆ ಪಡೆದು ಹೊಸ ಜೀವನ ಕಂಡುಕೊಂಡಿದ್ದು, ವೈದ್ಯಕೀಯ ತಂಡದ ಪರಿಣತಿಗೆ ಸಾಕ್ಷಿಯಾಗಿದ್ದಾನೆ.