ಬೆಂಗಳೂರು: ಏರೋಸ್ಪೇಸ್ ಮತ್ತು ರಕ್ಷಣಾ ವಲಯದ ಬಿಡಿಭಾಗಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿರುವ ಬೆಂಗಳೂರು ಮೂಲದ ‘ಹೈಕ್ಯಾಲ್‌ ಟೆಕ್ನಾಲಜೀಸ್’, ಅಜೀಮ್ ಪ್ರೇಮ್‌ಜಿ ಅವರ ‘ಪ್ರೇಮ್‌ಜಿ ಇನ್‌ವೆಸ್ಟ್’ನಿಂದ 30 ರಿಂದ 40 ಮಿಲಿಯನ್ ಡಾಲರ್ (ಅಂದಾಜು 300 ರಿಂದ 400 ಕೋಟಿ ರೂ.) ಬಂಡವಾಳ ಸಂಗ್ರಹಿಸುವಲ್ಲಿ ಯಶಸ್ವಿಯಾಗಿದೆ. ಸುಮಾರು 4 ದಶಕಗಳ ಸುದೀರ್ಘ ಇತಿಹಾಸವಿರುವ ಹೈಕ್ಯಾಲ್‌ ಕಂಪನಿಗೆ ಸಿಕ್ಕ ಮೊದಲ ಸಾಂಸ್ಥಿಕ ಹೂಡಿಕೆ ಇದಾಗಿದ್ದು, ಜಾಗತಿಕ ಮಟ್ಟದಲ್ಲಿ ಕಂಪನಿಯ ಕಾರ್ಯಾಚರಣೆಯನ್ನು ಇನ್ನಷ್ಟು ವಿಸ್ತರಿಸಲು ಈ ಹಣ ಬಳಕೆಯಾಗಲಿದೆ.
ರಫೇಲ್‌ನಿಂದ ಇಸ್ರೋವರೆಗೆ ಹೈಕ್ಯಾಲ್‌ ಹೆಜ್ಜೆ:
1986ರಲ್ಲಿ ಆರಂಭವಾದ ಹೈಕ್ಯಾಲ್‌ ಟೆಕ್ನಾಲಜೀಸ್, ರಕ್ಷಣಾ ಮತ್ತು ಏರೋಸ್ಪೇಸ್ ವಲಯದಲ್ಲಿ ಅಪಾರ ಅನುಭವ ಹೊಂದಿದೆ. ಫ್ರಾನ್ಸ್‌ನ ಪ್ರಸಿದ್ಧ ರಫೇಲ್ ಯುದ್ಧವಿಮಾನಗಳು, ಬೋಯಿಂಗ್ ಮತ್ತು ಏರ್‌ಬಸ್‌ನ ವಾಣಿಜ್ಯ ವಿಮಾನಗಳು, ಹಡಗು ಮತ್ತು ಜಲಾಂತರ್ಗಾಮಿಗಳು, ಇಸ್ರೋದ (ISRO) ಉಡಾವಣಾ ವಾಹಕಗಳು ಹಾಗೂ ಉಪಗ್ರಹಗಳಿಗೆ ಅಗತ್ಯವಿರುವ ಅತ್ಯಂತ ಸೂಕ್ಷ್ಮ ಹಾಗೂ ಪ್ರಮುಖ ಎಲೆಕ್ಟ್ರೋ-ಮೆಕ್ಯಾನಿಕಲ್ ಬಿಡಿಭಾಗಗಳನ್ನು ಈ ಕಂಪನಿ ವಿನ್ಯಾಸಗೊಳಿಸಿ ಪೂರೈಸುತ್ತದೆ. ಹೈಕ್ಯಾಲ್‌‌ನ ಒಟ್ಟು ವ್ಯವಹಾರದಲ್ಲಿ ಶೇ. 90ರಷ್ಟು ಪಾಲು ರಫ್ತಿನಿಂದಲೇ ಬರುತ್ತಿರುವುದು ಇದರ ಜಾಗತಿಕ ಬೇಡಿಕೆಗೆ ಸಾಕ್ಷಿಯಾಗಿದೆ.
ದಕ್ಷಿಣ ಭಾರತದಲ್ಲಿ ವಿಸ್ತರಣೆಗೆ ವೇಗ:
ಈ ಹೊಸ ಬಂಡವಾಳದ ಮೂಲಕ ದಕ್ಷಿಣ ಭಾರತದಲ್ಲಿ ತನ್ನ ಉತ್ಪಾದನಾ ಸಾಮರ್ಥ್ಯವನ್ನು ವಿಸ್ತರಿಸಲು ಹೈಕ್ಯಾಲ್‌ ಮುಂದಾಗಿದೆ. ಕಂಪನಿಯು ಈಗಾಗಲೇ ದೇವನಹಳ್ಳಿಯಲ್ಲಿ ಹೊಸ ಘಟಕವನ್ನು ಆರಂಭಿಸಿದ್ದು, ಇದೀಗ ಹೊಸೂರಿನಲ್ಲಿ ಮತ್ತೊಂದು ಬೃಹತ್ ಉತ್ಪಾದನಾ ಘಟಕವನ್ನು ನಿರ್ಮಿಸುತ್ತಿದೆ. ಅತ್ಯಾಧುನಿಕ ಯಂತ್ರೋಪಕರಣಗಳ ಖರೀದಿ, ಸಂಶೋಧನೆ ಮತ್ತು ಅಭಿವೃದ್ಧಿ ಹಾಗೂ ಈ ವಲಯಕ್ಕೆ ಅಗತ್ಯವಿರುವ ನುರಿತ ತಜ್ಞರ ನೇಮಕಾತಿಗಾಗಿ ಈ ಹಣವನ್ನು ಬಳಸಿಕೊಳ್ಳಲಾಗುವುದು ಎಂದು ಕಂಪನಿ ತಿಳಿಸಿದೆ. ಡೆಲಾಯ್ಟ್ ಕಾರ್ಪೊರೇಟ್ ಫೈನಾನ್ಸ್ ಸಂಸ್ಥೆಯು ಹೈಕ್ಯಾಲ್‌‌ನ ಆರ್ಥಿಕ ಸಲಹೆಗಾರರಾಗಿ ಈ ಹೂಡಿಕೆ ಪ್ರಕ್ರಿಯೆಯನ್ನು ಸುಗಮಗೊಳಿಸಿದೆ.
ಹೂಡಿಕೆ ಕುರಿತು ಪ್ರತಿಕ್ರಿಯಿಸಿರುವ ಹೈಕ್ಯಾಲ್‌ ಟೆಕ್ನಾಲಜೀಸ್‌ನ ಎಂಡಿ ಯಶಸ್ ಜೈವೀರ್, “ಕಳೆದ 40 ವರ್ಷಗಳಿಂದ ನಾವು ಅತ್ಯುನ್ನತ ಗುಣಮಟ್ಟದ ಇಂಜಿನಿಯರಿಂಗ್ ಉತ್ಪಾದನೆಗೆ ಒತ್ತು ನೀಡಿದ್ದೇವೆ. ಪ್ರೇಮ್‌ಜಿ ಇನ್‌ವೆಸ್ಟ್‌ನ ಬೆಂಬಲವು ನಮ್ಮ ಮುಂದಿನ ಹಂತದ ಬೆಳವಣಿಗೆಗೆ ವೇಗ ನೀಡಲಿದೆ. ಭಾರತದಿಂದಲೇ ಜಗತ್ತಿಗೆ ಅತ್ಯಾಧುನಿಕ ತಂತ್ರಜ್ಞಾನವನ್ನು ಒದಗಿಸುವುದು ನಮ್ಮ ಗುರಿ” ಎಂದು ತಿಳಿಸಿದ್ದಾರೆ.
“ಭಾರತವು ಏರೋಸ್ಪೇಸ್ ಮತ್ತು ರಕ್ಷಣಾ ಉತ್ಪಾದನೆಯಲ್ಲಿ ಅತ್ಯಾಧುನಿಕ ಸಾಮರ್ಥ್ಯಗಳನ್ನು ಬೆಳೆಸಿಕೊಳ್ಳುತ್ತಿರುವುದಕ್ಕೆ ಹೈಕ್ಯಾಲ್‌ ಅತ್ಯುತ್ತಮ ಉದಾಹರಣೆ. ಜಾಗತಿಕ ಕಂಪನಿಗಳ ಬೇಡಿಕೆಯನ್ನು ಪೂರೈಸುವ ಅಪಾರ ಸಾಮರ್ಥ್ಯ ಈ ಸಂಸ್ಥೆಗಿದೆ” ಎಂದು ಪ್ರೇಮ್‌ಜಿ ಇನ್‌ವೆಸ್ಟ್‌ನ ಪಾಲುದಾರ ಮನೋಜ್ ಜೈಸ್ವಾಲ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. 15 ಬಿಲಿಯನ್ ಡಾಲರ್‌ಗೂ ಅಧಿಕ ಬಂಡವಾಳ ಹೊಂದಿರುವ ಪ್ರೇಮ್‌ಜಿ ಇನ್‌ವೆಸ್ಟ್‌ನ ಆದಾಯವು ಮುಖ್ಯವಾಗಿ ‘ಅಜೀಮ್ ಪ್ರೇಮ್‌ಜಿ ಫೌಂಡೇಶನ್’ನ ಸಮಾಜಮುಖಿ ಕಾರ್ಯಗಳಿಗೆ ಬಳಕೆಯಾಗುತ್ತಿರುವುದು ಉಲ್ಲೇಖನೀಯ.