ಶಿಕ್ಷಣಕ್ಕಿಂತ ‘ಗುಟ್ಕಾ’ವೇ ಮುಖ್ಯವಾಯ್ತೇ? ದೇಶದ ಜನರನ್ನು ಹಿಂಡಿ ಹಿಪ್ಪೆ ಮಾಡುತ್ತಿದೆ ತಂಬಾಕು ವ್ಯಸನ!

ದೇಶದಲ್ಲಿ ಆರೋಗ್ಯ ಮತ್ತು ಶಿಕ್ಷಣಕ್ಕಿಂತ ತಂಬಾಕು ಉತ್ಪನ್ನಗಳಾದ ಗುಟ್ಕಾ, ಬೀಡಿ, ಸಿಗರೇಟುಗಳಿಗೇ ಜನರು ಹೆಚ್ಚು ಹಣ ಸುರಿಯುತ್ತಿದ್ದಾರೆ ಎಂಬ ಆಘಾತಕಾರಿ ಸತ್ಯವನ್ನು ಕೇಂದ್ರ ಸರ್ಕಾರದ ಅಂಕಿಅಂಶಗಳು ಬಯಲು ಮಾಡಿವೆ. ರಾಷ್ಟ್ರೀಯ ಸಾಂಖ್ಯಿಕ ಕಚೇರಿ (NSO) ನಡೆಸಿದ ಇತ್ತೀಚಿನ ಸಮೀಕ್ಷೆಯು, ಭಾರತದ ಬಡವರ ಪಾಲಿಗೆ ಗುಟ್ಕಾ ಹೇಗೆ ‘ಮರಣ ಶಾಸನ‘ವಾಗಿ ಪರಿಣಮಿಸುತ್ತಿದೆ ಎಂಬುದರ ಬಗ್ಗೆ ಬೆಚ್ಚಿಬೀಳಿಸುವ ಮಾಹಿತಿ ನೀಡಿದೆ.

ಪ್ರಧಾನ ಮಂತ್ರಿಯವರ ಆರ್ಥಿಕ ಸಲಹಾ ಮಂಡಳಿಯ ಸದಸ್ಯರಾದ ಶಮಿಕಾ ರವಿ ಮತ್ತು ಪಾರ್ಥ ಪ್ರೊತಿಮ್ ಬರ್ಮನ್ ಅವರು ಈ ವರದಿಯನ್ನು ವಿಶ್ಲೇಷಿಸಿದ್ದು, ದೇಶದ ಆರ್ಥಿಕ ಮತ್ತು ಆರೋಗ್ಯ ವ್ಯವಸ್ಥೆಯ ಮೇಲಾಗುತ್ತಿರುವ ಗಂಭೀರ ಪರಿಣಾಮಗಳ ಬಗ್ಗೆ ಎಚ್ಚರಿಸಿದ್ದಾರೆ.

ಆಕಾಶಕ್ಕೇರಿದ ತಂಬಾಕು ಖರ್ಚು: ಕಳೆದ ಒಂದು ದಶಕದಲ್ಲಿ (2011-12 ರಿಂದ 2023-24) ಹಣದುಬ್ಬರವನ್ನು ಸರಿದೂಗಿಸಿದ ನಂತರವೂ, ತಂಬಾಕು ಉತ್ಪನ್ನಗಳ ಮೇಲಿನ ತಲಾವಾರು ವೆಚ್ಚವು ಗ್ರಾಮೀಣ ಭಾರತದಲ್ಲಿ ಶೇ.58 ರಷ್ಟು ಮತ್ತು ನಗರ ಪ್ರದೇಶಗಳಲ್ಲಿ ಶೇ.77 ರಷ್ಟು ಏರಿಕೆಯಾಗಿದೆ. ಇದು ಜನರ ಜೇಬಿಗೆ ಕತ್ತರಿ ಹಾಕುತ್ತಿರುವುದಲ್ಲದೆ, ಆರೋಗ್ಯವನ್ನೂ ಹಾಳುಮಾಡುತ್ತಿದೆ.

ಹಳ್ಳಿಗಳ ಮನೆಮನೆಗೆ ಲಗ್ಗೆ ಇಟ್ಟ ಗುಟ್ಕಾ: ಗ್ರಾಮೀಣ ಭಾಗದಲ್ಲಿ ಗುಟ್ಕಾ ಸೇವನೆ ಸಾಂಕ್ರಾಮಿಕ ರೋಗದಂತೆ ಹಬ್ಬಿದೆ. ಒಂದು ದಶಕದ ಹಿಂದೆ ಶೇ.5.3 ರಷ್ಟಿದ್ದ ಗುಟ್ಕಾ ಬಳಸುವ ಕುಟುಂಬಗಳ ಸಂಖ್ಯೆ, ಈಗ ಬರೋಬ್ಬರಿ ಶೇ.30.4 ಕ್ಕೆ ಏರಿಕೆಯಾಗಿದೆ. ಅಂದರೆ, ಹಳ್ಳಿಗಳಲ್ಲಿನ ಪ್ರತಿ 10 ಮನೆಗಳಲ್ಲಿ 3 ಮನೆಗಳು ಗುಟ್ಕಾ ದಾಸವಾಗಿವೆ!

ಕರ್ನಾಟಕದ ಸ್ಥಿತಿ ಚಿಂತಾಜನಕ: ಉತ್ತರ ಭಾರತದ ರಾಜ್ಯಗಳಿಗೆ ಹೋಲಿಸಿದರೆ ದಕ್ಷಿಣದಲ್ಲಿ ತಂಬಾಕು ಬಳಕೆ ಕೊಂಚ ಕಡಿಮೆ ಎನಿಸಿದರೂ, ಕರ್ನಾಟಕದ ಅಂಕಿಅಂಶ ಆತಂಕ ಮೂಡಿಸುವಂತಿದೆ. ವರದಿಯ ಪ್ರಕಾರ, ಕರ್ನಾಟಕದ ಗ್ರಾಮೀಣ ಭಾಗದ ಪ್ರತಿ ನಾಲ್ಕು ಕುಟುಂಬಗಳಲ್ಲಿ ಒಂದು ಕುಟುಂಬ (One in Four) ಗುಟ್ಕಾ ಚಟಕ್ಕೆ ಬಲಿಯಾಗಿದೆ.

ಶಿಕ್ಷಣಕ್ಕಿಂತ ಚಟವೇ ದುಬಾರಿ: ಇದು ವರದಿಯ ಅತ್ಯಂತ ಕಳವಳಕಾರಿ ಅಂಶ. ಗ್ರಾಮೀಣ ಭಾರತದ ಅತ್ಯಂತ ಬಡ ಕುಟುಂಬಗಳು (ಕೆಳಸ್ತರದ 40% ಜನರು) ತಮ್ಮ ತಿಂಗಳ ಖರ್ಚಿನಲ್ಲಿ ಶಿಕ್ಷಣಕ್ಕಾಗಿ ಕೇವಲ ಶೇ.2.5 ರಷ್ಟು ಹಣ ಮೀಸಲಿಟ್ಟರೆ, ಮದ್ಯ ಮತ್ತು ತಂಬಾಕು ಉತ್ಪನ್ನಗಳಿಗಾಗಿ ಶೇ.4 ರಷ್ಟು ಹಣವನ್ನು ಪೋಲು ಮಾಡುತ್ತಿದ್ದಾರೆ. ಮಕ್ಕಳ ಭವಿಷ್ಯಕ್ಕಿಂತ ಚಟಗಳೇ ಆದ್ಯತೆಯಾಗುತ್ತಿರುವುದು ವಿಪರ್ಯಾಸ.

‘ಆಯುಷ್ಮಾನ್ ಭಾರತ್’ಗೆ ಸವಾಲು: ಒಂದೆಡೆ ಸರ್ಕಾರ ‘ಆಯುಷ್ಮಾನ್ ಭಾರತ್‘ ಯೋಜನೆಯಡಿ ಬಡವರ ಆರೋಗ್ಯ ರಕ್ಷಣೆಗಾಗಿ ಕೋಟಿಗಟ್ಟಲೆ ಖರ್ಚು ಮಾಡುತ್ತಿದ್ದರೆ, ಇನ್ನೊಂದೆಡೆ ಜನರು ತಂಬಾಕು ಸೇವನೆಯಿಂದ ಕ್ಯಾನ್ಸರ್, ಹೃದಯ ಕಾಯಿಲೆಗಳನ್ನು ಮೈಮೇಲೆ ಎಳೆದುಕೊಳ್ಳುತ್ತಿದ್ದಾರೆ. ಇದು ಸರ್ಕಾರದ ಬೊಕ್ಕಸಕ್ಕೆ ಹೊರೆಯಾಗುವುದಲ್ಲದೆ, ಬಡತನ ನಿರ್ಮೂಲನೆಗೆ ಅಡ್ಡಿಯಾಗುತ್ತಿದೆ.

ತಜ್ಞರ ಎಚ್ಚರಿಕೆ: ಕೇವಲ ತೆರಿಗೆ ಹೆಚ್ಚಿಸುವುದರಿಂದ ಈ ಸಮಸ್ಯೆಗೆ ಪರಿಹಾರ ಸಿಗುವುದಿಲ್ಲ. ಬಾಲಿವುಡ್ ನಟರು ಪರೋಕ್ಷ ಜಾಹೀರಾತುಗಳ (Surrogate Advertising) ಮೂಲಕ ಪಾನ್ ಮಸಾಲಾ ಪ್ರಚಾರ ಮಾಡುವುದನ್ನು ನಿಲ್ಲಿಸಬೇಕು ಮತ್ತು ಕಠಿಣ ನಿಯಮಗಳನ್ನು ಜಾರಿಗೆ ತರಬೇಕು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.