ನವದೆಹಲಿ: ಹಿರಿಯ ಉಪ ಚುನಾವಣಾ ಆಯುಕ್ತ (Senior DEC) ಮನೀಶ್ ಗರ್ಗ್ ಅವರ ಕಚೇರಿ ನಡವಳಿಕೆ ಹಾಗೂ ಕಾರ್ಯವೈಖರಿಯ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿ ಚುನಾವಣಾ ಆಯುಕ್ತರಾದ ಸುಖ್ಬೀರ್ ಸಂಧು ಮತ್ತು ವಿವೇಕ್ ಜೋಶಿ ಅವರು ಕ್ಯಾಬಿನೆಟ್ ಕಾರ್ಯದರ್ಶಿಗೆ ಬರೆದಿದ್ದ ಪತ್ರಗಳನ್ನು, ಮುಖ್ಯ ಚುನಾವಣಾ ಆಯುಕ್ತ (CEC) ಜ್ಞಾನೇಶ್ ಕುಮಾರ್ ಅವರ ಕಚೇರಿ ಹಾಗೂ ಸಿಬ್ಬಂದಿ ಮತ್ತು ತರಬೇತಿ ಇಲಾಖೆಗೆ (DoPT) ಕ್ಯಾಬಿನೆಟ್ ಸಚಿವಾಲಯ ರವಾನಿಸಿತ್ತು ಎಂಬ ಮಹತ್ವದ ಮಾಹಿತಿ ಆರ್‌ಟಿಐ (RTI) ಮೂಲಕ ಬಹಿರಂಗವಾಗಿದೆ.
ಆರ್‌ಟಿಐ ಕಾರ್ಯಕರ್ತ ಕಮೋಡೋರ್ ಲೋಕೇಶ್ ಬಾತ್ರಾ (ನಿವೃತ್ತ) ಅವರು ಸಲ್ಲಿಸಿದ್ದ ಅರ್ಜಿಗೆ ಪ್ರತಿಕ್ರಿಯೆಯಾಗಿ ಬಿಡುಗಡೆಯಾದ ದಾಖಲೆಗಳಿಂದ ಈ ವಿಚಾರ ಬೆಳಕಿಗೆ ಬಂದಿದೆ.
ಪತ್ರದಲ್ಲಿ ಏನಿತ್ತು? ವಿವಾದದ ಹಿನ್ನೆಲೆ ಏನು?
ಜುಲೈ 29 ರಂದು ಕ್ಯಾಬಿನೆಟ್ ಕಾರ್ಯದರ್ಶಿ ಟಿ.ವಿ. ಸೋಮನಾಥನ್ ಅವರಿಗೆ ಬರೆಯಲಾದ ಈ ಪತ್ರಗಳಲ್ಲಿ, ಹಿರಿಯ ಉಪ ಚುನಾವಣಾ ಆಯುಕ್ತ ಮನೀಶ್ ಗರ್ಗ್ ಅವರು ಆಯುಕ್ತರನ್ನು ಸಂಪರ್ಕಿಸದೆ ಏಕಾಏಕಿ ಕೆಲಸ ಹಂಚಿಕೆ ಆದೇಶ (Work-allocation order) ಹೊರಡಿಸಿದ್ದಾರೆ ಎಂದು ಆರೋಪಿಸಲಾಗಿತ್ತು. ನಿರ್ದಿಷ್ಟವಾಗಿ, ಐಟಿ ವಿಭಾಗದ ಕಡತಗಳ ರವಾನೆ ಮಾರ್ಗವನ್ನು ಬದಲಾಯಿಸುವ ಗರ್ಗ್ ಅವರ ನಿರ್ಧಾರದ ಬಗ್ಗೆ ಆಯುಕ್ತರು ಕಳವಳ ವ್ಯಕ್ತಪಡಿಸಿದ್ದರು. ಈ ಹಿಂದೆ ಐಟಿ ವಿಭಾಗದ ಕಡತಗಳು ಸಂಜಯ್ ಕುಮಾರ್ ಅವರಿಗೆ ಹೋಗುತ್ತಿದ್ದವು, ಆದರೆ ಗರ್ಗ್ ಅವರು ತಮಗೆ ಹೆಚ್ಚುವರಿ ಜವಾಬ್ದಾರಿ ಸಿಕ್ಕ ಕೆಲವೇ ಗಂಟೆಗಳಲ್ಲಿ ಈ ಬದಲಾವಣೆ ಮಾಡಿದ್ದರು ಎನ್ನಲಾಗಿದೆ.
ಸಚಿವಾಲಯದ ಪ್ರತಿಕ್ರಿಯೆ ಏನು?
ದಾಖಲೆಗಳ ಪ್ರಕಾರ, ಆಗಸ್ಟ್ 4 ರಂದು ಕ್ಯಾಬಿನೆಟ್ ಸಚಿವಾಲಯವು ಈ ಪತ್ರಗಳು ಆಯುಕ್ತರ ‘ವೈಯಕ್ತಿಕ ಸಾಮರ್ಥ್ಯದಲ್ಲಿ’ ಬಂದಿವೆಯೇ ಹೊರತು ಭಾರತೀಯ ಚುನಾವಣಾ ಆಯೋಗದ (ECI) ಅಧಿಕೃತ ಸಂವಹನವಲ್ಲ ಎಂದು ಉಲ್ಲೇಖಿಸಿದೆ. ಸಾಂವಿಧಾನಿಕ ಸಂಸ್ಥೆಯೊಂದರ (ಚುನಾವಣಾ ಆಯೋಗ) ಆಂತರಿಕ ವಿಚಾರದಲ್ಲಿ ಯಾವುದೇ ಹಸ್ತಕ್ಷೇಪ ಮಾಡದಿರಲು ನಿರ್ಧರಿಸಿದ ಸಚಿವಾಲಯ, ಕೇವಲ ಪತ್ರ ಸ್ವೀಕರಿಸಿದ ಬಗ್ಗೆ ಸ್ವೀಕೃತಿ ಪತ್ರವನ್ನು ಕಳುಹಿಸಿದೆ. ಜೊತೆಗೆ, ಭವಿಷ್ಯದಲ್ಲಿ ಗರ್ಗ್ ಅವರ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲು ಅನುಕೂಲವಾಗುವಂತೆ ಈ ವಿಚಾರವನ್ನು DoPT ಯಲ್ಲಿ ದಾಖಲಿಸಲು ಶಿಫಾರಸು ಮಾಡಿದೆ.
ಇತ್ತೀಚೆಗಷ್ಟೇ ಚುನಾವಣಾ ಆಯುಕ್ತರು ಹಾಗೂ ಮುಖ್ಯ ಚುನಾವಣಾ ಆಯುಕ್ತರ ನಡುವೆ ಐಟಿ ಪ್ರೋಟೋಕಾಲ್ ಸೇರಿದಂತೆ ಹಲವು ವಿಚಾರಗಳಲ್ಲಿ ಭಿನ್ನಾಭಿಪ್ರಾಯಗಳಿವೆ ಎಂದು ಮಾಧ್ಯಮಗಳಲ್ಲಿ ವರದಿಯಾಗಿತ್ತು. ಆದರೆ, ಆಯೋಗವು ಈ ವರದಿಗಳನ್ನು ತಳ್ಳಿಹಾಕಿದ್ದು, ಆಯೋಗದ ಎಲ್ಲಾ ನಿರ್ಧಾರಗಳನ್ನು ನಿಯಮಗಳ ಪ್ರಕಾರ ಒಮ್ಮತದಿಂದ ಅಥವಾ ಬಹುಮತದಿಂದ ತೆಗೆದುಕೊಳ್ಳಲಾಗಿದೆ ಎಂದು ಸ್ಪಷ್ಟಪಡಿಸಿತ್ತು. ಇದೀಗ ಈ ಆರ್‌ಟಿಐ ದಾಖಲೆಗಳು ಆಯೋಗದ ಆಂತರಿಕ ವಿದ್ಯಮಾನಗಳ ಬಗ್ಗೆ ಹೊಸ ಚರ್ಚೆಯನ್ನು ಹುಟ್ಟುಹಾಕಿವೆ.