ಗ್ಲಾಸ್ಗೋದಲ್ಲಿ ನಡೆಯುತ್ತಿರುವ 2026ರ ಕಾಮನ್ವೆಲ್ತ್ ಕ್ರೀಡಾಕೂಟದಲ್ಲಿ ಕಳೆದ ಎರಡು ದಿನಗಳಲ್ಲಿ ಒಟ್ಟು ಎಂಟು ಪದಕಗಳನ್ನು ಮುಡಿಗೇರಿಸಿಕೊಂಡು ಮುನ್ನುಗ್ಗುತ್ತಿರುವ ಭಾರತೀಯ ಕ್ರೀಡಾಪಟುಗಳು, ಇದೀಗ ಏಳನೇ ದಿನದ ಸ್ಪರ್ಧೆಗಳಲ್ಲಿ ಮತ್ತಷ್ಟು ಪದಕಗಳ ನಿರೀಕ್ಷೆಯೊಂದಿಗೆ ಕಣಕ್ಕಿಳಿಯಲಿದ್ದಾರೆ.
ಬುಧವಾರದಂದು ಟ್ರ್ಯಾಕ್ ಮತ್ತು ಫೀಲ್ಡ್, ವೇಟ್ಲಿಫ್ಟಿಂಗ್, ಪ್ಯಾರಾ-ಅಥ್ಲೆಟಿಕ್ಸ್ ಹಾಗೂ ಈಜು ಸೇರಿದಂತೆ ಒಟ್ಟು ಒಂಬತ್ತು ಪದಕದ ಸ್ಪರ್ಧೆಗಳಲ್ಲಿ ಭಾರತೀಯರು ತಮ್ಮ ಪ್ರತಿಭೆ ಪ್ರದರ್ಶಿಸಲಿದ್ದು, ಕ್ರೀಡಾಭಿಮಾನಿಗಳಲ್ಲಿ ಭಾರಿ ಕುತೂಹಲ ಮೂಡಿಸಿದೆ.
ಏಳನೇ ದಿನದ ಸ್ಪರ್ಧೆಗಳಲ್ಲಿ ಭಾರತದ ಪದಕದ ಆಸೆ ಮುಖ್ಯವಾಗಿ ಪುರುಷರ ಉದ್ದ ಜಿಗಿತ ಹಾಗೂ ವೇಟ್ಲಿಫ್ಟಿಂಗ್ ವಿಭಾಗಗಳ ಮೇಲಿದೆ. ಪುರುಷರ ಉದ್ದ ಜಿಗಿತದ ಫೈನಲ್ನಲ್ಲಿ 2022ರ ಗೇಮ್ಸ್ನ ಬೆಳ್ಳಿ ಪದಕ ವಿಜೇತ ಶ್ರೀಶಂಕರ್ ಮುರಳಿ ಮತ್ತು ಲೋಕೇಶ್ ಸತ್ಯನಾಥನ್ ಕಣಕ್ಕಿಳಿಯಲಿದ್ದಾರೆ.
8.38 ಮೀಟರ್ ದೂರ ಜಿಗಿದು ಈ ಋತುವಿನ ಅತ್ಯುತ್ತಮ ಸಾಧನೆ ಮಾಡಿರುವ ಶ್ರೀಶಂಕರ್, ತಮ್ಮ ಮೊದಲ ಪ್ರಯತ್ನದಲ್ಲೇ 8.01 ಮೀಟರ್ ಜಿಗಿಯುವ ಮೂಲಕ ಫೈನಲ್ಗೆ ಲಗ್ಗೆಯಿಟ್ಟಿದ್ದು, ಬಲಿಷ್ಠ ಸ್ಪರ್ಧಿಗಳ ನಡುವೆ ಚಿನ್ನದ ಪದಕದ ಮೇಲೆ ಕಣ್ಣಿಟ್ಟಿದ್ದಾರೆ. ಇನ್ನು ವೇಟ್ಲಿಫ್ಟಿಂಗ್ ವಿಭಾಗದಲ್ಲಿ, ಮಹಿಳೆಯರ 77 ಕೆಜಿ ಫೈನಲ್ನಲ್ಲಿ ಕಣಕ್ಕಿಳಿಯಲಿರುವ ಸಂಜನಾ ಅವರು ಕ್ರೀಡಾಕೂಟದಲ್ಲಿ ಭಾರತಕ್ಕೆ ವೇಟ್ಲಿಫ್ಟಿಂಗ್ನಲ್ಲಿ ಮತ್ತೊಂದು ಪದಕ ತಂದುಕೊಡುವ ವಿಶ್ವಾಸದಲ್ಲಿದ್ದಾರೆ.
ಟ್ರ್ಯಾಕ್ ಮತ್ತು ಫೀಲ್ಡ್ ವಿಭಾಗದಲ್ಲಿ, ಏಷ್ಯನ್ ಗೇಮ್ಸ್ ಬೆಳ್ಳಿ ಪದಕ ವಿಜೇತೆ ಪಾರುಲ್ ಚೌಧರಿ ಅವರು ಮಹಿಳೆಯರ 3000 ಮೀಟರ್ ಸ್ಟೀಪಲ್ಚೇಸ್ ಫೈನಲ್ನಲ್ಲಿ ಕೀನ್ಯಾ ಮತ್ತು ಇಂಗ್ಲೆಂಡ್ನ ಓಟಗಾರ್ತಿಯರ ವಿರುದ್ಧ ಸೆಣಸಲಿದ್ದಾರೆ. ಮಹಿಳೆಯರ ಶಾಟ್ಪುಟ್ ಫೈನಲ್ನಲ್ಲಿ ಮನ್ಪ್ರೀತ್ ಕೌರ್ ತಮ್ಮ ಹಿಂದಿನ ಸಾಧನೆಯನ್ನು ಉತ್ತಮಪಡಿಸಿಕೊಳ್ಳುವ ಗುರಿ ಹೊಂದಿದ್ದಾರೆ. ಪ್ಯಾರಾ-ಅಥ್ಲೆಟಿಕ್ಸ್ನಲ್ಲಿ, ಪುರುಷರ ಡಿಸ್ಕಸ್ ಥ್ರೋ ಫೈನಲ್ನಲ್ಲಿ (F42-44/F61-64) ದೇವೇಂದರ್ ಕುಮಾರ್ ಮತ್ತು ಸಾಗರ್ ತಾಯತ್, ಹಾಗೆಯೇ ಪುರುಷರ 100 ಮೀಟರ್ T47 ಸ್ಪ್ರಿಂಟ್ನಲ್ಲಿ ಮೊಹಮ್ಮದ್ ಬಾಸಿಲ್ ಎಂ ಮತ್ತು ದಿಲೀಪ್ ಮಹಾದು ಗಾವಿತ್ ಭಾರತವನ್ನು ಪ್ರತಿನಿಧಿಸಿ ಪದಕದ ಬೇಟೆಯಾಡಲಿದ್ದಾರೆ.
ಈಜು ವಿಭಾಗದಲ್ಲಿ ಆರ್ಯನ್ ನೆಹ್ರಾ ಅವರು ಪುರುಷರ 1500 ಮೀಟರ್ ಫ್ರೀಸ್ಟೈಲ್ ಫೈನಲ್ನಲ್ಲಿ ಅಗ್ರಗಣ್ಯ ಈಜುಗಾರರೊಂದಿಗೆ ಸ್ಪರ್ಧಿಸಲಿದ್ದಾರೆ. ಇನ್ನುಳಿದಂತೆ ಸಾಜನ್ ಪ್ರಕಾಶ್, ಅನೀಶ್ ಎಸ್ ಗೌಡ, ಮತ್ತು ಪ್ಯಾರಾ ಈಜುಗಾರರಾದ ಸುಯಶ್ ನಾರಾಯಣ್ ಜಾಧವ್ ಹಾಗೂ ಚೈತನ್ಯ ವಿಶ್ವಾಸ್ ಕುಲಕರ್ಣಿ ತಮ್ಮ ವಿಭಾಗಗಳ ಪ್ರಾಥಮಿಕ ಹಂತದ ಸ್ಪರ್ಧೆಗಳಲ್ಲಿ (ಹೀಟ್ಸ್) ಪಾಲ್ಗೊಳ್ಳಲಿದ್ದಾರೆ. ಇದಕ್ಕೂ ಮುನ್ನ, ಆರನೇ ದಿನದ ಸ್ಪರ್ಧೆಗಳಲ್ಲಿ ಭಾರತ ಎರಡು ಬೆಳ್ಳಿ ಪದಕಗಳನ್ನು ಗೆದ್ದುಕೊಂಡಿತ್ತು. ಮಹಿಳೆಯರ 69 ಕೆಜಿ ವೇಟ್ಲಿಫ್ಟಿಂಗ್ ಫೈನಲ್ನಲ್ಲಿ ಹರ್ಜಿಂದರ್ ಕೌರ್ ಬೆಳ್ಳಿ ಗೆದ್ದರೆ, ಪುರುಷರ 10,000 ಮೀಟರ್ ಓಟದಲ್ಲಿ ರಾಷ್ಟ್ರೀಯ ದಾಖಲೆ ಹೊಂದಿರುವ ಗುಲ್ವೀರ್ ಸಿಂಗ್ ಅಮೋಘ ಪ್ರದರ್ಶನ ನೀಡಿ ಬೆಳ್ಳಿ ಪದಕಕ್ಕೆ ಕೊರಳೊಡ್ಡುವ ಮೂಲಕ ಭಾರತದ ಕೀರ್ತಿ ಪತಾಕೆ ಹಾರಿಸಿದ್ದರು.